తమిళనాడు ప్రభుత్వానికి సుప్రీంకోర్టులో కీలక ఊరట.
* చట్టంలోని నిబంధనలను పరిగణనలోకి తీసుకోవాలని వ్యాఖ్యలు
చెన్నై, మహా.
తమిళనాడు ప్రభుత్వానికి సుప్రీంకోర్టులో కీలక ఊరట లభించింది. రాష్ట్రంలో బక్రీద్ రోజుతో పాటు ఏ రోజూ ఆవులు, దూడలను వధ చేయరాదంటూ మద్రాస్ హైకోర్టు జారీ చేసిన ఆదేశాల అమలును సుప్రీంకోర్టు సోమవారం తాత్కాలికంగా నిలిపివేసింది. హైకోర్టు ఉత్తర్వులను సవాల్ చేస్తూ తమిళనాడు ప్రభుత్వం దాఖలు చేసిన పిటిషన్పై విచారణ చేపట్టిన అత్యున్నత న్యాయస్థానం ప్రతివాదులకు నోటీసులు జారీ చేస్తూ, తదుపరి విచారణ వరకు హైకోర్టు ఆదేశాల అమలుపై స్టే విధించింది.
జస్టిస్ విక్రమ్ నాథ్, జస్టిస్ సందీప్ మెహతాతో కూడిన ధర్మాసనం ఈ కేసును విచారించింది. హైకోర్టు ఉత్తర్వుల్లో సవరణ అవసరమున్నట్లు ప్రాథమికంగా భావించిన సుప్రీంకోర్టు, తదుపరి విచారణ పూర్తయ్యే వరకు ఆ ఉత్తర్వుల అమలును నిలిపివేస్తున్నట్లు ప్రకటించింది. దీంతో రాష్ట్ర ప్రభుత్వం కోరిన మధ్యంతర ఉపశమనం లభించినట్లైంది.
దాదాపు రెండు వారాల క్రితం తమిళనాడు ప్రభుత్వం సుప్రీంకోర్టును ఆశ్రయించింది. తమిళనాడు జంతు సంరక్షణ చట్టం–1958 ప్రకారం నిర్దిష్ట పరిస్థితుల్లో ఆవుల వధకు చట్టబద్ధంగా అనుమతి ఉన్నప్పటికీ, మద్రాస్ హైకోర్టు పూర్తిస్థాయి నిషేధం విధించడం చట్టానికి విరుద్ధమని ప్రభుత్వం తన పిటిషన్లో పేర్కొంది. చట్టం అనుమతించిన పరిస్థితులను పక్కనబెట్టి సంపూర్ణ నిషేధం విధించడం న్యాయపరంగా సమంజసం కాదని వాదించింది.
తమిళనాడు జంతు సంరక్షణ చట్టం–1958 ప్రకారం కొన్ని ప్రత్యేక పరిస్థితుల్లో మాత్రమే ఆవులను వధ చేయడానికి అనుమతి ఉంది. ఆవు పదేళ్లకు పైబడినట్లయితే, సంతానోత్పత్తికి లేదా వ్యవసాయ పనులకు పూర్తిగా పనికిరాని స్థితిలో ఉన్నట్లయితే, సంబంధిత అధికారుల నుంచి ధ్రువీకరణ పత్రం పొందిన తర్వాత మాత్రమే చట్టబద్ధంగా వధకు అనుమతి ఉంటుంది. ఈ నిబంధనలను ప్రభుత్వం తన వాదనలో ప్రధానంగా ప్రస్తావించింది.
ఇదిలా ఉండగా, ఈ ఏడాది మే 27న జస్టిస్ జీఆర్ స్వామినాథన్, జస్టిస్ వి లక్ష్మీనారాయణతో కూడిన మద్రాస్ హైకోర్టు ధర్మాసనం కీలక ఉత్తర్వులు జారీ చేసింది. గుర్తింపు పొందిన స్లాటర్ హౌస్లలో మాత్రమే జంతువుల వధ జరగాలని పేర్కొంటూనే, బక్రీద్ రోజుతో పాటు భవిష్యత్తులో ఏ రోజూ ఆవులు, దూడలను వధ చేయకుండా రాష్ట్ర ప్రధాన కార్యదర్శి, పోలీసు ఉన్నతాధికారులు చర్యలు తీసుకోవాలని ఆదేశించింది. ఈ ఉత్తర్వులను రాష్ట్రవ్యాప్తంగా కచ్చితంగా అమలు చేయాలని సంబంధిత అధికారులకు సూచనలు జారీ చేయాలని కూడా హైకోర్టు పేర్కొంది.
ప్రజా ప్రదేశాల్లో అక్రమంగా ఆవులను వధ చేస్తున్నారంటూ ఇందు మక్కల్ కచ్చి రాష్ట్ర ప్రధాన కార్యదర్శి సూర్య మద్రాస్ హైకోర్టులో ప్రజాహిత వ్యాజ్యం దాఖలు చేశారు. ఇప్పటికే అధికారులకు పలుమార్లు ఫిర్యాదు చేసినప్పటికీ తగిన చర్యలు తీసుకోలేదని ఆయన తన పిటిషన్లో పేర్కొన్నారు. ఈ పిటిషన్ విచారణ సందర్భంగా హైకోర్టు భారత రాజ్యాంగంలోని ఆర్టికల్–48ను ప్రస్తావించింది.
ఆర్టికల్–48 ప్రకారం పాడి పశువులు, దూడలు, వ్యవసాయానికి ఉపయోగపడే పశువుల వధను నిరోధించే చర్యలు తీసుకోవాలని రాష్ట్ర ప్రభుత్వాలకు రాజ్య విధాన మార్గదర్శక సూత్రాల రూపంలో సూచించబడింది. అయితే ఇవి నేరుగా కోర్టుల ద్వారా అమలు చేయదగిన ప్రాథమిక హక్కులు కాకపోవడంతో పాటు, అమల్లో ఉన్న చట్టాల పరిధిలోనే ప్రభుత్వాలు నిర్ణయాలు తీసుకోవాల్సి ఉంటుందని న్యాయ నిపుణులు పేర్కొంటున్నారు.
ప్రస్తుతం సుప్రీంకోర్టు హైకోర్టు ఉత్తర్వులకు తాత్కాలిక స్టే విధించడంతో, తమిళనాడు జంతు సంరక్షణ చట్టం–1958లో ఉన్న నిబంధనల ప్రకారమే వ్యవహారం కొనసాగనుంది. ఈ కేసుపై తదుపరి విచారణలో సుప్రీంకోర్టు తీసుకునే తుది నిర్ణయం రాష్ట్రంలోని పశువుల వధకు సంబంధించిన చట్టపరమైన విధానంపై కీలక ప్రభావం చూపే అవకాశం ఉంది.
