తెలంగాణ భేష్…

*స్కూళ్ల నిబంధనల సడలింపుపై రాష్ట్ర ప్రభుత్వానికి నీతి ఆయోగ్ ప్రశంసలు.
* ప్రైవేటు బడుల ఏర్పాటుకు ఇక లైన్ క్లియర్.
* అనవసర నిబంధనల తొలగింపుపై నీతి ఆయోగ్ కసరత్తు.
* విద్యాసంస్థల స్థాపనకు ‘రెడ్ కార్పెట్’.
* అనుమతుల ప్రక్షాళన దిశగా కేంద్రం కీలక అడుగులు.
* గుర్తింపు ఉన్న బడుల్లోనే ప్రవేశాలు.
* వెబ్‌సైట్‌లో ప్రైవేటు పాఠశాలల జాబితా ఉంచిన విద్యాశాఖ.
హైదరాబాద్, మహా.
దేశవ్యాప్తంగా విద్యా రంగాన్ని మరింత బలోపేతం చేసే దిశగా కేంద్ర ప్రభుత్వం కీలక అడుగులు వేస్తోంది. ఇందులో భాగంగా ప్రైవేటు పాఠశాలల ఏర్పాటు ప్రక్రియను మరింత సరళతరం చేయాలని నిర్ణయించింది. పాఠశాలల స్థాపనకు అవసరమైన అనుమతులను వేగవంతంగా మంజూరు చేయడంతో పాటు, అడుగడుగునా ఆటంకాలుగా మారుతున్న అనవసర నిబంధనలను తొలగించడంపై కేంద్ర ప్రభుత్వ అత్యున్నత విధాన నిర్ణయక సంస్థ నీతి ఆయోగ్‌ లోతైన అధ్యయనం చేపట్టింది. విద్యావిధానంలో సమూల మార్పులు తీసుకురావడం ద్వారా మారుమూల ప్రాంతాల విద్యార్థులకు సైతం నాణ్యమైన విద్యను చేరువ చేయాలన్న ఉద్దేశ్యంతో ప్రభుత్వం ఈ విద్యా సంస్కరణలకు శ్రీకారం చుట్టింది.
**ఉన్నత విద్యా లక్ష్యాల సాధన దిశగా..**
జాతీయ నూతన విద్యావిధానం (ఎన్‌ఈపీ) నిర్దేశించిన ప్రతిష్ఠాత్మక లక్ష్యాలను చేరుకోవడంలో ప్రైవేటు విద్యాసంస్థల పాత్రను కేంద్రం అత్యంత కీలకంగా భావిస్తోంది. ముఖ్యంగా ఉన్నత విద్యలో స్థూల నమోదు నిష్పత్తి (గ్రాస్ ఎన్‌రోల్‌మెంట్ రేషియో – జీఈఆర్)ని 2035 వ సంవత్సరం నాటికి ఏకంగా 50 శాతానికి పెంచాలని జాతీయ నూతన విద్యావిధానం స్పష్టమైన సిఫార్సు చేసింది. ప్రస్తుతం మన దేశంలో ఈ నమోదు నిష్పత్తి కేవలం 30 శాతం మాత్రమే ఉండటం గమనార్హం. ఈ భారీ లక్ష్యాన్ని నిర్దేశిత సమయానికి చేరుకోవాలంటే ప్రభుత్వ రంగ పాఠశాలలతో పాటు ప్రైవేటు విద్యాసంస్థల స్థాపనను కూడా పెద్ద ఎత్తున ప్రోత్సహించాల్సిన ఆవశ్యకత ఉందని కేంద్రం గట్టిగా విశ్వసిస్తోంది.
**రాష్ట్రాల అధికారులతో నీతి ఆయోగ్‌ మథనం**
ప్రైవేటు బడుల స్థాపనలో క్షేత్రస్థాయిలో ఎదురవుతున్న ఇబ్బందులను తెలుసుకునేందుకు నీతి ఆయోగ్‌ ఇటీవల అన్ని రాష్ట్రాల విద్యాశాఖ ఉన్నతాధికారులతో ఆన్‌లైన్ వేదికగా (వర్చువల్) సుదీర్ఘ సమీక్షా సమావేశం నిర్వహించింది. ఒక ప్రైవేటు పాఠశాలను నెలకొల్పాలంటే రాష్ట్రాల విద్యాశాఖతో పాటు ఫైర్, పోలీస్, రోడ్లు-భవనాలు, మున్సిపల్ తదితర ఎన్ని శాఖల నుంచి నిరభ్యంతర పత్రాలు (ఎన్ఓసీ) పొందాలి, ఎంత స్థలం ఉండాలి వంటి కీలక వివరాలను అడిగి తెలుసుకుంది. ప్రస్తుతం దేశవ్యాప్తంగా మొత్తం 14.72 లక్షల పాఠశాలలు ఉండగా, అందులో ప్రైవేటు బడుల వాటా కేవలం 23 శాతంగా ఉందని, ఈ సంఖ్యను మరింత పెంచేందుకు నిబంధనల సడలింపు అనివార్యమని అధికారులు ఈ సమావేశంలో చర్చించారు.
