భాగ్యనగరంలో ఎబోలా కలకలం.
* శంషాబాద్ ఎయిర్పోర్టులో అనుమానితుడి గుర్తింపు.
*సూడాన్ నుంచి వచ్చిన ప్రయాణికుడికి వైరస్ హిస్టరీ.
* గాంధీ ఆసుపత్రి ఐసోలేషన్కు తరలింపు.
*అప్రమత్తమైన కేంద్ర ప్రభుత్వం.
* ఎబోలా ప్రభావిత దేశాల నుంచి వచ్చేవారికి హెల్త్ అడ్వైజరీ జారీ.
హైదరాబాద్, మహా.
రాజధాని హైదరాబాద్లో ఎబోలా వైరస్ ఒక్కసారిగా కలకలం రేపింది. శంషాబాద్ అంతర్జాతీయ విమానాశ్రయంలో దిగిన ఒక ప్రయాణికుడికి ఎబోలా వైరస్ హిస్టరీ ఉన్నట్లు వైద్య అధికారులు గుర్తించారు. ఆఫ్రికా ఖండంలోని సూడాన్ దేశం నుంచి మహ్మద్ అనే వ్యక్తి గురువారం నాడు శంషాబాద్ ఎయిర్పోర్టుకు చేరుకున్నారు. కేంద్ర ప్రభుత్వ ముందస్తు ఆదేశాల మేరకు విమానాశ్రయంలో ఆఫ్రికా దేశాల నుంచి వచ్చే ప్రయాణికులకు నిర్వహిస్తున్న ప్రత్యేక స్క్రీనింగ్ పరీక్షల్లో ఈ విషయం వెలుగుచూసింది.
**గాంధీ ఆసుపత్రిలో ఐసోలేషన్.. సీసీఎంబీకి నమూనాలు**
సదరు ప్రయాణికుడికి ఎబోలా హిస్టరీ ఉన్నట్లు తేలడంతో ఎయిర్పోర్టు వైద్య సిబ్బంది తక్షణమే అప్రమత్తమయ్యారు. ఎలాంటి ఆలస్యం చేయకుండా అతడిని సికింద్రాబాద్లోని గాంధీ ఆసుపత్రికి తరలించారు. ప్రస్తుతం బాధితుడిని ప్రత్యేక ఐసోలేషన్ వార్డులో ఉంచి నిరంతరం పర్యవేక్షిస్తున్నారు. అతడి శరీరం నుంచి సేకరించిన రక్త నమూనాలను తదుపరి నిర్ధారణ పరీక్షల నిమిత్తం హైదరాబాద్లోని సీసీఎంబీ ల్యాబొరేటరీకి పంపించారు. ఈ పరీక్షల ఫలితాలు వచ్చేంత వరకు ఆసుపత్రి వర్గాలతో పాటు నగర వైద్య రంగంలో తీవ్ర ఉత్కంఠ, టెన్షన్ నెలకొంది.
**అంతర్జాతీయ హెల్త్ ఎమర్జెన్సీ**
ప్రస్తుతానికి ఆఫ్రికా దేశాలైన కాంగో, ఉగాండాలలో ఎబోలా వైరస్ వ్యాప్తి విపరీతంగా పెరిగింది. ముఖ్యంగా ‘బుండిబుగ్యో’ అనే ప్రమాదకర వేరియంట్ కారణంగా అక్కడ పెద్ద సంఖ్యలో కేసులు నమోదవుతున్నాయి. ఈ భయాందోళనల నేపథ్యంలో ప్రపంచ ఆరోగ్య సంస్థ సైతం అప్రమత్తమై అంతర్జాతీయ ఆరోగ్య అత్యవసర పరిస్థితిని (ఇంటర్నేషనల్ హెల్త్ ఎమర్జెన్సీ) ప్రకటించింది.
**కేంద్ర ఆరోగ్య శాఖ హెల్త్ అడ్వైజరీ**
ఆఫ్రికా దేశాల్లో వైరస్ విజృంభిస్తున్న తరుణంలో కేంద్ర ఆరోగ్య, కుటుంబ సంక్షేమ శాఖ దేశవ్యాప్తంగా హై అలర్ట్ ప్రకటించింది. ఇప్పటివరకు భారతదేశంలో ఎలాంటి ఎబోలా పాజిటివ్ కేసులు నమోదు కాలేదని స్పష్టం చేస్తూనే, ప్రజల క్షేమం కోసం ప్రత్యేక హెల్త్ అడ్వైజరీని జారీ చేసింది. గత 21 రోజుల్లో ఎబోలా ప్రభావిత దేశాల్లో పర్యటించిన వారు లేదా ఆయా దేశాల మీదుగా భారతదేశానికి వచ్చిన ప్రయాణికులు తప్పనిసరిగా స్వీయ నిర్బంధంలోకి (సెల్ఫ్ క్వారంటైన్) వెళ్లాలని కేంద్రం విజ్ఞప్తి చేసింది.
ప్రయాణికుల్లో తలనొప్పి, కండరాల నొప్పులు, తీవ్రమైన జ్వరం, వాంతులు, విరేచనాలు వంటి లక్షణాలు కనిపిస్తే వెంటనే సెల్ఫ్ క్వారంటైన్కు వెళ్లడంతో పాటు స్థానిక ఆరోగ్య సిబ్బందికి సమాచారం అందించాలని కేంద్ర ఆరోగ్య శాఖ సూచించింది. అత్యవసర సహాయం లేదా సమాచారం కోసం 1075 టోల్ ఫ్రీ నంబరును సంప్రదించాలని కోరింది. ముందస్తు సమాచారంతో ప్రాణాలను కాపాడుకోవడమే కాకుండా వైరస్ వ్యాప్తిని సమర్థవంతంగా అడ్డుకోవచ్చని కేంద్రం పిలుపునిచ్చింది.
