హైదరాబాద్‌ మెట్రో రెండో దశకు కేంద్రం గ్రీన్‌సిగ్నల్…

హైదరాబాద్‌ మెట్రో రెండో దశకు కేంద్రం గ్రీన్‌సిగ్నల్.
* 50 శాతం నిధులు ఇచ్చేందుకు ఖట్టర్ సుముఖత.
*మూసీ ప్రక్షాళనకు ‘అమృత్ 2.0’ కింద రూ.3,975 కోట్లతో 39 ఎస్టీపీలు మంజూరు.
* దిల్లీ సమీక్షలో కేంద్ర మంత్రులు.
ఢిల్లీ, మహా.
భాగ్యనగర రవాణా ముఖచిత్రాన్ని మార్చే హైదరాబాద్‌ మెట్రో రైల్‌ రెండో దశ విస్తరణ ప్రాజెక్టుకు సంబంధించి ఒక కీలక ముందడుగు పడింది. కేంద్ర, రాష్ట్ర ప్రభుత్వాలు చెరో 50 శాతం చొప్పున నిధులను భరించే వ్యయ ప్రాతిపదికన ఈ ప్రాజెక్టుతో ముందుకెళ్లేందుకు తాము సిద్ధంగా ఉన్నామని కేంద్ర పట్టణాభివృద్ధి శాఖ మంత్రి మనోహర్‌ లాల్ ఖట్టర్‌ ప్రకటించారు. దేశ రాజధాని దిల్లీలో హైదరాబాద్ నగరంలో ప్రజా రవాణా, పారిశుద్ధ్యం, మౌలిక వసతుల ప్రాజెక్టులపై కేంద్ర మంత్రులు మనోహర్‌లాల్ ఖట్టర్‌, జి. కిషన్‌రెడ్డి ఉన్నత స్థాయి సమీక్ష నిర్వహించారు. ఈ సమావేశానికి సంబంధించిన ముఖ్యాంశాలను కేంద్రమంత్రి కిషన్‌రెడ్డి సామాజిక మాధ్యమం ‘ఎక్స్’ (ట్విట్టర్) వేదికగా వెల్లడించారు.
ఇటీవలే రాష్ట్ర ప్రభుత్వం ఎల్ అండ్‌ టీ సంస్థ నుంచి హైదరాబాద్ మెట్రో రైల్‌ను టేకోవర్ చేసుకున్న నేపథ్యంలో, రెండో దశ విస్తరణపై ఈ సమావేశంలో సుదీర్ఘంగా చర్చించారు. రాష్ట్ర ప్రభుత్వం ఇప్పటికే సుమారు 162 కిలోమీటర్ల మేర మెట్రో రెండో దశ విస్తరణకు సంబంధించిన ప్రతిపాదనలను కేంద్రానికి సమర్పించిందని మంత్రులు తెలిపారు. ఈ ప్రాజెక్టుకు సంబంధించిన డీటైల్డ్ ప్రాజెక్ట్ రిపోర్ట్ (డీపీఆర్)తో పాటు ఇతర సాంకేతిక వివరాలు అందిన తర్వాత కేంద్ర ప్రభుత్వం వాటిని సమగ్రంగా పరిశీలించి తదుపరి తుది నిర్ణయం తీసుకుంటుందని ఖట్టర్ స్పష్టం చేశారు. హైదరాబాద్ మెట్రో రెండో దశను చేపట్టేందుకు కేంద్ర ప్రభుత్వానికి ఎలాంటి ఇబ్బంది లేదని, నగర ప్రజల సౌకర్యార్థం ఈ ప్రాజెక్టుకు పూర్తి సానుకూలతతో ఉన్నామని ఆయన భరోసా ఇచ్చారు.
మెట్రో విస్తరణతో పాటు హైదరాబాద్‌లో అత్యంత ప్రతిష్టాత్మకమైన మూసీ నది ప్రక్షాళనపైనా ఈ సమావేశంలో కేంద్ర మంత్రులు ప్రత్యేకంగా చర్చించారు. మూసీ నది పునరుజ్జీవనానికి కేంద్ర ప్రభుత్వం పూర్తి స్థాయిలో సహకరిస్తుందని ఖట్టర్ స్పష్టం చేశారు. ఇందులో భాగంగానే కేంద్ర ప్రభుత్వ ‘అమృత్ 2.0’ పథకం కింద మూసీ నదిలోకి చేరుతున్న మురుగు నీటిని శుద్ధి చేసేందుకు రూ.3,975 కోట్ల భారీ వ్యయంతో మొత్తం 39 సీవేజ్ ట్రీట్‌మెంట్ ప్లాంట్లను (ఎస్టీపీ) మంజూరు చేసినట్లు వెల్లడించారు. ఈ నూతన 39 ఎస్టీపీల ఏర్పాటు ద్వారా ప్రతిరోజూ దాదాపు 972 మిలియన్ లీటర్ల మురుగు నీటిని శుద్ధి చేసే సామర్థ్యం లభిస్తుందని, దీనివల్ల మురికి నీరు నేరుగా మూసీలో కలవకుండా నిరోధించవచ్చని పేర్కొన్నారు. ఈ ప్రాజెక్టు నగర పారిశుద్ధ్యాన్ని మెరుగుపరచడమే కాకుండా మూసీ నది పరిరక్షణకు ఎంతో దోహదం చేస్తుందని వివరించారు. మహానగర సమగ్ర అభివృద్ధికి కేంద్రం నిరంతరం కట్టుబడి ఉంటుందని స్పష్టం చేసినందుకు గానూ, హైదరాబాద్ ప్రజల తరఫున కేంద్రమంత్రి కిషన్‌రెడ్డి ఈ సందర్భంగా మంత్రి ఖట్టర్‌కు ప్రత్యేక కృతజ్ఞతలు తెలిపారు.