తరగతి గదుల్లోనే తెలంగాణ భవిష్యత్తు…

తరగతి గదుల్లోనే తెలంగాణ భవిష్యత్తు.
* ప్రభుత్వ బడులంటే చిన్నచూపు పోవాలి.
* మట్టిలో మాణిక్యాలు వెలుగులోకి రావాలి.
* కార్పొరేట్‌కు దీటుగా రంగారెడ్డి జిల్లా ఆరుట్లలో ‘తెలంగాణ పబ్లిక్ స్కూల్’ అట్టహాసంగా ప్రారంభం.
* విద్యార్థులకు ఉదయం బ్రేక్‌ఫాస్ట్ పథకానికి శ్రీకారం చుట్టిన ముఖ్యమంత్రి రేవంత్ రెడ్డి.
రంగారెడ్డి:మహా.
ప్రభుత్వ పాఠశాలలు అంటే కేవలం అనాధలు, ఆర్థికంగా చితికిపోయిన వారు మాత్రమే చదువుకునేవారన్న అపోహలను సంపూర్ణంగా చెరిపేస్తూ.. మట్టిలో మాణిక్యాలను వెలికితీయాలన్న దృఢ సంకల్పంతో రాష్ట్ర ప్రభుత్వం విద్యా సంస్కరణలకు పదునుపెట్టింది. అద్దాల మేడలు, రంగుల గోడలు అభివృద్ధికి సూచికలు కావని, తరగతి గదుల్లోనే తెలంగాణ భవిష్యత్తు ఉందన్న మహోన్నత లక్ష్యంతో రంగారెడ్డి జిల్లా మంచాల మండలం ఆరుట్ల గ్రామంలో అత్యంత ప్రతిష్టాత్మకంగా నిర్మించిన ‘తెలంగాణ పబ్లిక్ స్కూల్’ను రాష్ట్ర ముఖ్యమంత్రి శ్రీ ఎ. రేవంత్ రెడ్డి అట్టహాసంగా ప్రారంభించారు. కార్పొరేట్ విద్యాసంస్థలకు ఏమాత్రం తీసిపోని విధంగా, ప్రపంచ స్థాయి ప్రమాణాలు, అత్యాధునిక వసతులతో రూపుదిద్దుకున్న ఈ ఆదర్శ పాఠశాలను రాష్ట్రంలోని ప్రభుత్వ బడుల్లో చదువుకుంటున్న 27 లక్షల మంది విద్యార్థులకు ఆయన అంకితం చేశారు. ఇదే వేదికపై నుంచి విద్యార్థులకు ఉదయం పూట పౌష్టికాహారం అందించే ఉద్దేశంతో ప్రవేశపెట్టిన ‘బ్రేక్ ఫాస్ట్ (అల్పాహారం)’ పథకానికి ముఖ్యమంత్రి శ్రీకారం చుట్టారు. ఈ సందర్భంగా నిర్వహించిన బహిరంగ సభలో సీఎం రేవంత్ రెడ్డి మాట్లాడుతూ, విధ్వంసమైన తెలంగాణ విద్యా విధానాన్ని వికాసం వైపు నడిపించే బృహత్తర కార్యానికి ఆరుట్ల పాఠశాల ఒక రోల్ మోడల్ గా, దిక్సూచిగా నిలుస్తుందని ఉద్ఘాటించారు.
**నిధుల లేమి లేదు.. చదువే మన భవిష్యత్తు పెట్టుబడి**
ప్రభుత్వ పాఠశాలల్లో చదివే వారిని తక్కువ చేసి చూసే పరిస్థితి మారాలని, అక్కడి నుంచే డాక్టర్లు, లాయర్లు, ఇంజనీర్లు, ఐఏఎస్, ఐపీఎస్ అధికారులు ఉద్భవించాలన్నదే తన లక్ష్యమని ముఖ్యమంత్రి స్పష్టం చేశారు. కేవలం ప్రభుత్వ సంక్షేమ పథకాలు మాత్రమే ప్రజల భవిష్యత్తును మార్చలేవని, పిల్లలు ఉన్నత చదువులు చదివినప్పుడే తల్లిదండ్రులు ఆత్మగౌరవంతో బతుకుతారని ఆయన హితవు పలికారు. దేశాన్ని ఏలిన గొప్ప గొప్ప నాయకులు, సాక్షాత్తూ తాను కూడా ప్రభుత్వ పాఠశాలలోనే చదువుకున్నానని సీఎం విద్యార్థులకు గుర్తుచేసి వారిలో ఆత్మవిశ్వాసం నింపారు. విద్యపై పెట్టే ప్రతి రూపాయిని భవిష్యత్తు పెట్టుబడిగా ప్రభుత్వం భావిస్తోందని వెల్లడించిన ఆయన, రాష్ట్ర బడ్జెట్ లో ఉన్న మూడు లక్షల కోట్లకు పైగా నిధులలో ఏకంగా 8 శాతానికి పైగా, అంటే సుమారు 26 వేల కోట్ల రూపాయలను కేవలం విద్యాశాఖ పైనే ఖర్చు చేస్తున్నామని సగర్వంగా ప్రకటించారు.