**అనవసర నిబంధనలకు చెక్‌ పెట్టే యోచన**
కొత్తగా పాఠశాల ఏర్పాటుకు అనుమతులు మంజూరు చేసే ప్రక్రియలో ఉన్నటువంటి కాలంచెల్లిన, అనవసరమైన నిబంధనలను, సర్టిఫికెట్ల నిబంధనలను తక్షణమే తొలగించాలని నీతి ఆయోగ్‌ అభిప్రాయపడింది. పాఠశాల స్థాపనకు దరఖాస్తు చేసినప్పుడు ఎండోమెంట్ ఫండ్ కింద పోస్టాఫీసులో రూ.25 వేల నుంచి రూ.50 వేల వరకు నిర్ణీత రుసుము డిపాజిట్ చేయాలన్న పాత నిబంధనలు రాష్ట్రాల్లో అమలవుతున్నాయి. అనుమతుల దశలోనే ఇలాంటి కఠిన ఆంక్షలు విధించడం కంటే, పాఠశాల ప్రారంభమైన తర్వాత వారు విద్యాపరమైన ప్రమాణాలతో పాటు మౌలిక వసతులు, భద్రతా నిబంధనలను గాలికొదిలేయకుండా సరిగ్గా పాటిస్తున్నారా లేదా అన్నదానిపై నిఘా పెంచడం అత్యంత ముఖ్యమని నీతి ఆయోగ్ స్పష్టం చేసింది.
**తెలంగాణ విద్యాశాఖకు ప్రత్యేక ప్రశంసలు**
పాఠశాలల ఏర్పాటు నిబంధనల సడలింపు విషయంలో తెలంగాణ రాష్ట్ర విద్యాశాఖ తీసుకున్న ముందస్తు అనుకూల నిర్ణయాలపై నీతి ఆయోగ్ ప్రతినిధులు ప్రత్యేకంగా ప్రశంసల జల్లు కురిపించారు. రాష్ట్రంలో ప్రైవేటు బడి పెట్టాలంటే కనీసం 1000 చదరపు మీటర్ల క్రీడా స్థలం (ప్లే గ్రౌండ్) ఉండాలి. అయితే, యాజమాన్యాలకు సొంత స్థలం లేకపోయినా, స్థానిక గ్రామపంచాయతీలు, మున్సిపాలిటీలు లేదా జీహెచ్ఎంసీల నుంచి క్రీడా మైదానాలను లీజుకు తీసుకునే అద్భుతమైన వెసులుబాటును రాష్ట్ర ప్రభుత్వం కల్పించింది. దానికితోడు పాఠశాల భవన ఏర్పాటుకు కచ్చితంగా ఇంత విస్తీర్ణంలోనే స్థలం ఉండాలన్న కఠిన నిబంధన ఏదీ లేకపోవడాన్ని కేంద్ర అధికారులు స్వాగతించారు. అన్ని రాష్ట్రాల నిబంధనలను క్రోడీకరించిన తర్వాత నీతి ఆయోగ్ త్వరలోనే కేంద్ర ప్రభుత్వానికి తుది సిఫార్సుల నివేదికను సమర్పించనుంది.
**వెబ్‌సైట్‌లో గుర్తింపు పొందిన పాఠశాలల జాబితా**
విద్యా సంవత్సరం ప్రారంభం కానున్న నేపథ్యంలో అడ్మిషన్ల సమయంలో తల్లిదండ్రులకు ఎలాంటి గందరగోళం లేకుండా తెలంగాణ పాఠశాల విద్యాశాఖ కీలక నిర్ణయం తీసుకుంది. రాష్ట్రంలో ప్రభుత్వ గుర్తింపు పొందిన ప్రైవేట్‌ స్కూళ్ల పూర్తి జాబితాను తమ అధికారిక వెబ్‌సైట్ www.schooledu.telangana.gov.in లో ప్రజలకు అందుబాటులో ఉంచింది. స్టేట్ బోర్డుతో పాటు సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్‌ఈ), ఐసీఎస్‌ఈ, ఐబీలకు అనుబంధంగా జిల్లాలు, మండలాల వారీగా ఉన్న బడుల పేర్లు, ఏర్పాటు చేసిన సంవత్సరం, చిరునామా తదితర సమగ్ర వివరాలను అందులో పొందుపరిచింది. త్వరలోనే ఈ పాఠశాలల గుర్తింపు గడువు వివరాలను సైతం అప్‌డేట్ చేస్తామని, తల్లిదండ్రులు వెబ్‌సైట్లో జాబితాను నిశితంగా పరిశీలించి, ప్రభుత్వ గుర్తింపు ఉన్న పాఠశాలల్లోనే తమ పిల్లలను చేర్పించాలని పాఠశాల విద్యాశాఖ డైరెక్టర్‌ నవీన్‌ నికోలస్‌ సూచించారు.