సాంకేతిక విప్లవంతో విశ్వవేదికపై భారత్ విక్రమార్క మార్చ్!

సాంకేతిక విప్లవంతో విశ్వవేదికపై భారత్ విక్రమార్క మార్చ్!
* రెండు లక్షల స్టార్టప్‌లతో ప్రపంచాన్ని ఆకర్షిస్తున్న నవభారతం.
* వివాటెక్ సదస్సులో భారత సాంకేతిక సత్తాను చాటిన ప్రధాని నరేంద్ర మోదీ.
* గ్రామీణ జీవన ప్రమాణాలను మార్చేసిన ‘స్వామిత్వ’, ‘సరలాబెన్’ ఆవిష్కరణలు.

పారిస్, మహా.
అత్యాధునిక సాంకేతిక పరిజ్ఞానాన్ని కేవలం ప్రయోగశాలలకే పరిమితం చేయకుండా, సామాన్య గ్రామీణ కుటుంబాల ఆర్థిక భద్రతకు, గౌరవప్రదమైన జీవన ప్రమాణాల పెంపుదలకు ప్రధాన సాధనంగా మలిచామని భారత ప్రధానమంత్రి నరేంద్ర మోదీ సగర్వంగా ప్రకటించారు. ఫ్రాన్స్ రాజధాని పారిస్‌లో అత్యంత ప్రతిష్ఠాత్మకంగా జరుగుతున్న ‘వివాటెక్-2026’ అంతర్జాతీయ సాంకేతిక సదస్సులో ఆయన ప్రత్యేక ప్రసంగం చేశారు. ఈ సందర్భంగా దేశంలో సాంకేతికత అందిపుచ్చుకుని సాగుతున్న సామాజిక, ఆర్థిక విప్లవాన్ని ప్రపంచ దేశాల ప్రతినిధుల ముందు ఆవిష్కరించారు. ముఖ్యంగా కేంద్ర ప్రభుత్వం ప్రతిష్ఠాత్మకంగా అమలు చేస్తున్న ‘స్వామిత్వ’ పథకం.. ఆధునిక సాంకేతికత సాయంతో సామాన్యుల జీవితాలలో ఎలాంటి గుణాత్మక మార్పులు తీసుకురాగలదనే దానికి ఒక నిలువెత్తు నిదర్శనమని ప్రధాని మోదీ ఈ సందర్భంగా ప్రపంచానికి చాటిచెప్పారు.
ఆరు సంవత్సరాల క్రితం అత్యంత వ్యూహాత్మకంగా ప్రారంభమైన ఈ ‘స్వామిత్వ’ కార్యక్రమం ద్వారా దేశంలోని కుగ్రామాల్లో సైతం డ్రోన్లు, భౌగోళిక మ్యాపింగ్, డిజిటల్ సర్వే వంటి అత్యాధునిక సాంకేతికతలను విస్తృతంగా వినియోగిస్తున్నామని ప్రధాని వివరించారు. దీని ద్వారా కొన్ని దశాబ్దాలుగా గ్రామీణ ప్రాంతాల్లో ఉన్న ఆస్తుల వివాదాలకు శాశ్వత పరిష్కారం చూపుతూ, రైతులకు అధికారిక ఆస్తి హక్కుల పత్రాలను అందిస్తున్నట్లు పేర్కొన్నారు. ఈ మహత్తర యజ్ఞంలో భాగంగా ఇప్పటివరకు దేశవ్యాప్తంగా దాదాపు రెండు లక్షల గ్రామాల్లో 3.1 కోట్లకు పైగా డిజిటల్ ఆస్తి కార్డులను విజయవంతంగా జారీ చేశామని స్పష్టం చేశారు. దీనివల్ల ఎంతోమంది గ్రామీణులు తమ సొంత ఆస్తులను బ్యాంకు గ్యారంటీలుగా చూపిస్తూ, చట్టబద్ధమైన ఆర్థిక వనరులుగా మార్చుకునే అద్భుతమైన అవకాశం లభించిందని కొనియాడారు. ఒకవైపు ప్రభుత్వం ప్రజా సేవలను డిజిటల్ రూపంలో విప్లవాత్మకంగా విస్తరిస్తుంటే, మరోవైపు భారతీయ స్టార్టప్‌లు ప్రతి ఒక్క రంగంలోనూ మానవ జీవన సరళిని సంపూర్ణంగా మార్చేస్తున్నాయని మోదీ హర్షం వ్యక్తం చేశారు.
