ప్రజాపాలనతో ప్రజలకు మరింత చేరువైన ప్రజా ప్రభుత్వం!

ప్రజాపాలనతో ప్రజలకు మరింత చేరువైన ప్రజా ప్రభుత్వం!
* 99 రోజుల బృహత్తర కార్యక్రమాలపై సచివాలయంలో ముఖ్యమంత్రి రేవంత్ రెడ్డి ఉన్నత స్థాయి సమీక్ష.
*ఫీల్డ్‌ విజిట్‌కు వెళ్లని అధికారులు, కలెక్టర్ల వివరాలపై నివేదిక ఇవ్వాలని సీఎస్‌కు ఆదేశం.
* వైద్య, విద్యా రంగాల్లో ‘ఫేషియల్ రికగ్నిషన్’ హాజరు.
* స్పెషల్ ఆఫీసర్లుగా జిల్లాలకు సీనియర్ ఐఏఎస్‌లు.
* గ్రామ పంచాయతీ భవనాల నిర్మాణానికి, స్కూళ్లపై సోలార్ ప్లాంట్లకు గ్రీన్ సిగ్నల్.
హైదరాబాద్, మహా.
రాష్ట్ర ప్రభుత్వం అత్యంత ప్రతిష్టాత్మకంగా చేపట్టిన ‘ప్రజాపాలన – ప్రగతి ప్రణాళిక’ 99 రోజుల కార్యాచరణ విజయవంతం కావడంతో ప్రజా ప్రభుత్వం ప్రజలకు మరింత చేరువైందని ముఖ్యమంత్రి ఎ. రేవంత్ రెడ్డి సంతృప్తి వ్యక్తం చేశారు. మార్చి 16 నుంచి జూన్ 12 వరకు రాష్ట్రవ్యాప్తంగా జరిగిన ఈ బృహత్తర కార్యక్రమాల ద్వారా వచ్చిన ఫలితాలపై సోమవారం డాక్టర్ బీఆర్ అంబేద్కర్ రాష్ట్ర సచివాలయంలో ముఖ్యమంత్రి ఉన్నత స్థాయి సమీక్షా సమావేశాన్ని నిర్వహించారు. ఈ సందర్భంగా రాజ్యసభ ఎంపీ వేం నరేందర్ రెడ్డి, ప్రభుత్వ ప్రధాన కార్యదర్శి కె. రామకృష్ణారావు, డీజీపీ సీవీ ఆనంద్ తదితరులతో కలిసి విభాగాల వారీగా జిల్లా స్థాయి నుంచి గ్రామ స్థాయి వరకు అందిన ప్రగతి నివేదికలను సీఎం క్షుణ్ణంగా పరిశీలించారు. 99 రోజుల కార్యాచరణ ప్రణాళికలో చురుగ్గా పాల్గొని, అంకితభావంతో పనిచేసిన అన్ని విభాగాల అధికారులను, సిబ్బందిని ఈ సందర్భంగా ముఖ్యమంత్రి ప్రత్యేకంగా అభినందించారు.
**ఫీల్డ్ విజిట్ చేయని అధికారులపై సీఎం సీరియస్!**
ప్రభుత్వ ప్రధాన కార్యదర్శుల నుంచి జిల్లా కలెక్టర్ల వరకు అన్ని విభాగాల ఉన్నతాధికారులు ప్రతి నెలా కచ్చితంగా క్షేత్రస్థాయికి వెళ్లి ప్రజల సమస్యలను పరిశీలించాలని గతంలో తాను జారీ చేసిన ఆదేశాలను ముఖ్యమంత్రి ఈ సందర్భంగా గుర్తు చేశారు. ఈ 99 రోజుల కాలంలో క్షేత్రస్థాయి పర్యటనలకు (ఫీల్డ్‌ విజిట్‌) వెళ్లకుండా కార్యాలయాలకే పరిమితమైన ఉన్నతాధికారులు, జిల్లా కలెక్టర్లపై తక్షణమే పూర్తిస్థాయి నివేదిక సిద్ధం చేసి తనకు సమర్పించాలని చీఫ్ సెక్రటరీని సీఎం రేవంత్ రెడ్డి ఆదేశించారు. వివిధ స్థాయిల్లో జరిగిన కార్యక్రమాల్లో ప్రజాప్రతినిధులు, ప్రజల నుంచి వచ్చిన ఫీడ్‌బ్యాక్‌ను పక్కాగా నమోదు చేయాలని, గ్రామాల్లో గుర్తించిన స్థానిక సమస్యలను ఆయా శాఖలు త్వరితగతిన పరిష్కరించాలని స్పష్టం చేశారు. ఈ 3 నెలల కాలంలో రాష్ట్రవ్యాప్తంగా చేపట్టిన అభివృద్ధి పనులు, చేసిన శంకుస్థాపనలు, సృష్టించిన ఆస్తుల వివరాలన్నింటినీ రికార్డుల్లో నమోదు చేయాలన్నారు.
