ఓట్ల చోరీపై కాంగ్రెస్ అప్రమత్తం.
* ‘సర్’పై నేతలకు జూమ్ వేదికగా దిశానిర్దేశం.
* తెలంగాణలోనూ ఓట్లు తొలగించే అవకాశం ఉందన్న మీనాక్షి నటరాజన్, మహేష్ కుమార్ గౌడ్.
* ఆరు జూమ్ సమావేశాల ద్వారా మంత్రులు, ఎంపీలు, ఎమ్మెల్యేలకు అవగాహన.
* ఈ నెల 25 నుంచి ఇంటింటికీ బీఎల్ఏ-2లు.. ప్రతి ఓటునూ కాపాడాలని పిలుపు.
* కరీంనగర్ పార్లమెంట్ పరిధిపై ప్రత్యేక సమీక్ష.. మంత్రి పొన్నం ప్రభాకర్కు కీలక సూచనలు.
హైదరాబాద్, మహా.
రాష్ట్రంలో ఓటరు జాబితా ప్రత్యేక సవరణ ప్రక్రియను కాంగ్రెస్ పార్టీ అత్యంత ప్రతిష్టాత్మకంగా తీసుకుంది. ఈ ప్రక్రియపై ఆదివారం కాంగ్రెస్ నాయకులకు ఏఐసీసీ రాష్ట్ర ఇన్ఛార్జ్ మీనాక్షి నటరాజన్, టీపీసీసీ అధ్యక్షులు బి.మహేష్ కుమార్ గౌడ్ జూమ్ వేదికగా విస్తృత స్థాయి సమావేశం నిర్వహించి దిశానిర్దేశం చేశారు. రాష్ట్రంలోని మూడు పార్లమెంట్ నియోజకవర్గాలను ఒక యూనిట్గా పరిగణిస్తూ, అరగంట చొప్పున మొత్తం 6 జూమ్ మీటింగ్లను విజయవంతంగా నిర్వహించారు. ఈ సుదీర్ఘ అంతర్గత సమావేశాల్లో పలువురు రాష్ట్ర మంత్రులు, పార్లమెంట్ సభ్యులు, శాసనసభ్యులు, డీసీసీ అధ్యక్షులు, నియోజకవర్గ ఇన్ఛార్జ్లు, పార్టీ మాస్టర్ ట్రైనర్లు పెద్ద సంఖ్యలో పాల్గొన్నారు. దేశంలోని ఇతర ప్రాంతాల తరహాలోనే తెలంగాణలోనూ ప్రతిపక్షాలకు అనుకూలంగా ఉన్న ఓట్లను ఉద్దేశపూర్వకంగా తొలగించే (ఓట్ చోరీ) అవకాశం ఉందని, అందువల్ల నియోజకవర్గాల్లోని నాయకులంతా అత్యంత అప్రమత్తంగా ఉండాలని ఈ సందర్భంగా వారు హెచ్చరించారు.
ఈ జూమ్ సమావేశంలో ఓటర్ మ్యాపింగ్, ‘సర్’ ప్రక్రియ జరిగే విధానం, బూత్ లెవెల్ ఏజెంట్లు (BLA) చేయాల్సిన పనులు, బూత్ లెవెల్ అధికారులు (BLO) క్షేత్రస్థాయిలో చేస్తున్న పనులపై నిరంతర నిఘా ఉంచడం వంటి పలు కీలక అంశాలపై నేతలు లోతుగా చర్చించారు. ముఖ్యంగా ఓటర్ మ్యాపింగ్లో తీసుకోవాల్సిన జాగ్రత్తలపై నాయకులకు తగిన సూచనలు చేశారు. ప్రతి అసెంబ్లీ నియోజకవర్గంలో ఇప్పటివరకు ఎంత శాతం ఓటర్ మ్యాపింగ్ పూర్తయింది, మిగిలిన ప్రక్రియను ఎలా వేగవంతం చేయాలి, సాంకేతిక కారణాల వల్ల ఓటు హక్కు కోల్పోయిన వారిని గుర్తించి వారికి తిరిగి ఓటు హక్కు కల్పించేందుకు ఎలాంటి చర్యలు తీసుకోవాలో నేతలకు సమగ్రంగా వివరించారు.
> “దేశంలో భారతీయ జనతా పార్టీ, ఎన్నికల కమిషన్ కలిసికట్టుగా అప్రజాస్వామిక పద్ధతుల్లో ఓట్ల చోరీకి పాల్పడుతున్నాయి. ఈ రకమైన దొంగ రాజకీయాల ద్వారానే దేశంలో బీజేపీ అధికారంలోకి వస్తోంది. ‘సర్’ పేరుతో ఓట్ల పరిశీలన చేపట్టి, దేశవ్యాప్తంగా కాంగ్రెస్ పార్టీకి, ఇతర ప్రతిపక్షాలకు అనుకూలంగా ఉన్న ఓట్లను ఏరివేస్తున్నారు. అందువల్ల మన బీఎల్ఏలు ఓటర్ మ్యాపింగ్ను క్షేత్రస్థాయిలో లోతుగా పరిశీలించి ప్రతి నిజమైన ఓటును కాపాడాలి. ఒకవేళ ఎక్కడైనా అర్హులైన వారి ఓటు గనుక తొలగిస్తే, వెంటనే తగిన ఆధారాలతో వాటిని తిరిగి దరఖాస్తు చేయించి పునరుద్ధరణ జరిగేలా చూడాలి. రాబోయే ఎన్నికల దృష్ట్యా ప్రతి ఒక్క ఓటును కాపాడుకోవడం పార్టీకి అత్యంత కీలకం.” అని మహేష్ కుమార్ గౌడ్, ఏఐసీసీ ఇంచార్జ్ మీనాక్షి నటరాజన్ తీవ్ర ఆరోపణలు గుప్పించారు.