ఈ సందర్భంగా భారతీయ ఆవిష్కరణల సృజనాత్మకతను వివరిస్తూ.. ‘సరలాబెన్’ అనే సరికొత్త ఆర్టిఫిషియల్ ఇంటెలిజెన్స్ ఆధారిత అప్లికేషన్ గురించి ప్రధాని ప్రత్యేకంగా ప్రస్తావించారు. ఈ యాప్ ద్వారా దేశంలోని లక్షలాది మంది మహిళా పాడి రైతులకు వారి సొంత మాతృభాషలోనే పశువుల సంరక్షణ, పాల దిగుబడి నిర్వహణపై నిపుణులైన వైద్యుల సలహాలను ఎప్పటికప్పుడు అందిస్తూ అండగా నిలుస్తోందని కొనియాడారు. కేవలం ఐటీ రంగంలోనే కాకుండా గ్రామీణ మహిళలకు సైతం డ్రోన్ పైలట్లుగా శిక్షణ ఇస్తూ, పొలాల్లో ఎరువుల పిచికారీ, పంటల ఆరోగ్య పర్యవేక్షణ వంటి కీలక బాధ్యతల్లో వారిని భాగస్వామ్యం చేస్తున్నామని తెలిపారు. అంతరిక్ష సాంకేతికతను సామాన్యుడి చెంతకు చేర్చడంలో భాగంగా.. ఉపగ్రహ సమాచారం ఆధారంగా లక్షలాది మంది మత్స్యకారులు సముద్రంలో అనుకూలమైన చేపల వేట ప్రాంతాలను ముందే గుర్తిస్తున్నారని చెప్పారు. దీనివల్ల వారి ప్రయాణ సమయం, ఇంధనం భారీగా ఆదా అవ్వడమే కాకుండా, ఊహించని రీతిలో ఎక్కువ ఆదాయం లభిస్తోందని వివరించారు. ఈ వినూత్న సాంకేతిక పరిష్కారాలన్నీ కేవలం నగరాలకే పరిమితం కాకుండా, భారతదేశ పునాది అయిన గ్రామీణ స్థాయిలోనే సుసంపన్నతకు, సర్వతోముఖాభివృద్ధికి గట్టి దోహదం చేస్తున్నాయని మోదీ ఉద్ఘాటించారు.
ప్రస్తుత భారతదేశం అంతరిక్ష పరిశోధనల నుంచి అణుశక్తి రంగం వరకు మానవ మేధో సామర్థ్యాల హద్దులను నిరంతరం విస్తరిస్తూ దూసుకుపోతోందని ప్రధాని మోదీ ప్రపంచ దేశాలకు స్పష్టం చేశారు. ఇందులో భాగంగానే, గతంలో ఎవరికీ సాధ్యంకాని విధంగా చంద్రుడి దక్షిణ ధృవ ప్రాంతానికి సమీపంలో విజయవంతంగా ల్యాండ్ అయిన ప్రపంచంలోనే మొట్టమొదటి దేశంగా భారత్ సరికొత్త చరిత్ర సృష్టించిందని సగర్వంగా గుర్తుచేశారు. అలాగే రక్షణ, ఇంధన రంగాల్లో స్వయంసమృద్ధి సాధించే క్రమంలో.. ఇటీవల మన దేశీయ ‘ఫాస్ట్ బ్రీడర్ రియాక్టర్’ అత్యంత కీలకమైన మైలురాయిని చేరుకుందని వెల్లడించారు. ఈ విజయంతో థోరియం ఆధారిత మూడు దశల అణుశక్తి క్లిష్టమైన లక్ష్య సాధనకు భారతదేశం మరింత చేరవయ్యిందని ప్రధాని ప్రకటించారు.
ప్రస్తుతం సరికొత్త ఐడియాలతో దూసుకుపోతున్న భారతదేశంలో రెండు లక్షల కంటే ఎక్కువ స్టార్టప్‌లు అత్యంత చురుగ్గా కార్యకలాపాలు నిర్వహిస్తున్నాయని, దీనివల్ల ప్రపంచంలోనే అత్యంత వేగంగా ఎదుగుతున్న ఎకోసిస్టమ్‌గా భారత్ అవతరించిందని మోదీ స్పష్టం చేశారు. ప్రపంచంలోనే మొట్టమొదటి సింగిల్ పీస్ 3డీ ప్రింటెడ్ రాకెట్ ఇంజిన్ వంటి అద్భుత సృష్టితో పాటు, వైద్య రంగంలో విప్లవాత్మకమైన జన్యు చికిత్సలు, క్యాన్సర్‌ను ప్రాథమిక దశలోనే గుర్తించే ఏఐ వైద్య పరిష్కారాలు, తిరుగులేని సైబర్ భద్రతా సాంకేతికతలు, స్వయంచాలక రోబోలు, స్మార్ట్ సిటీలు, అలాగే ఆధునిక రవాణా వ్యవస్థకు సంబంధించిన ఎన్నో అధునాతన సాంకేతికతలను నేడు భారత్ ప్రపంచానికి గర్వంగా ప్రదర్శిస్తోందని వివరించారు. గ్లోబల్ ఇన్వెస్టర్లు, అంతర్జాతీయ సాంకేతిక నిపుణులు భారతీయ స్టార్టప్‌ల అద్భుత ఆవిష్కరణలను, వారి సృజనాత్మకతను ప్రత్యక్షంగా వీక్షించాలీ అంటే వివాటెక్ సదస్సులో ప్రత్యేకంగా ఏర్పాటు చేసిన ‘ఇండియా పెవిలియన్‌’ను తప్పకుండా సందర్శించాలని ప్రధానమంత్రి నరేంద్ర మోదీ ఈ సందర్భంగా ప్రపంచ పెట్టుబడిదారులకు పిలుపునిచ్చారు.