నేడు టీఎంసీ భారీ ఆందోళనలు….

నేడు టీఎంసీ భారీ ఆందోళనలు.
* కాళీఘాట్ భేటీలో మమతా బెనర్జీ తీవ్ర ఆగ్రహం.
* అభిషేక్ బెనర్జీపై కేసు నమోదు.
* హైకోర్టును ఆశ్రయించిన తృణమూల్.
కోల్‌కతా,మహా.
పశ్చిమ బంగాల్‌లో ఇటీవల జరిగిన అసెంబ్లీ ఎన్నికల అనంతరం రాజకీయ పరిణామాలు శరవేగంగా మారుతున్నాయి. రాష్ట్రంలో కొత్తగా అధికారంలోకి వచ్చిన బీజేపీ ప్రభుత్వం అవలంబిస్తున్న ‘బుల్డోజర్ సంస్కృతి’కి వ్యతిరేకంగా గురువారం కోల్‌కతా వ్యాప్తంగా భారీ ఆందోళనలు చేపట్టనున్నట్లు అఖిల భారత తృణమూల్ కాంగ్రెస్ (ఏఐటీసీ) ప్రకటించింది. బీజేపీ సర్కార్ బాధ్యతలు చేపట్టిన నాటి నుంచి వీధి వ్యాపారులను బలవంతంగా ఖాళీ చేయిస్తోందని, నిరుపేదలు, మైనార్టీ వర్గాలనే లక్ష్యంగా చేసుకుని వేధింపులకు గురిచేస్తోందని టీఎంసీ ఆరోపించింది. ఈ అప్రజాస్వామిక చర్యలను నిరసిస్తూ మహానగరంలోని హౌరా స్టేషన్, శీల్దా స్టేషన్, బాలిగంజ్ తదితర కీలక ప్రాంతాల్లో పార్టీ శ్రేణులు, నాయకులు పెద్ద ఎత్తున నిరసన ప్రదర్శనలు నిర్వహించనున్నారు.
ఈ ఆందోళనల నేపథ్యంలో మంగళవారం కాళీఘాట్‌లో జరిగిన టీఎంసీ ఎమ్మెల్యేల అత్యవసర సమావేశంలో పార్టీ అధినేత్రి మమతా బెనర్జీ, కొత్త ప్రభుత్వంపై తీవ్రస్థాయిలో విరుచుకుపడ్డారు. మైనార్టీ వర్గాల ఉనికిని దెబ్బతీస్తూ, పేద వ్యాపారుల పొట్టకొడుతూ బుల్డోజర్లతో దుకాణాలను కూల్చివేయడం దుర్మార్గమని ఆమె మండిపడ్డారు. ఈ తరహా చర్యలతో బీజేపీ రాజ్యాంగ విలువలను పూర్తిగా కాలరాస్తోందని, రాబోయే రోజుల్లో కేంద్రంలో కూడా ఆ పార్టీ అధికారాన్ని కోల్పోవడం ఖాయమని జోస్యం చెప్పారు. పార్టీ ప్రధాన కార్యదర్శి అభిషేక్ బెనర్జీ సైతం ప్రభుత్వ తీరును తీవ్రంగా ఖండించారు. తన ఇల్లు కూల్చినా, ఎలాంటి నోటీసులు ఇచ్చినా భయపడే ప్రసక్తే లేదని, ఎన్నికల్లో ఓటమి పాలైనంత మాత్రాన వెనకడుగు వేయకుండా ప్రజాపక్షాన నిలబడి బీజేపీపై రాజకీయ పోరాటాన్ని కొనసాగిస్తామని స్పష్టం చేశారు.
