గ్రీన్ రైల్వేస్ దిశగా చరిత్రాత్మక అడుగు…

గ్రీన్ రైల్వేస్ దిశగా చరిత్రాత్మక అడుగు.
* దేశంలో తొలి హైడ్రోజన్ రైలుకు గ్రీన్ సిగ్నల్.
*జింద్-సోనిపట్ మార్గంలో 10 బోగీలతో పరుగులు పెట్టనున్న వినూత్న రైలు.
* గంటకు 75 కిలోమీటర్ల గరిష్ఠ వేగం.
* కేవలం నీటి ఆవిరి మాత్రమే వెలువడే టెక్నాలజీ.
* జింద్‌లో రీఫ్యూయలింగ్ కేంద్రం సిద్ధం.
* ప్రపంచ అగ్రదేశాల సరసన నిలిచిన భారత్.
ఢిల్లీ, మహా.
పర్యావరణ హితమైన, సుస్థిర రవాణా వ్యవస్థే ధ్యేయంగా భారత రైల్వే శాఖ ఒక చరిత్రాత్మక ముందడుగు వేసింది. దేశంలోనే మొట్టమొదటిసారిగా ‘హైడ్రోజన్ ఫ్యూయల్ సెల్’ సాంకేతిక పరిజ్ఞానంతో నడిచే సరికొత్త రైలును ప్రవేశపెట్టేందుకు అధికారికంగా ఆమోదం తెలిపింది. ఉత్తర రైల్వే పరిధిలోని హర్యానా రాష్ట్రంలో గల జింద్-సోనిపట్ మార్గంలో మొత్తం 10 బోగీలతో కూడిన ఈ హైడ్రోజన్ రైలును నడపనున్నట్లు రైల్వే మంత్రిత్వ శాఖ బుధవారం ఒక ప్రకటనలో వెల్లడించింది. ఈ చొరవతో రైల్వే రంగంలో హైడ్రోజన్ టెక్నాలజీని విజయవంతంగా పరీక్షిస్తున్న జర్మనీ, జపాన్, చైనా, అమెరికా వంటి ప్రపంచంలోని అతికొద్ది అగ్రదేశాల సరసన భారతదేశం సగర్వంగా చేరింది.
**కాలుష్యానికి తావులేని వినూత్న సాంకేతికత**
త్వరలోనే పటాల పైకి రానున్న ఈ సరికొత్త హైడ్రోజన్ రైలు గంటకు 75 కిలోమీటర్ల గరిష్ఠ వేగంతో ప్రయాణిస్తుంది. దీని నిర్వహణ కోసం 1,200 కిలోవాట్ల అత్యంత శక్తిమంతమైన సామర్థ్యం గల హైడ్రోజన్ ఫ్యూయల్ సెల్ ప్రొపల్షన్ వ్యవస్థను నిపుణులు రూపొందించారు. ఈ అధునాతన టెక్నాలజీలో హైడ్రోజన్‌ను ఇంధనంగా ఉపయోగించి రైలుకు అవసరమైన విద్యుత్‌ను స్వయంచాలకంగా ఉత్పత్తి చేస్తారు. ఈ రసాయన ప్రక్రియ జరుగుతున్నప్పుడు సైలెన్సర్ ద్వారా పర్యావరణానికి హాని చేసే కర్బన ఉద్గారాలు ఏవీ వెలువడవు, కేవలం స్వచ్ఛమైన నీటి ఆవిరి మాత్రమే బయటకు వస్తుంది. దీనివల్ల సంప్రదాయ డీజిల్ ఇంధనాలతో పోలిస్తే కాలుష్యం అనేది బొత్తిగా ఉండదు. దేశంలో కర్బన ఉద్గారాలను పూర్తిగా తగ్గించి, భారత రైల్వే నిర్దేశించుకున్న ‘నెట్-జీరో’ (శూన్య ఉద్గారాల) లక్ష్యాలను సమర్థవంతంగా చేరుకునేందుకు ఈ ప్రాజెక్టు ఎంతగానో దోహదపడనుంది.
**జింద్‌లో రీఫ్యూయలింగ్ కేంద్రం ఏర్పాటు**
ఈ ప్రతిష్ఠాత్మక పైలట్ ప్రాజెక్టు కోసం రైల్వే శాఖ హర్యానాలోని జింద్-సోనిపట్ మార్గాన్ని ఎంపిక చేసింది. ఈ రైలుకు అవసరమైన హైడ్రోజన్ ఇంధనాన్ని ఎప్పటికప్పుడు నింపేందుకు వీలుగా జింద్‌లో పూర్తిగా స్వదేశీ పరిజ్ఞానంతో అత్యాధునిక రీఫ్యూయలింగ్, నిల్వ కేంద్రాన్ని నిర్మించారు. ఈ కేంద్రంలో అత్యధిక ఒత్తిడితో కూడిన కంప్రెస్డ్ హైడ్రోజన్ గ్యాస్‌ను సురక్షితంగా నిల్వ చేయడానికి, పంపిణీ చేయడానికి వీలుగా కేంద్ర ప్రభుత్వానికి చెందిన ‘పెట్రోలియం అండ్ ఎక్స్‌ప్లోజివ్స్ సేఫ్టీ ఆర్గనైజేషన్’ నుంచి అవసరమైన అన్ని రకాల లైసెన్సులు, అనుమతులు లభించాయి.
**ప్రయాణికుల భద్రతకు అత్యంత ప్రాధాన్యం**
హైడ్రోజన్ ఇంధన వినియోగంలో ప్రయాణికుల రక్షణకు రైల్వే శాఖ అత్యున్నత ప్రాధాన్యత ఇస్తోంది. జింద్‌లోని నూతన రీఫ్యూయలింగ్ కేంద్రంలో అత్యంత సున్నితమైన హైడ్రోజన్ లీక్ డిటెక్టర్లు, ఫ్లేమ్ డిటెక్టర్లతో సహా పలు అధునాతన భద్రతా సెన్సార్లను అధికారులు ఏర్పాటు చేశారు. అలాగే ఈ రైలు రెగ్యులర్ నిర్వహణ (మెయింటెనెన్స్) కోసం ఢిల్లీ పరిధిలోని షకుర్‌బస్తీలో ప్రత్యేకంగా ఒక ఫెసిలిటీ సెంటర్‌ను ఏర్పాటు చేస్తున్నారు. ఇక్కడ కూడా అంతర్జాతీయ స్థాయి కఠినమైన భద్రతా ప్రమాణాలను అమలు చేయనున్నారు. ‘రీసెర్చ్ డిజైన్స్ అండ్ స్టాండర్డ్స్ ఆర్గనైజేషన్’ ఆమోదించిన నిబంధనల ప్రకారమే ఈ రైలు నిర్వహణ జరుగుతుందని, ప్రత్యేక శిక్షణ పొందిన సాంకేతిక సిబ్బంది 24 గంటల పాటు నిరంతరం పర్యవేక్షిస్తారని ప్రభుత్వం స్పష్టం చేసింది. ప్రారంభ దశలో భాగంగా రైలు నడిచే సమయంలో లోపాలను గుర్తించేందుకు ప్రయాణికులతో పాటు ప్రత్యేక సాంకేతిక బృందం కూడా రైలులోనే ప్రయాణించి, దీని ప్రత్యక్ష పనితీరును నిశితంగా పర్యవేక్షించనుంది. ఈ వినూత్న ప్రాజెక్టు ద్వారా ఇంధన సామర్థ్యం, పర్యావరణ హిత రవాణా పట్ల తమకున్న అంకితభావాన్ని భారత రైల్వే చాటుకుంది.