ఎట్టకేలకు ముగిసిన హైడ్రామా.
* పోలీసుల ఎదుట లొంగిపోయిన బండి భగీరథ్!
* న్యాయపరమైన దారులన్నీ మూసుకుపోవడంతో పేట్బషీరాబాద్ పీఎస్లో సరెండర్.
* హైకోర్టులో దక్కని ఊరట.. ‘పోక్సో’ ఉచ్చులో కేంద్ర మంత్రి తనయుడు.
* దొరికిపోవడం కంటే లొంగిపోవడమే మేలని నిర్ణయం.
* పోలీసుల ‘సాఫ్ట్ అప్రోచ్’ తీరుపై తీవ్ర విమర్శలు.
* తదుపరి రిమాండ్కు ఏర్పాట్లు.
హైదరాబాద్, మహా.
రాష్ట్ర రాజకీయాల్లో గత కొన్ని రోజులుగా తీవ్ర ఉత్కంఠ రేపుతున్న కేంద్ర హోంశాఖ సహాయ మంత్రి బండి సంజయ్ కుమారుడు బండి సాయి భగీరథ్ వ్యవహారం ఎట్టకేలకు ఓ కొలిక్కి వచ్చింది. మైనర్ బాలికపై లైంగిక వేధింపుల ఆరోపణలతో పోక్సో కేసు ఎదుర్కొంటున్న భగీరథ్, ఎట్టకేలకు పోలీసుల ఎదుట లొంగిపోయారు. శనివారం ఆయన నేరుగా కేసు నమోదైన పేట్బషీరాబాద్ పోలీస్ స్టేషన్కు చేరుకుని సరెండర్ కావడంతో, అజ్ఞాతంలో ఉన్న ఆయన చుట్టూ అల్లుకున్న హైడ్రామాకు తెరపడింది. అరెస్టు నుంచి తప్పించుకునేందుకు అన్ని మార్గాలు వెతికినప్పటికీ, చట్టపరంగా లీగల్ రక్షణ దొరికే దారులన్నీ మూసుకుపోవడంతో ఆయనకు జైలు జీవితం తప్పనిసరి అయింది.
**హైకోర్టులో గట్టి ఎదురుదెబ్బ.. కన్ఫర్మ్ అయిన మైనర్ రికార్డులు**
భగీరథ్ లొంగుబాటుకు ప్రధాన కారణం న్యాయస్థానంలో ఎదురైన చుక్కెదురేనని స్పష్టమవుతోంది. ముందస్తు బెయిల్ లేదా అరెస్టు నుంచి రక్షణ కల్పించాలని కోరుతూ ఆయన దాఖలు చేసిన పిటిషన్పై శుక్రవారం అర్ధరాత్రి వరకు హైకోర్టు వెకేషన్ బెంచ్ సుదీర్ఘంగా విచారణ జరిపింది. దర్యాప్తు ప్రాథమిక దశలో ఉందని, ఈ సమయంలో కేసులో జోక్యం చేసుకోలేమని కోర్టు తేల్చిచెప్పింది. ఎలాంటి అరెస్ట్ స్టే ఇచ్చేందుకు న్యాయమూర్తి నిరాకరించారు. దీనికి తోడు, బాధితురాలి వయస్సుకు సంబంధించిన అధికారిక రికార్డులను పరిశీలించగా, ఆమె మైనర్ అని పక్కాగా నిర్ధారణ కావడంతో భగీరథ్ మెడకు పోక్సో ఉచ్చు మరింత గట్టిగా బిగుసుకుంది. తీవ్రమైన, నాన్-బెయిలబుల్ సెక్షన్ల కింద కేసు నమోదు కావడంతో పోలీసులకు దొరికిపోయి అరెస్టయ్యే కన్నా, గౌరవప్రదంగా వెళ్లి లొంగిపోవడమే ఉత్తమమని భావించిన నిందితుడు ఈ నిర్ణయం తీసుకున్నట్లు తెలుస్తోంది.
**పోలీసుల తీరుపై అనుమానాలు.. వీఐపీ ట్రీట్మెంట్ దక్కిందా?**
కేంద్ర మంత్రి కుమారుడు కావడంతో ఈ కేసులో సైబరాబాద్ పోలీసుల వ్యవహారశైలి తీవ్ర విమర్శలకు తావిస్తోంది. భగీరథ్ అజ్ఞాతంలోకి వెళ్లగానే ఆయన కోసం ఏకంగా ఐదు ప్రత్యేక బృందాలను ఏర్పాటు చేశామని, దేశం దాటి పోకుండా లుక్-అవుట్ సర్క్యులర్ సైతం జారీ చేశామని పోలీసులు హడావిడి చేశారు. ఆ ప్రకటన చేసిన కొద్ది గంటల్లోనే ఆయన నేరుగా స్టేషన్కు నడిచుకుంటూ వచ్చి సరెండర్ కావడం వెనుక పోలీసుల ‘సాఫ్ట్ అప్రోచ్’ స్పష్టంగా కనిపిస్తోందని విశ్లేషకులు అభిప్రాయపడుతున్నారు. నేరస్తుల లొకేషన్ ట్రేసింగ్, కాల్ డేటా రికార్డ్స్ విశ్లేషణలో రాష్ట్ర పోలీసులు అత్యంత అడ్వాన్స్డ్గా ఉన్నప్పటికీ.. భగీరథ్ను నేరుగా పట్టుకోకుండా కేవలం పైపైనే వెతికినట్లు నటించారనే ఆరోపణలు వినిపిస్తున్నాయి. ఆయన స్వయంగా వచ్చి లొంగిపోయేందుకే పోలీసులు తెరవెనుక సమయం ఇచ్చారన్న వాదనలు బలంగా బలంగా వినిపిస్తున్నాయి.
**బేఖాతరైన ‘హనీట్రాప్’ వాదన.. ఇక రిమాండ్కే..**
పోక్సో కేసు నమోదు కాగానే, తమ కుమారుడిని ఇరికించారని, రూ. 5 కోట్లు డిమాండ్ చేస్తూ ఎదురు పార్టీ ‘హనీట్రాప్’ చేసి బ్లాక్మెయిల్కు పాల్పడుతోందని నిందితుల వర్గం తీవ్రంగా వాదించింది. అయితే, చట్టం ముందు ఈ వాదనలు ఏమాత్రం నిలబడలేదు. బాధితురాలు మైనర్ అని తేలడంతో, పోక్సో చట్టం ప్రకారం పరస్పర అంగీకారం అనే వాదనకు కోర్టుల్లో ఏమాత్రం తావుండదు. చట్టం తన పని తాను చేసుకుపోతుండటంతో, నిందితుడి వర్గం చేసిన ఎదురుదాడి ప్రయత్నాలు బెడిసికొట్టాయి. లొంగిపోయిన బండి భగీరథ్ను అదుపులోకి తీసుకున్న పేట్బషీరాబాద్ పోలీసులు, నిబంధనల ప్రకారం ఆయనకు వైద్య పరీక్షలు నిర్వహించి, కోర్టు ముందు హాజరుపరిచి రిమాండ్కు తరలించేందుకు ముమ్మర ఏర్పాట్లు చేస్తున్నారు.