**కొత్త పంచాయతీ భవనాలు.. స్కూళ్లపై సోలార్ పవర్**
రాష్ట్రంలో ఇప్పటికీ స్వంతంగా గ్రామ పంచాయతీ భవనాలు లేని గ్రామాలు ఉంటే.. వెంటనే వాటి జాబితాను సిద్ధం చేయాలని పంచాయతీరాజ్ అధికారులను ముఖ్యమంత్రి ఆదేశించారు. ఆయా గ్రామాల్లో కొత్తగా కట్టుదిట్టమైన పంచాయతీ భవనాల నిర్మాణాలను చేపట్టేందుకు తక్షణమే కార్యాచరణ ప్రణాళికను సిద్ధం చేసుకోవాలన్నారు. దీంతో పాటు విప్లవాత్మక నిర్ణయంలో భాగంగా రాష్ట్రంలోని అన్ని ప్రభుత్వ పాఠశాలల భవనాలపై సోలార్ పవర్ ప్లాంట్లను (సౌర విద్యుత్) ఏర్పాటు చేయాలని అధికారులకు స్పష్టమైన దిశానిర్దేశం చేశారు.
**ఉస్మానియా, గాంధీ నుంచి పీహెచ్‌సీల వరకు డిజిటల్ హాజరు**
పాలనా వ్యవస్థలో పారదర్శకత, జవాబుదారీతనం పెంచేందుకు వీలుగా విద్యా, వైద్య విభాగాల్లో అన్ని స్థాయిల్లో ‘ఫేషియల్ రికగ్నిషన్’ (ముఖ గుర్తింపు) హాజరు విధానాన్ని కచ్చితంగా అమలు చేయాలని ముఖ్యమంత్రి రేవంత్ రెడ్డి స్పష్టం చేశారు. ప్రాథమిక పాఠశాలల నుంచి కళాశాలల వరకు, గ్రామీణ ప్రాంతాల్లోని పీహెచ్‌సీల (ప్రాథమిక ఆరోగ్య కేంద్రాలు) నుంచి హైదరాబాద్‌లోని ఉస్మానియా, గాంధీ వంటి ప్రతిష్టాత్మక మహానగర ఆసుపత్రుల వరకు పనిచేసే ఉద్యోగులందరికీ ఇదే బయోమెట్రిక్ హాజరు విధానాన్ని వర్తింపజేయాలన్నారు.
**ప్రతి జిల్లాకూ స్పెషల్ ఆఫీసర్‌గా సీనియర్ ఐఏఎస్**
రాష్ట్రస్థాయిలో 99 రోజుల కార్యాచరణ ప్రణాళికపై సమీక్ష నిర్వహించిన తరహాలోనే, జిల్లాల వారీగా కూడా తక్షణమే సమీక్షలు ప్రారంభించాలని సీఎం ఆదేశించారు. ఈ ప్రక్రియను పర్యవేక్షించేందుకు రాష్ట్ర స్థాయి నుంచి ప్రతి జిల్లాకూ ఒక సీనియర్ ఐఏఎస్ అధికారిని ‘స్పెషల్ ఆఫీసర్‌’గా నియమించి క్షేత్రస్థాయికి పంపించాలని చెప్పారు. జిల్లాల వారీగా ఈ ప్రగతి నివేదికలను అధికారికంగా విడుదల చేయాలన్నారు. జిల్లాలు, నియోజకవర్గాలు, మండలాలు, గ్రామాల వారీగా ప్రభుత్వం అమలు చేస్తున్న ప్రజా సంక్షేమ పథకాలు, వాటిని అందుకున్న లబ్ధిదారుల వివరాలు, ప్రజా ప్రభుత్వం చేపట్టిన సమగ్ర అభివృద్ధి పనుల సమాచారాన్ని సిద్ధం చేసి, ప్రజలకు తెలిసేలా ప్రత్యేక ‘డ్యాష్ బోర్డు’లో అందుబాటులో ఉంచాలని అధికారులను ఆదేశించారు.
**ముఖ్యమంత్రి హామీలపై ప్రత్యేక నిఘా**
తాను ముఖ్యమంత్రిగా బాధ్యతలు స్వీకరించిన నాటి నుంచి ఇప్పటివరకు జరిపిన వివిధ జిల్లాల పర్యటనలు, అధికారిక ప్రభుత్వ కార్యక్రమాల్లో ప్రజలకు ఇచ్చిన హామీల అమలు తీరుపై ముఖ్యమంత్రి రేవంత్ రెడ్డి అధికారులను ప్రత్యేకంగా ఆరా తీశారు. నియోజకవర్గాల వారీగా ముఖ్యమంత్రి ఇచ్చిన హామీల పురోగతి ఎంతవరకు వచ్చింది, ఏయే పనులు ఏ దశలో ఉన్నాయనే అంశాలపై సమగ్ర నివేదికను రూపొందించి తక్షణమే తనకు అందజేయాలని ప్రణాళికా విభాగాన్ని (ప్లానింగ్ డిపార్ట్‌మెంట్) ముఖ్యమంత్రి కఠినంగా ఆదేశించారు.