విద్యార్థుల ఆవేదనకు మానవీయ స్పందన….

విద్యార్థుల ఆవేదనకు మానవీయ స్పందన.

• విపక్షాల కుతంత్రాలను తిప్పికొడుతూ దేశ రాజకీయాల్లో సరికొత్త రికార్డు.

• ఢిల్లీ జంతర్ మంతర్ వద్ద ఏడంచెల వ్యూహం చిత్తు.

(గడల నరసింహారావు సీనియర్ జర్నలిస్ట్,

9346923469)

దేశ రాజధాని ఢిల్లీ వీధులు విద్యార్థుల నినాదాలతో హోరెత్తుతున్న వేళ, సరిహద్దుల అవతల నుంచి విపక్షాలు పన్నిన కుట్రల పద్మవ్యూహాన్ని ఛేదిస్తూ భారతీయ జనతా పార్టీ అగ్రనాయకత్వం ఒక చారిత్రాత్మక ఘట్టానికి శ్రీకారం చుట్టింది. నీట్ పరీక్షా పత్రాల లీకేజీ అంశాన్ని అడ్డుపెట్టుకొని దేశంలో అశాంతిని రగల్చాలని, భావోద్వేగాలను రెచ్చగొట్టి రాజకీయ పబ్బం గడుపుకోవాలని బిఆర్ఎస్, ఆమ్ ఆద్మీ పార్టీ, కాంగ్రెస్ వంటి ప్రాంతీయ, జాతీయ శక్తులు తీవ్రంగా ప్రయత్నించాయి. అయితే, ప్రతిపక్షాల కుతంత్రాలను తుత్తునియలు చేస్తూ, దేశ భవిష్యత్తైన జెన్-జీ యువత భయాందోళనలను ఒక తండ్రిలా, ఒక సంరక్షకుడిగా అర్థం చేసుకున్న ప్రధానమంత్రి నరేంద్ర మోదీ, అత్యున్నత మానవీయ దృక్పథంతో దిద్దుబాటు చర్యలకు పూనుకున్నారు. నిరసనకారులు కోరిన ప్రధాన డిమాండ్లలో రెండింటిని తక్షణమే ఆమోదించడమే కాకుండా, విద్యా వ్యవస్థను సమూలంగా ప్రక్షాళన చేసేందుకు నేషనల్ టెస్టింగ్ ఏజెన్సీ (ఎన్టీఏ)లోని 47 మంది అధికారులపై కఠిన వేటు వేసి, కేంద్ర కేబినెట్‌లో విప్లవాత్మక బిల్లును ఆమోదించారు. కేవలం పరిపాలనాపరమైన చర్యలకే పరిమితం కాకుండా, విద్యార్థి లోకం పట్ల ప్రభుత్వానికి ఉన్న చిత్తశుద్ధిని, నైతిక జవాబుదారీతనాన్ని చాటిచెబుతూ కేంద్ర ప్రభుత్వం తీసుకున్న నిర్ణయం నేడు దేశవ్యాప్తంగా సంచలనం సృష్టిస్తోంది.

**ధర్మేంద్ర ప్రధాన్ నిస్వార్థ రాజకీయ ప్రస్థానం**

ఈ ఇరుపక్షాల ప్రతిష్టంభనకు ముగింపు పలుకుతూ, నైతికతకు నిలువెత్తు రూపంగా నిలిచిన కేంద్ర విద్యాశాఖ మంత్రి ధర్మేంద్ర ప్రధాన్ నమూనా అత్యంత స్పూర్తిదాయకం. 1969 జూన్ 26న ఒడిశాలోని తాల్చేర్‌లో జన్మించిన ధర్మేంద్ర ప్రధాన్, మాజీ కేంద్ర మంత్రి దేవేంద్ర ప్రధాన్, బసంత్ మంజరి ప్రధాన్ దంపతుల పుత్రరత్నం. ఉత్కల్ యూనివర్సిటీ నుంచి ఆంత్రోపాలజీ (మానవశాస్త్రం)లో మాస్టర్స్ డిగ్రీ పూర్తి చేసిన ఆయన, మానవ సంబంధాలను, సమాజ ఆవేదనను బాల్యం నుంచే స్వయంగా ఆకలింపు చేసుకున్నారు. 1983లో తాల్చేర్ కాలేజీలో అఖిల భారత విద్యార్థి పరిషత్ (ఏబీవీపీ) కార్యకర్తగా ప్రస్థానం ప్రారంభించి, 1985లో తాల్చేర్ కాలేజ్ స్టూడెంట్స్ యూనియన్ అధ్యక్షుడిగా, 1993లో ఒడిశా రాష్ట్ర కార్యదర్శిగా, 1995లో జాతీయ కార్యదర్శిగా ఎదిగారు. 1998లో అధికారికంగా బీజేపీలో చేరి, 2000లో ఒడిశా శాసనసభకు, 2004లో లోక్‌సభకు, ఆ తర్వాత రాజ్యసభకు, 2024 లోక్‌సభ ఎన్నికల్లో సంబల్‌పూర్ నియోజకవర్గం నుంచి ఘనవిజయం సాధించి 18వ లోక్‌సభకు ఎన్నికయ్యారు.

