బెంగాల్‌లో మరాఠా సీన్ రిపీట్……

బెంగాల్‌లో మరాఠా సీన్ రిపీట్.
* దీదీకి కోలుకోలేని భారీ దెబ్బ.
* నిలువునా చీలిన తృణమూల్ కాంగ్రెస్.
* 59 మంది ఎమ్మెల్యేల మహా తిరుగుబాటు.
* రెబెల్ నేత రితబ్రత బెనర్జీకే ప్రతిపక్ష నేతగా గుర్తింపునివ్వాలని స్పీకర్‌కు లేఖ.
*అభిషేక్ బెనర్జీ కార్పొరేట్ తీరుపైనే అసమ్మతి అస్త్రం.
* ఢిల్లీ కుట్రే అంటున్న మమత.. పార్టీ కమిటీలన్నీ రద్దు చేస్తూ సంచలన నిర్ణయం.
కలకత్తా, మహా.
పశ్చిమ బెంగాల్ రాజకీయ ముఖచిత్రం ఒక్కసారిగా తీవ్ర కుదుపునకు లోనైంది. మొన్నటి అసెంబ్లీ ఎన్నికల్లో ఎదురైన ఘోర పరాజయం నుంచి తేరుకోకముందే, తృణమూల్ కాంగ్రెస్ (టీఎంసీ) అధినేత్రి మమతా బెనర్జీకి సొంత పార్టీ నేతలే ఊహించని రాజకీయ భూకంపాన్ని సృష్టించారు. ఒకప్పుడు తిరుగులేని రాజకీయ శక్తిగా వెలుగొందిన టీఎంసీ ఇప్పుడు నిలువునా చీలిపోయే ప్రమాదంలో పడింది. మహారాష్ట్రలో ఉద్ధవ్ థాక్రేకు ఏకనాథ్ షిండే ఇచ్చిన ఊహించని షాక్ తరహాలోనే, బెంగాల్‌లో దీదీకి రెబెల్ నేత రితబ్రత బెనర్జీ కోలుకోలేని భారీ దెబ్బ కొట్టారు. ఏకంగా మూడింట రెండు వంతుల మంది ఎమ్మెల్యేలను తనవైపు తిప్పుకుని మమతా బెనర్జీ నాయకత్వానికి నేరుగా సవాల్ విసిరారు.
బుధవారం కోల్‌కతా అసెంబ్లీ సాక్షిగా హైడ్రామా చోటుచేసుకుంది. టీఎంసీకి ఉన్న మొత్తం 80 మంది ఎమ్మెల్యేలలో దాదాపు 59 మంది ప్రతిఘటన బావుటా ఎగురవేశారు. రెబెల్ నేత రితబ్రత బెనర్జీ నేతృత్వంలో వారంతా ఏకతాటిపైకి వచ్చి అసెంబ్లీకి కదం తొక్కారు. తమ శాసనసభాపక్ష నేతగా రితబ్రత బెనర్జీనే ఏకగ్రీవంగా ఎన్నుకున్నామని, అసెంబ్లీలో ఆయనకే ప్రతిపక్ష నేత (LoP) హోదా కల్పించాలని కోరుతూ స్పీకర్ రతీంద్రనాథ్ బోస్‌కు మద్దతు లేఖలు సమర్పించడం రాజకీయ వర్గాల్లో పెను సంచలనంగా మారింది. వాస్తవానికి టీఎంసీ అధిష్టానం సీనియర్ నేత సౌవన్దేబ్ చట్టోపాధ్యాయను ప్రతిపక్ష నేతగా నియమించాలని ప్రతిపాదించింది. కానీ, అంతకుముందే పార్టీ సమర్పించిన లేఖలో తమ సంతకాలను ఫోర్జరీ చేశారని రితబ్రత బెనర్జీ, సందీపన్ సాహా వంటి నేతలు స్పీకర్‌కు ఫిర్యాదు చేయడం, దానిపై ఆగ్రహించిన అధిష్టానం వారిని పార్టీ నుంచి బహిష్కరించడంతో ఈ మహా తిరుగుబాటుకు బీజం పడింది. బహిష్కరణ వేటు పడిన కొద్ది నిమిషాల్లోనే మెజారిటీ ఎమ్మెల్యేలు రెబెల్స్ పక్షాన నిలబడటం దీదీకి మింగుడుపడని పరిణామం.