**అభిషేక్ బెనర్జీపై సైబర్ క్రైమ్ కేసు నమోదు**
మరోవైపు టీఎంసీ అగ్రనేత అభిషేక్ బెనర్జీ చుట్టూ న్యాయపరమైన ఉచ్చు బిగుస్తోంది. అసెంబ్లీ ఎన్నికల ప్రచారంలో భాగంగా మహేశ్తల, ఆరాంబాఘ్, హరింఘాటా, నందిగ్రామ్ ప్రాంతాల్లో నిర్వహించిన బహిరంగ సభల్లో ఆయన చేసిన ప్రసంగాలు హింసను ప్రేరేపించేలా ఉన్నాయంటూ బిధాన్‌నగర్ నార్త్ సైబర్ క్రైమ్ పోలీస్ స్టేషన్‌లో ఎఫ్‌ఐఆర్ నమోదైంది. కేంద్ర హోంమంత్రి అమిత్ షాను ఉద్దేశించి చేసిన వ్యాఖ్యలతో పాటు ప్రజాశాంతికి భంగం కలిగించేలా బెదిరింపు ధోరణిలో మాట్లాడారంటూ రాజీబ్ సర్కార్ అనే వ్యక్తి ఇచ్చిన ఫిర్యాదు మేరకు పోలీసులు ఈ చర్యలు చేపట్టారు. అభిషేక్ అధికారిక ఫేస్‌బుక్ తదితర సోషల్ మీడియా వేదికల ద్వారా ఈ ప్రసంగాలు ప్రచారమయ్యాయని ఫిర్యాదులో పేర్కొనడంతో, భారతీయ న్యాయ సంహిత (BNS), ప్రజాప్రతినిధుల చట్టం కింద పోలీసులు కేసు నమోదు చేశారు.
**ఎన్నికల అనంతర హింసపై కలకత్తా హైకోర్టుకు మమత**
రాష్ట్రంలో ఎన్నికల ఫలితాలు విడుదలైనప్పటి నుంచి క్షేత్రస్థాయిలో హింసాత్మక ఘటనలు చోటుచేసుకుంటున్నాయని, దీనిపై న్యాయపోరాటం చేస్తామని టీఎంసీ ప్రకటించింది. కోల్‌కతా, హౌరాతో పాటు పలు జిల్లాల్లోని తమ పార్టీ కార్యాలయాలపై దాడులు జరుగుతున్నాయని, కార్యకర్తల ఇళ్లను ధ్వంసం చేస్తూ అగ్నిప్రమాదాలకు పాల్పడుతున్నారని ఆరోపిస్తూ తృణమూల్ కాంగ్రెస్ కలకత్తా హైకోర్టును ఆశ్రయించింది. బాధితులకు తక్షణ రక్షణ కల్పించి, ఈ దాడులపై కోర్టు పర్యవేక్షణలో సమగ్ర దర్యాప్తు జరపాలని డిమాండ్ చేసింది. ఇందులో భాగంగానే మే 14న మమతా బెనర్జీ స్వయంగా న్యాయవాది దుస్తులు ధరించి కలకత్తా హైకోర్టు ప్రధాన న్యాయమూర్తి జస్టిస్ హెచ్.సి. సుజోయ్ పాల్ ధర్మాసనం ఎదుట హాజరై విచారణలో పాల్గొనడం గమనార్హం.
ఇటీవల ముగిసిన బంగాల్ అసెంబ్లీ ఎన్నికల్లో మొత్తం 294 స్థానాలకు గాను బీజేపీ 207 సీట్ల భారీ మెజారిటీతో ఘనవిజయం సాధించి అధికార పీఠాన్ని దక్కించుకోగా.. దశాబ్ద కాలానికి పైగా పాలించిన తృణమూల్ కాంగ్రెస్ కేవలం 80 స్థానాలకే పరిమితమై ప్రతిపక్ష స్థానంలో నిలిచింది. స్వయంగా ముఖ్యమంత్రిగా ఉన్న మమతా బెనర్జీ సైతం తన సొంత నియోజకవర్గమైన భవానీపూర్‌లో బీజేపీ నేత సువేందు అధికారి చేతిలో పరాజయం పాలైన సంగతి తెలిసిందే. ఈ నేపథ్యంలో పాత, కొత్త ప్రభుత్వాల మధ్య సాగుతున్న ఈ ఘర్షణ వాతావరణం బంగాల్ రాజకీయాన్ని మరింత వేడెక్కిస్తోంది.