ప్రధాన్ రాజకీయ జీవితంలో అత్యంత మానవీయమైన, ఉద్వేగభరితమైన ఘట్టం ఏమిటంటే.. 1997లో ఒడిశాలో విద్యార్థి నాయకుడిగా ఉన్నప్పుడు క్వశ్చన్ పేపర్ లీక్‌కు వ్యతిరేకంగా విద్యార్థుల హక్కుల కోసం పోరాడుతూ ఆయన తీవ్రమైన లఠీఛార్జీకి గురై, రక్తం చిందించారు. పేపర్ లీక్ వల్ల విద్యార్థులు అనుభవించే మానసిక నరకం, వారి తల్లిదండ్రుల కంటిపాపల్లో ఒలికే కన్నీటి చుక్కల విలువ ఏమిటో స్వయంగా అనుభవించిన నేత ధర్మేంద్ర ప్రధాన్. పెట్రోలియం శాఖ మంత్రిగా ఉన్నప్పుడు కోట్లాది నిరుపేద మహిళల ఇళ్లలో పొగ రహిత వాతావరణం నింపిన “ప్రధానమంత్రి ఉజ్వల యోజన” పథకాన్ని దిగ్విజయంగా అమలు చేసి, కోట్లాది మంది తల్లుల గుండెల్లో చెరగని ముద్ర వేసుకున్నారు. భార్య మృదులా ఠాకూర్ ప్రధాన్, ఒక కుమారుడు, ఒక కుమార్తె కలిగిన ఒక పరిపూర్ణ కుటుంబీకుడిగా, విద్యార్థుల కష్టాలను తన ఇంట్లోని పిల్లల కష్టాలుగా భావించారు.

మొదట్లో, రాజకీయ ఒత్తిళ్లకు తలొగ్గి మంత్రి రాజీనామా చేస్తే విపక్షాల కుట్రలకు బలం చేకూరుతుందని ఎన్డీయే భావించినప్పటికీ, ధర్మేంద్ర ప్రధాన్ తన స్వయంకృత అపరాధం ఏమీ లేకపోయినా, విద్యార్థుల మనోభావాలను గౌరవిస్తూ, వ్యవస్థ పట్ల విశ్వాసాన్ని పునరుద్ధరించేందుకు తన శాఖ మార్పుకు లేదా నిష్క్రమణకు ముఖాముఖి సిద్ధపడటం ఆయన ఉదాత్త వ్యక్తిత్వానికి నిదర్శనం. ఒకవైపు కేంద్ర కేబినెట్ పునర్వ్యవస్థీకరణ వ్యూహంలో భాగంగా ఆయన సేవలను పార్టీ సంస్థాగత బాధ్యతలకు, రాబోయే రాష్ట్రాల ఎన్నికల వ్యూహకర్తగా ఉపయోగించుకోవాలని బీజేపీ భావిస్తుండగా, తన పదవి కంటే దేశ యువత భవిష్యత్తే ముఖ్యమని నిరూపించి నైతికతకు సరికొత్త నిర్వచనం చెప్పారు.

**జంతర్ మంతర్ ఉద్యమంపై ఎన్డీయే ఏడంచెల వ్యూహాత్మక గెలుపు**

ప్రతిపక్షాలు రగిలించిన అశాంతిని, హింసాత్మక ధోరణులను అణచివేస్తూనే, అసలైన విద్యార్థులకు న్యాయం చేయడానికి నరేంద్ర మోదీ ప్రభుత్వం అమలు చేసిన ఏడంచెల వ్యూహం రాజకీయ విశ్లేషకులను ముక్కున వేలేసుకునేలా చేసింది.

మొదటి చర్యగా, ఉద్యమానికి నైతిక బలంగా నిలిచిన ప్రముఖ సామాజిక వేత్త సోనమ్ వాంగ్‌చుక్ ఆరోగ్య పరిస్థితిని గుర్తించి, ఆయనను వెంటనే రామ మనోహర్ లోహియా ఆసుపత్రి నుంచి వేదాంత ఆసుపత్రికి తరలించి, కేంద్ర మంత్రి జితేందర్ సింగ్ స్వయంగా వెళ్లి పరామర్శించి దీక్ష విరమింపజేశారు. ఇది ఉద్యమానికి ఉన్న ఉద్రిక్తతను తగ్గించి మానవీయ కోణాన్ని చాటిచెప్పింది.

