ఢిల్లీ, మహా.
దేశవ్యాప్తంగా పోర్నోగ్రఫీ నియంత్రణ కోసం ప్రత్యేక జాతీయ విధానం రూపొందించాలని కేంద్ర ప్రభుత్వాన్ని ఆదేశించాలంటూ దాఖలైన ప్రజాహిత వ్యాజ్యాన్ని సుప్రీంకోర్టు కొట్టివేసింది. మైనర్లను అశ్లీల కంటెంట్ ప్రభావం నుంచి రక్షించేందుకు ప్రత్యేక పాలసీ తీసుకురావాలని చేసిన విజ్ఞప్తిని తిరస్కరిస్తూ, విధాన నిర్ణయాలు ప్రభుత్వం, పార్లమెంట్ పరిధిలోని అంశాలని అత్యున్నత న్యాయస్థానం స్పష్టం చేసింది.
పిటిషన్పై విచారణ సందర్భంగా ధర్మాసనం కీలక వ్యాఖ్యలు చేసింది. అశ్లీల కంటెంట్ నియంత్రణ, దానికి సంబంధించిన విధానాల రూపకల్పన వంటి అంశాలు న్యాయస్థానాల పరిధిలోకి రావని పేర్కొంది. ప్రజాప్రయోజన అంశాలపై అవసరమైన సందర్భాల్లో కోర్టులు జోక్యం చేసుకోగలిగినా, కొత్త విధానాలను రూపొందించాలని ప్రభుత్వాన్ని ఆదేశించడం న్యాయవ్యవస్థ బాధ్యత కాదని స్పష్టం చేసింది.
విధాన నిర్ణయాలు తీసుకోవడం కార్యనిర్వాహక వ్యవస్థ, శాసనసభల అధికార పరిధిలోని అంశమని ధర్మాసనం పేర్కొంది. రాజ్యాంగబద్ధ వ్యవస్థలో అధికారాల విభజన సూత్రాన్ని గౌరవించడం అవసరమని, విధానాల రూపకల్పనలో కోర్టులు జోక్యం చేసుకోవడం సముచితం కాదని అభిప్రాయపడింది.
ఈ నేపథ్యంలో పిటిషన్ను కొట్టివేస్తూ, పోర్నోగ్రఫీ నియంత్రణకు సంబంధించి ఏవైనా కొత్త చట్టాలు లేదా విధానాలు అవసరమైతే వాటిపై నిర్ణయం తీసుకోవాల్సింది కేంద్ర ప్రభుత్వం, పార్లమెంటేనని సుప్రీంకోర్టు స్పష్టం చేసింది. దీంతో జాతీయ స్థాయిలో ప్రత్యేక పోర్నోగ్రఫీ నియంత్రణ విధానం కోరుతూ దాఖలైన ప్రజాహిత వ్యాజ్యానికి ముగింపు పడింది.