**ఆరుట్ల వీరుల స్ఫూర్తితో.. ‘నో అడ్మిషన్’ బోర్డుల వైపు**
తెలంగాణ సాయుధ రైతాంగ పోరాటంలో అలుపెరగని పోరాటం చేసిన వీరులు ఆరుట్ల రామచంద్రారెడ్డి, ఆరుట్ల కమలాదేవిల పాత్ర చిరస్మరణీయమని, ఆ మహనీయుల స్ఫూర్తితోనే ఆరుట్ల గ్రామంలో ఈ ప్రతిష్టాత్మక పాఠశాలను నిర్మించినట్లు సీఎం వివరించారు. ఈ పాఠశాలలో ప్రీ-ప్రైమరీ నుంచి ఇంటర్మీడియట్ వరకు విద్యాబోధన సాగుతుండగా, రికార్డు స్థాయిలో 1814 మంది విద్యార్థులు చేరడం ప్రభుత్వ పాఠశాలల పట్ల మారుతున్న దృక్పథానికి నిదర్శనమన్నారు. ప్రభుత్వ బడి గేటు బయట ‘సీట్లు ఖాళీ లేవు.. అడ్మిషన్లు పూర్తయ్యాయి’ అనే బోర్డు పెట్టే అద్భుతమైన పరిస్థితి రావడం పట్ల ఉపాధ్యాయులను, మేనేజ్మెంట్ కమిటీ సభ్యులను ముఖ్యమంత్రి ప్రత్యేకంగా అభినందించారు. విద్యతోనే సమాజంలో మార్పు రావాలని, అంటరానితనం, అసమానతలను పారద్రోలాలన్న లక్ష్యంతో కులమతాల అడ్డుగోడలు బద్దలుకొడుతూ ‘యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల’ నిర్మాణానికి ప్రభుత్వం నడుం బిగించిందని ఆయన స్పష్టం చేశారు.
**అంతర్జాతీయ ప్రమాణాలతో కిట్లు.. మాదక ద్రవ్యాలపై మహా సమరం**
ప్రభుత్వ బడుల విద్యార్థులకు అందించే స్కూల్ కిట్ల విషయంలో ప్రభుత్వం ఎక్కడా రాజీ పడటం లేదని సీఎం రేవంత్ రెడ్డి తేల్చి చెప్పారు. విద్యార్థులకు అత్యంత నాణ్యమైన స్కూల్ డ్రెస్సులు, షూలు, సాక్సులు, దుప్పట్లు, స్కూల్ బ్యాగులతో కూడిన కిట్లను అంతర్జాతీయ స్థాయి సంస్థలతో రూ. 688 కోట్లతో తయారు చేయిస్తున్నామని, జూలై ఆఖరు నుంచి వీటి పంపిణీ చేపడతామని ప్రకటించారు. మరోవైపు యువతను నిర్వీర్యం చేస్తున్న మాదక ద్రవ్యాల మహమ్మారిపై రాష్ట్ర ప్రభుత్వం ఉక్కుపాదం మోపుతోందన్నారు. ఈ దురలవాట్ల పట్ల విద్యార్థులను చైతన్యవంతం చేసేందుకు ఈ నెల 19వ తేదీన హైదరాబాద్ లోని ఎల్బీ స్టేడియం వేదికగా రాష్ట్ర గవర్నర్ సమక్షంలో వేలాది మంది విద్యార్థులతో డ్రగ్స్ కు వ్యతిరేకంగా భారీ ప్రమాణ స్వీకార కార్యక్రమాన్ని నిర్వహించనున్నట్లు తెలిపారు. ఎవరైనా గంజాయి తదితర మత్తు పదార్థాలు వాడుతున్నట్లు తెలిస్తే వెంటనే పోలీసులకు సమాచారం అందించాలని ఆయన విద్యార్థులను కోరారు.
**నైపుణ్యాభివృద్ధి, క్రీడలకు పెద్దపీట**
ఆర్టిఫిషియల్ ఇంటెలిజెన్స్ (ఏఐ) లాంటి ఆధునిక సాంకేతికతల రాకతో ప్రపంచవ్యాప్తంగా వైట్ కాలర్ ఉద్యోగాలకు ముప్పు పొంచి ఉన్న నేపథ్యంలో, యువతకు ప్రత్యేక నైపుణ్యాలు నేర్పించి ‘బ్లూ కాలర్’ ఉద్యోగాలు కల్పించాలనే సమున్నత ఆశయంతోనే రాష్ట్రంలో ‘స్కిల్స్ యూనివర్సిటీ’ని నెలకొల్పామని సీఎం తెలిపారు. ప్రారంభించిన తొలి ఏడాదే యువతకు అద్భుతమైన ఉద్యోగ, ఉపాధి అవకాశాలు లభించడం సంతోషకరమన్నారు. అలాగే క్రీడారంగానికి కూడా ప్రభుత్వం అత్యంత ప్రాధాన్యత ఇస్తోందని వివరించారు. 140 కోట్ల జనాభా ఉన్న మన దేశం ఒలింపిక్స్ లో కనీసం ఒక్క స్వర్ణ పతకం కూడా సాధించలేకపోవడం ఆవేదన కలిగిస్తోందని, ఈ పరిస్థితిని మార్చి మన యువతలో ఒలింపిక్ స్ఫూర్తిని రగిలించేందుకే పబ్లిక్-ప్రైవేట్ భాగస్వామ్యంతో ‘స్పోర్ట్స్ యూనివర్సిటీ’ని ప్రారంభించామన్నారు. క్రీడాకారుల్లో మరింత స్ఫూర్తిని నింపడానికే సాక్షాత్తూ ఫుట్ బాల్ ప్రపంచ దిగ్గజం లియోనెల్ మెస్సీని హైదరాబాద్ కు రప్పించిన విషయాన్ని ఈ సందర్భంగా ముఖ్యమంత్రి గుర్తుచేశారు. ఆరుట్ల మోడల్ స్కూల్ ను ఒక పాఠంగా తీసుకుని రాబోయే రోజుల్లో రాష్ట్ర వ్యాప్తంగా ఉన్న ప్రభుత్వ పాఠశాలలను మరింత అద్భుతంగా తీర్చిదిద్దుతామని ముఖ్యమంత్రి శ్రీ ఎ. రేవంత్ రెడ్డి స్పష్టం చేశారు.