రెండో చర్యగా, ఉద్యమం పేరిట హింసను ప్రేరేపించిన దళారులను, రాజకీయ ముసుగు వీరులను వేరు చేశారు. విజయ్ దహియా బర్గర్ తింటున్న వీడియో సోషల్ మీడియాలో వైరల్ కావడంతో ఆయన అసలు రంగు బయటపడింది. అభిజిత్ దీప్కే అరెస్టు, సౌరవ్ దాస్, రాంక వంటి ఆప్ సంబంధిత నాయకుల ఆధిపత్య పోరును బహిర్గతం చేయడంతో, ఉద్యమంలో చొరబడిన కుట్రదారులు విడిపోయారు. 120 మందికి పైగా పోలీసులు గాయపడిన ఘటనల్లో వాస్తవాలను వెలికితీశారు.

మూడో చర్యగా, ప్రజల్లో విశ్వాసాన్ని పెంచేందుకు ప్రధాని మోదీ స్వయంగా ఒక సెల్ఫీ వీడియో ద్వారా పరీక్షల నిర్వహణలో ప్రభుత్వం చేపడుతున్న పారదర్శక చర్యలను కోట్లాది మంది యువతకు స్పష్టంగా వివరించారు. కేంద్ర మంత్రి జితేందర్ సింగ్ ప్రతినిధులతో నిరంతరం చర్చలు జరిపి నమ్మకాన్ని పునరుద్ధరించారు.

నాలగో చర్యగా, శాంతియుత నిరసనల ముసుగులో రాళ్లు, కర్రలు, పెప్పర్ స్ప్రేలతో దాడి చేసిన అల్లరి మూకలను బాడీ కెమెరాల సాక్ష్యాల ఆధారంగా గుర్తించి చట్టపరమైన కేసులు నమోదు చేశారు. ఐదో చర్యగా, రాజకీయ నాయకులు సమష్టిగా సమన్వయం చేసుకోకుండా వేర్వేరుగా చర్చలు జరిపి, ఉద్యమాన్ని వాడుకోవాలని చూసిన విపక్షాల ఐక్యతను దెబ్బతీశారు.

ఆరో చర్యగా, ప్రజాకర్షక ప్రసంగాలు చేస్తూ విద్యార్థులను పక్కదోవ పట్టించిన మోగేష్ దహియా, విజయ్ దహియా వంటి వారి స్వార్థ ఆలోచనలను బర్గర్ వీడియోల ద్వారా డిస్క్రిడిట్ చేశారు. అభిజిత్ దీప్కే నాటకీయంగా ఉద్యమం విరమిస్తున్నట్లు ప్రకటించినప్పుడు కోపోద్రిక్తురాలైన ఒక విద్యార్థిని నీళ్లు చల్లి నిరసన తెలిపిన సంఘటన, నాయకులపై ప్రజా విశ్వాసం ఎంతగా సడలిందో స్పష్టం చేసింది.

ఏడో చర్యగా, కేజ్రీవాల్‌తో ఉద్యమ నాయకులకు ఉన్న రహస్య సంబంధాలను, గతంలో సోనమ్ వాంగ్‌చుక్ స్వయంగా ధర్మేంద్ర ప్రధాన్‌ను ప్రశంసించిన పాత వీడియోలను ఆధారాలతో సహా బయటపెట్టి, విపక్షాల ద్వంద్వ నీతిని పాతాళానికి తొక్కేశారు. నేపాల్, శ్రీలంక, బంగ్లాదేశ్ తరహాలో దేశంలో అశాంతి సృష్టించాలనుకున్న కుట్రలను మోదీ సర్కార్ అత్యంత సమర్థవంతంగా తిప్పికొట్టింది.

ధర్మేంద్ర ప్రధాన్ వంటి కీకల నాయకుడు విద్యార్థుల ఆవేదనను గౌరవిస్తూ, వ్యవస్థాగత మార్పులకు బాటలు వేసేందుకు తన పదవిని ఒక అడ్డంకిగా మార్చకుండా వైదొలగడానికి సిద్ధపడటం నవ భారత రాజకీయాల్లో ఒక సువర్ణాధ్యాయం. కింది స్థాయి అధికారుల నుంచి ఉన్నతాధికారుల వరకు 47 మందిపై వేటు వేయడం, కొత్త చట్టాలు తీసుకురావడం, కేబినెట్ ప్రక్షాళన ద్వారా సమర్థులైన వారికి బాధ్యతలు అప్పగించడం ద్వారా మోదీ సర్కార్ దేశ ప్రజలకు బలమైన సందేశాన్ని ఇచ్చింది. రాజకీయ ప్రయోజనాల కంటే దేశ యువత ఆకాంక్షలే పరమావధి అని, నైతిక జవాబుదారీతనమే తమ ప్రభుత్వ మార్గదర్శక సూత్రమని నిరూపించింది. ఈ చారిత్రాత్మక వ్యూహంతో విపక్షాలు పన్నిన కుట్రలన్నీ చిత్తుకాగా, మోదీ నాయకత్వంపై, ఎన్డీయే ప్రభుత్వంపై దేశవ్యాప్తంగా ప్రజా విశ్వాసం మరొకసారి హిమాలయాలెత్తున నిలిచింది!