దళపతికి ‘త్రిష’ గండం..
* రాజకీయాల్లో ఎంట్రీ ఇస్తే టీవీకేకు పతనమేనా?
* గ్లామర్ పాలిటిక్స్తో ముప్పే..
* తిరుచ్చి ఈస్ట్ బరిలో త్రిష ప్రచారంపై భగ్గుమంటున్న క్యాడర్!
* ప్రజల తీర్పును అపహాస్యం చేయొద్దని హెచ్చరికలు.
* ప్రత్యామ్నాయంగా వచ్చారా? సన్నిహితుల కోసమా?.
హైదరాబాద్, మహా.
తమిళనాడు రాజకీయాల్లో ఇప్పుడు ‘త్రిష’ పేరు పెను సంచలనంగా మారింది. అసెంబ్లీ ఎన్నికల్లో అఖండ విజయం సాధించి, ముఖ్యమంత్రి పీఠం దిశగా అడుగులు వేస్తున్న దళపతి విజయ్కు ఊహించని రాజకీయ గండం పొంచి ఉందన్న వాదనలు బలంగా వినిపిస్తున్నాయి. విజయ్ స్వయంగా గెలుపొందిన రెండు స్థానాల్లో ఒకటైన తిరుచ్చి ఈస్ట్ నుంచి ప్రముఖ నటి త్రిషను ఉప ఎన్నికల్లో బరిలోకి దించుతారనే ప్రచారం సోషల్ మీడియాలో దావానలంలా వ్యాపించింది. వెండితెరపై ఒక బ్లాక్ బస్టర్ హిట్ కొట్టిన తర్వాత వచ్చే విజయ గర్వాన్ని.. రాజకీయాల్లోనూ ప్రదర్శిస్తే అది పతనాన్ని శాసిస్తుందని, విజయ్కు ఇప్పుడు త్రిష రూపంలో అదే మొదటి గండం ఎదురుకాబోతోందని రాజకీయ విశ్లేషకులు తీవ్ర హెచ్చరికలు జారీ చేస్తున్నారు.
విజయ్ వ్యక్తిగత జీవితంలో గతంలో ఎన్ని వివాదాలు, సమస్యలు ఎదురైనప్పటికీ.. తమిళ ప్రజలు వాటన్నింటినీ పక్కనపెట్టి ఆయన నాయకత్వానికి, ఆశయాలకు బ్రహ్మరథం పట్టారు. అయితే, ఇప్పుడు అదే ప్రజల నమ్మకాన్ని వమ్ము చేస్తూ త్రిషను ప్రత్యక్ష రాజకీయాల్లోకి తీసుకువచ్చి, పార్టీలో ఆమెను ఒక పవర్ సెంటర్గా మార్చాలని చూస్తే మాత్రం ప్రజా వ్యతిరేకత తీవ్ర స్థాయిలో ఉండే ప్రమాదం ఉంది. గతంలో బీజేపీ నేత నైనార్ నాగేంద్రన్ త్రిషను ఉద్దేశించి వ్యక్తిగత వ్యాఖ్యలు చేసినప్పుడు తీవ్ర దుమారం రేగింది. ఆ సమయంలో త్రిషకు ప్రజల నుంచి సానుభూతి, మద్దతు లభించిన మాట వాస్తవమే అయినా.. దానిని ఆసరాగా చేసుకుని ఆమెను రాజకీయంగా ప్రమోట్ చేస్తే మాత్రం బొక్కబోర్లా పడటం ఖాయమని సీనియర్లు కుండబద్దలు కొడుతున్నారు. వ్యక్తిగత జీవితానికి, బహిరంగ రాజకీయ జీవితానికి మధ్య ఉన్న సన్నని గీతను విజయ్ చెరిపేయకూడదని స్పష్టం చేస్తున్నారు.
రాజకీయంగా అత్యంత చైతన్యం ఉన్న ప్రాంతం తిరుచ్చి ఈస్ట్ నియోజకవర్గం. దళపతి విజయ్ స్వయంగా బరిలో నిలవడం వల్లే ఆ నియోజకవర్గ ప్రజలు ఆయనపై అపారమైన నమ్మకంతో భారీ మెజార్టీ కట్టబెట్టారు. అంతటి ప్రతిష్టాత్మకమైన స్థానాన్ని ఇప్పుడు త్రిషకు అప్పగిస్తే, స్థానిక నాయకత్వంలో అగ్నిపర్వతం బద్దలవ్వడం ఖాయం. రాజకీయాల్లో నైతికత, నిబద్ధతకు పెద్దపీట వేసే తమిళ ఓటర్లు.. త్రిష లాంటి సెలబ్రిటీలను కేవలం స్టార్ క్యాంపెయినర్లుగా చూడటానికే ఇష్టపడతారు తప్ప, తమ తలరాతలు మార్చే శాసనసభ్యురాలిగా అంగీకరిస్తారా అన్నది మిలియన్ డాలర్ల ప్రశ్న. ఈ గ్లామర్ ప్రయోగం ఏమాత్రం విఫలమైనా.. అది కేవలం ఒక సీటు ఓటమిగా మాత్రమే మిగిలిపోదు, దళపతి విజయ్ రాజకీయ పతనానికి తొలి మెట్టుగా మారుతుందని రాజకీయ వర్గాలు విశ్లేషిస్తున్నాయి.
దశాబ్దాలుగా పాలిస్తున్న ద్రావిడ పార్టీలకు ఒక బలమైన ప్రత్యామ్నాయంగా టీవీకే ఆవిర్భవించిందని ప్రజలు నమ్మారు. కానీ, ఇప్పుడు అదే ద్రావిడ పార్టీల తరహాలో తన సన్నిహితులకు రాజకీయ ప్రాధాన్యత కల్పిస్తే.. విజయ్కు, ఇతర నేతలకు పెద్దగా తేడా ఏముందన్న ప్రశ్న తలెత్తుతుంది. ప్రజలు తనపై ఉంచిన అచంచలమైన నమ్మకాన్ని గ్లామర్ పాలిటిక్స్తో ముడిపెట్టనని విజయ్ నిరూపించుకోవాల్సిన సమయం ఆసన్నమైంది. మరోవైపు, తాను రాజకీయాలకు దూరంగా ఉంటానని త్రిష ఇప్పటికే స్పష్టం చేసినప్పటికీ, ఈ తరహా ప్రచారం ఏమాత్రం ఆగకపోవడం వెనుక పార్టీలోని అంతర్గత శక్తుల హస్తం ఉందనే అనుమానాలు సైతం వ్యక్తమవుతున్నాయి. ప్రజా తీర్పును అగౌరవపరచకుండా విజయ్ వెంటనే అప్రమత్తమై ఈ పుకార్లకు చెక్ పెట్టకపోతే.. పార్టీకి తీరని నష్టం వాటిల్లడం ఖాయంగా కనిపిస్తోంది.
