కులగణనకు సుప్రీంకోర్టు గ్రీన్‌ సిగ్నల్‌….

కులగణనకు సుప్రీంకోర్టు గ్రీన్‌ సిగ్నల్‌.
* వ్యతిరేక పిటిషన్‌ కొట్టివేత.
* వెనుకబడిన వర్గాల జనాభా తెలిస్తేనే సమగ్ర అభివృద్ధి.
* విధానపరమైన నిర్ణయాల్లో జోక్యం చేసుకోలేమన్న అత్యున్నత న్యాయస్థానం.
ఢిల్లీ, మహా.
దేశవ్యాప్తంగా తీవ్ర చర్చనీయాంశంగా మారిన కులగణన ప్రక్రియకు సుప్రీంకోర్టు స్పష్టమైన మద్దతు పలికింది. కులగణనను నిలిపివేయాలని, దానిని వ్యతిరేకిస్తూ దాఖలైన పిటిషన్‌ను అత్యున్నత న్యాయస్థానం బుధవారం కొట్టివేసింది. సమాజంలోని వెనుకబడిన వర్గాల జనాభా లెక్కలు కచ్చితంగా తెలిస్తేనే దేశ సమగ్ర అభివృద్ధి సాధ్యమవుతుందని ధర్మాసనం ఈ సందర్భంగా అత్యంత కీలక వ్యాఖ్యలు చేసింది. జనాభా గణన, కులాల వారీగా లెక్కల సేకరణ అనేది పూర్తిగా ప్రభుత్వ విధానపరమైన (పాలసీ) నిర్ణయమని, ఇలాంటి పాలనాపరమైన నిర్ణయాల్లో న్యాయస్థానం జోక్యం చేసుకోబోదని సుప్రీంకోర్టు విచారణ సందర్భంగా తేల్చిచెప్పింది.
దేశంలో వెనుకబడిన కులాల జనాభా వాస్తవంగా ఎంత ఉందో తెలుసుకోవాల్సిన అవసరం ప్రభుత్వాలకు ఎంతైనా ఉందని ధర్మాసనం అభిప్రాయపడింది. సంక్షేమ పథకాలు క్షేత్రస్థాయిలో నిజమైన లబ్ధిదారులకు, అట్టడుగు వర్గాలకు చేరాలంటే వారి సంఖ్యాబలం, సామాజిక, ఆర్థిక పరిస్థితులపై ప్రభుత్వాల వద్ద కచ్చితమైన, శాస్త్రీయమైన డేటా ఉండటం ఆవశ్యకమని స్పష్టం చేసింది. కులగణన చేపట్టడం వల్ల సామాజిక అసమానతలు పెరుగుతాయన్న పిటిషనర్ల వాదనను తోసిపుచ్చిన న్యాయస్థానం.. సామాజిక న్యాయం సాధించే క్రమంలో వనరుల పంపిణీకి ఈ గణాంకాలు ప్రభుత్వాలకు దిక్సూచిలా పనిచేస్తాయని పరోక్షంగా పేర్కొంది. రాజ్యాంగబద్ధంగా ప్రభుత్వాలకు ఉన్న అధికారాలను అడ్డుకోలేమని స్పష్టం చేస్తూ, ఈ మేరకు దాఖలైన పిటిషన్‌ను డిస్మిస్ చేసింది. సుప్రీంకోర్టు ఇచ్చిన ఈ తాజా తీర్పుతో కులగణన చేపట్టేందుకు వివిధ రాష్ట్ర ప్రభుత్వాలకు ఉన్న న్యాయపరమైన అడ్డంకులు పూర్తిగా తొలగిపోయినట్లయింది.