>
ఈ ప్రతిష్టాత్మక జూమ్ మీటింగ్లకు కో-ఆర్డినేటర్గా కాంగ్రెస్ నాయకుడు గంప వేణు గోపాల్ వ్యవహరించగా, కేంద్ర ఎన్నికల కమిషన్కు సంబంధించిన తాజా మార్గదర్శకాలు, సాంకేతిక వివరాలను టీపీసీసీ ఎలక్షన్ కమిషన్ చైర్మన్ రాజేష్ పార్టీ శ్రేణులకు వివరించారు. పార్టీ ప్రణాళికల ప్రకారం ఇప్పటివరకు రాష్ట్రవ్యాప్తంగా 90 శాతం బీఎల్ఏ శిక్షణా కార్యక్రమాలు విజయవంతంగా పూర్తయ్యాయి. మిగిలిన ప్రక్రియను ముగించుకుని, ఈ నెల 25వ తేదీ నుంచి బీఎల్ఏ-2లు క్షేత్రస్థాయిలో నేరుగా ఇంటింటికీ వెళ్లి ఓటర్ల వివరాలను పరిశీలించనున్నారు. ఈ ప్రక్రియను పర్యవేక్షించేందుకు ప్రతి 10 పోలింగ్ బూత్లకు ఒక సూపర్వైజర్ను నియామకం చేయడంతో పాటు, ప్రతి అసెంబ్లీ నియోజకవర్గానికి ఒక కో-ఆర్డినేటర్ను నియమిస్తున్నారు. క్షేత్రస్థాయిలో ఓటర్ల నమోదు, సవరణల్లో తలెత్తే సమస్యల తక్షణ పరిష్కారం కోసం ఏఈఆర్వో (AERO), ఈఆర్వో (ERO) అధికారులతో నిరంతరం సంప్రదింపులు జరిపేలా ఏర్పాట్లు చేస్తున్నారు. ఈ ఉన్నత స్థాయి సమావేశంలో ఏఐసీసీ కార్యదర్శి సచిన్ సావంత్, రాష్ట్ర రవాణా శాఖ మంత్రి పొన్నం ప్రభాకర్, ట్రైనింగ్ సెల్ చైర్మన్, ఎమ్మెల్యే రామ్మోహన్ రెడ్డితో పాటు పార్లమెంట్ల వారీగా డీసీసీ అధ్యక్షులు, ఎంపీలు, ఎమ్మెల్యేలు, ఎమ్మెల్సీలు, పార్లమెంట్ కో-ఆర్డినేటర్లు పెద్ద సంఖ్యలో పాల్గొన్నారు.
ఇదే క్రమంలో కరీంనగర్ పార్లమెంట్ పరిధిలోని కాంగ్రెస్ నేతలతో మహేష్ కుమార్ గౌడ్, మీనాక్షి నటరాజన్లు ప్రత్యేకంగా మాట్లాడారు. కరీంనగర్ పార్లమెంట్ పరిధిలో కాంగ్రెస్ పార్టీని క్షేత్రస్థాయిలో సంస్థాగతంగా బలోపేతం చేయడానికి ఈ ‘సర్’ ప్రక్రియను ఒక అద్భుతమైన అవకాశంగా ఉపయోగించుకోవాలని వారు రాష్ట్ర మంత్రి పొన్నం ప్రభాకర్కు సూచించారు. దీనిపై ఇప్పటికే స్పందించిన మంత్రి పొన్నం ప్రభాకర్.. తమ పరిధిలోని హుస్నాబాద్ నియోజకవర్గంలో ‘సర్’ ఓటరు సవరణ ప్రక్రియపై బీఎల్ఏ-2 లకు పూర్తిస్థాయిలో శిక్షణ ఇచ్చామని అధిష్ఠానానికి వివరించారు. బూత్ లెవెల్ ఏజెంట్లు తమ పరిధిలోని పోలింగ్ బూత్లలో అర్హత ఉన్న ఒకే ఒక్క ఓటు కూడా గల్లంతు కాకుండా అత్యంత జాగ్రత్తగా వ్యవహరించాలని, ఈ సమగ్ర ప్రక్రియపై పార్టీ నాయకులు, బీఎల్ఏ-2లు పూర్తి అవగాహన కలిగి ఉండాలని రాష్ట్ర నేతలు స్పష్టం చేశారు. ముఖ్యంగా 18 సంవత్సరాలు పూర్తి చేసుకున్న కొత్త ఓటర్ల నమోదుపై ప్రత్యేక దృష్టి పెట్టాలని, చిరునామా మార్పు, పేర్ల సవరణ, ఫోటోల మార్పు వంటి సాంకేతిక అంశాలపై ప్రజల్లో విస్తృత అవగాహన కల్పించాలని సూచించారు. గ్రామ, వార్డు, మండల స్థాయిల్లో పార్టీ నాయకులంతా ఒకరితో ఒకరు సమన్వయంతో పని చేసి ఈ ఓటరు నమోదు ప్రక్రియను విజయవంతం చేయాలని పిలుపునిచ్చారు.
