వాట్సాప్ యూజర్నేమ్ ఫీచర్పై కేంద్రం నజర్.
* ఆన్లైన్ మోసాలపై ఆందోళన.
ఢిల్లీ, మహా.
ప్రముఖ మెసేజింగ్ యాప్ వాట్సాప్ త్వరలో తీసుకురానున్న ‘యూజర్నేమ్’ సరికొత్త ఫీచర్పై కేంద్ర ప్రభుత్వం ప్రత్యేక దృష్టి సారించినట్లు జాతీయ మీడియాలో కథనాలు వెలువడుతున్నాయి. ఈ కొత్త ఫీచర్ కారణంగా ఆన్లైన్ మోసాలు మరింత పెరిగే అవకాశం ఉందన్న ఆందోళనల నేపథ్యంలో ప్రభుత్వం అప్రమత్తమైంది. ఈ మార్పుతో యూజర్ల భద్రత, వ్యక్తిగత డేటాపై ఎలాంటి ప్రభావం పడుతుందనే సున్నితమైన విషయాన్ని సంబంధిత ఉన్నతాధికారులు నిశితంగా సమీక్షిస్తున్నట్లు విశ్వసనీయ వర్గాలు పేర్కొన్నాయి.
వినియోగదారుల వ్యక్తిగత గోప్యతను మరింత కట్టుదిట్టం చేసే ఉద్దేశ్యంతోనే ఈ యూజర్నేమ్ ఫీచర్ను అందుబాటులోకి తెస్తున్నట్లు వాట్సాప్ మాతృసంస్థ ‘మెటా’ ఇదివరకే ప్రకటించింది. ఈ ఫీచర్ అందుబాటులోకి వస్తే అపరిచితులతో చాట్ చేసేటప్పుడు యూజర్లు తమ వ్యక్తిగత ఫోన్ నంబర్ను షేర్ చేయాల్సిన అవసరం ఏమాత్రం ఉండదు. కేవలం యూజర్నేమ్ ద్వారానే ఇతరులతో సంభాషించే అద్భుతమైన వెసులుబాటు కలుగుతుంది. ముఖ్యంగా కొత్తవారితో తొలిసారి చాటింగ్ చేసే సమయంలో వ్యక్తిగత భద్రతను కాపాడుకునేందుకు ఇది ఎంతగానో ఉపయోగపడుతుందని మెటా చెబుతోంది. ఇప్పటికే కొందరు యూజర్లకు ప్రయోగాత్మకంగా ఈ ఫీచర్ను అందుబాటులోకి తెచ్చిన సంస్థ, త్వరలోనే ప్రపంచవ్యాప్తంగా లాంచ్ చేయడానికి సన్నాహాలు చేస్తోంది.
ఈ ఫీచర్ వినియోగం గురించి మెటా స్పష్టతనిచ్చింది. ఇది అందుబాటులోకి రాగానే వినియోగదారులు ముందుగా తమ వాట్సాప్ను లేటెస్ట్ వెర్షన్కు అప్డేట్ చేసుకోవాల్సి ఉంటుంది. అనంతరం సెట్టింగ్స్లోకి వెళ్లి ‘సెలెక్టింగ్ యూజర్నేమ్’ అనే ఆప్షన్ను ఎంచుకుని, తమకు నచ్చిన పేరును వాట్సాప్ అకౌంట్కు క్రియేట్ చేసుకోవచ్చు. మరోవైపు, కంటెంట్ క్రియేటర్లు, భారీ కార్పొరేట్ సంస్థలు, చిన్న తరహా వ్యాపారులు తమ బ్రాండ్ ఐడెంటిటీ కోసం వివిధ మెటా ప్లాట్ఫారమ్లకు ఒకే యూజర్నేమ్ను ఎంచుకునే అవకాశాన్ని కూడా సంస్థ కల్పిస్తోంది. అంటే, ఇప్పటికే వారు వాడుతున్న ఇన్స్టాగ్రామ్, ఫేస్బుక్ యూజర్నేమ్లనే వాట్సాప్కు కూడా వినియోగించుకోవచ్చు. ఆయా దేశాల్లో ఈ ఫీచర్ పూర్తిగా అందుబాటులోకి వచ్చిన వెంటనే వినియోగదారులకు నేరుగా నోటిఫికేషన్ల ద్వారా సమాచారం అందిస్తామని మెటా స్పష్టం చేసింది.
