సింగరేణి కుంభకోణాన్ని కప్పిపుచ్చుకునేందుకే కేసులు!
* అసలు విషయాలు పక్కదారి పట్టించే కుట్ర.
*బాల్క సుమన్ అరెస్టుపై బీఆర్ఎస్ వర్కింగ్ ప్రెసిడెంట్ సంచలన వ్యాఖ్యలు.
హైదరాబాద్, మహా.
సింగరేణి సంస్థలో జరుగుతున్న భారీ కుంభకోణాన్ని కప్పిపుచ్చుకోవడానికే రాష్ట్ర ప్రభుత్వం బీఆర్ఎస్ నేతలపై అక్రమ కేసులు బనాయిస్తోందని బీఆర్ఎస్ వర్కింగ్ ప్రెసిడెంట్ కే. తారకరామారావు (కేటీఆర్) సంచలన వ్యాఖ్యలు చేశారు. మాజీ ఎమ్మెల్యే బాల్క సుమన్ అరెస్టును తీవ్రంగా ఖండించిన ఆయన, కాంగ్రెస్ ప్రభుత్వం అనుసరిస్తున్న కక్షసాధింపు రాజకీయాలపై తీవ్ర స్థాయిలో ధ్వజమెత్తారు. రాష్ట్రంలో జరుగుతున్న వాస్తవ పరిస్థితుల నుంచి, వైఫల్యాల నుంచి ప్రజల దృష్టిని మళ్లించేందుకే ఉద్దేశపూర్వకంగా ఇటువంటి అరెస్టులకు తెరతీశారని ఆయన ఆరోపించారు.
రాష్ట్రంలో కాంగ్రెస్ పార్టీ అధికారంలోకి వచ్చిన తర్వాత సింగరేణి కేంద్రంగా పెద్ద ఎత్తున అవకతవకలు జరుగుతున్నాయని కేటీఆర్ విమర్శించారు. ఈ భారీ కుంభకోణానికి సంబంధించిన నిజాలు ఎక్కడ బయటపడతాయోనన్న భయంతోనే రేవంత్ రెడ్డి సర్కారు అడ్డదారుల్లో పయనిస్తోందని మండిపడ్డారు. ప్రతిపక్ష నేతల గొంతు నొక్కేందుకు, ప్రభుత్వ విధానాలను ప్రశ్నిస్తున్న వారిపై పోలీసులను ప్రయోగించి తప్పుడు కేసులు నమోదు చేస్తున్నారని ఆగ్రహం వ్యక్తం చేశారు. బాల్క సుమన్ అరెస్టు కేవలం రాజకీయ కక్షసాధింపు చర్యేనని, ఇలాంటి బెదిరింపులకు, అరెస్టులకు బీఆర్ఎస్ పార్టీ నాయకులు, కార్యకర్తలు ఏమాత్రం భయపడే ప్రసక్తే లేదని ఆయన తేల్చిచెప్పారు.
ఇదే క్రమంలో ముఖ్యమంత్రి రేవంత్ రెడ్డి గతంలో చేసిన వ్యాఖ్యలను కేటీఆర్ ఈ సందర్భంగా తెరపైకి తెచ్చారు. గతంలో ప్రతిపక్షంలో ఉన్నప్పుడు ప్రగతి భవన్ను బాంబులతో పేల్చేయాలని రేవంత్ రెడ్డి స్వయంగా వ్యాఖ్యానించలేదా అని ఆయన సూటిగా ప్రశ్నించారు. నాడు అంతటి తీవ్రమైన, రెచ్చగొట్టే వ్యాఖ్యలు చేసిన రేవంత్ రెడ్డిపై ఎలాంటి చర్యలు తీసుకోలేదని, కానీ నేడు రాజకీయ విమర్శలు చేసిన బీఆర్ఎస్ నేతలను మాత్రం కక్షగట్టి అరెస్టు చేస్తున్నారని దుయ్యబట్టారు. కాంగ్రెస్ ప్రభుత్వ వైఫల్యాలను, సింగరేణిలోని అవినీతిని రాబోయే రోజుల్లో మరింత బలంగా ఎండగడుతూనే ఉంటామని, అక్రమ కేసులకు వెరవకుండా ప్రజల పక్షాన తమ పోరాటం నిరంతరం కొనసాగుతుందని కేటీఆర్ స్పష్టం చేశారు.