రెబెల్ వర్గం పక్కా వ్యూహంతోనే ఈ ఆపరేషన్‌కు తెరతీసినట్లు చట్టపరమైన సమీకరణాలను బట్టి స్పష్టమవుతోంది. ఫిరాయింపుల నిరోధక చట్టం ప్రకారం ఎమ్మెల్యేలపై అనర్హత వేటు పడకుండా ఉండాలంటే మొత్తం 80 మందిలో కనీసం 54 మంది (2/3 వంతు) ఎమ్మెల్యేల మద్దతు తప్పనిసరి. ప్రస్తుతం రితబ్రత బెనర్జీ శిబిరంలో 58 నుంచి 59 మంది ఎమ్మెల్యేలు బలంగా పాతుకుపోవడంతో, చట్టపరంగా వారికే ఎలాంటి ఢోకా లేదు. పైగా, “నిజమైన తృణమూల్ కాంగ్రెస్” తమదేనని వాదించేందుకు వారికి పూర్తి బలం దొరికింది. వ్యూహాత్మకంగా రెబెల్స్ సమర్పించిన లేఖలో మమతా బెనర్జీని పార్టీ “చైర్‌పర్సన్” గానే గౌరవించారు. కానీ, వారి అసలు లక్ష్యం మాత్రం పార్టీ యువ నేత అభిషేక్ బెనర్జీయే కావడం గమనార్హం. పార్టీని ఒక కార్పొరేట్ కంపెనీలా మార్చేయాలని ఆయన చేస్తున్న ప్రయత్నాలు, తీసుకుంటున్న ఏకపక్ష నిర్ణయాల వల్లే తాము తిరుగుబాటు బావుటా ఎగురవేయాల్సి వచ్చిందని అసంతృప్త నేతలు కుండబద్దలు కొడుతున్నారు.
కంచుకోట లాంటి సొంత పార్టీలో ముదిరిన ఈ మహా ముసలంపై మమతా బెనర్జీ తీవ్ర ఆగ్రహోదగ్రులయ్యారు. కోల్‌కతా ధర్నా వేదికగా స్పందించిన ఆమె, ఇదంతా ఢిల్లీ వర్గాలు పన్నిన కుట్రగానే అభివర్ణించారు. తమ పార్టీని చీల్చేందుకు జరుగుతున్న ఈ కుతంత్రాలపై రాజీలేని పోరాటం చేస్తామని ప్రకటించారు. పార్టీలో అంతర్గత తిరుగుబాటు శ్రుతిమించడంతో తక్షణ నష్ట నివారణ చర్యలకు ఉపక్రమించారు. పశ్చిమ బెంగాల్‌లోని అన్ని రకాల పార్టీ కమిటీలను, అనుబంధ సంఘాలను తక్షణమే రద్దు చేస్తూ సంచలన నిర్ణయం తీసుకున్నారు. క్షేత్రస్థాయి పరిస్థితులను పరిశీలించిన అనంతరం త్వరలోనే నూతన కమిటీలను పునర్వ్యవస్థీకరిస్తామని స్పష్టం చేశారు. ఒకవైపు అసెంబ్లీ ఎన్నికల ఘోర పరాజయం మిగిల్చిన గాయం మానకముందే, సొంత పార్టీ ఎమ్మెల్యేలే మెజారిటీ సంఖ్యలో ఎదురుతిరగడం మమతా బెనర్జీ రాజకీయ జీవితంలోనే అత్యంత ప్రతికూలమైన అంశంగా మారింది. ఇప్పుడు అందరి దృష్టి బెంగాల్ అసెంబ్లీ స్పీకర్ తీసుకోబోయే తుది నిర్ణయంపైనే కేంద్రీకృతమైంది. ఆయన నిర్ణయమే టీఎంసీ భవితవ్యాన్ని, ప్రతిపక్ష హోదాను శాసించనుంది.