మూడు జిల్లాల్లో సీఎం రేవంత్ పర్యటన…..

మూడు జిల్లాల్లో సీఎం రేవంత్ పర్యటన.
* అమెజాన్ డేటా సెంటర్‌కు భూమిపూజ.
* అమరరాజా యూనిట్ ప్రారంభం.
హైదరాబాద్, మహా.
తెలంగాణ ముఖ్యమంత్రి ఎ. రేవంత్ రెడ్డి బుధవారం రంగారెడ్డి, మహబూబ్‌నగర్, వనపర్తి జిల్లాల్లో విస్తృతంగా పర్యటించనున్నారు. రాష్ట్రంలో పెట్టుబడులు, పారిశ్రామికాభివృద్ధి, విద్యా మౌలిక వసతుల బలోపేతానికి సంబంధించిన కీలక కార్యక్రమాల్లో పాల్గొననున్నారు. అమెజాన్ డేటా సెంటర్‌కు భూమిపూజ చేయడం, అమరరాజా సెల్ తయారీ యూనిట్‌ను ప్రారంభించడం, ప్రభుత్వ బాలికల ఉన్నత పాఠశాల నూతన భవనాన్ని ప్రారంభించడం ఈ పర్యటనలో ప్రధాన ఆకర్షణలుగా నిలవనున్నాయి.
ముఖ్యమంత్రి అధికారిక పర్యటన షెడ్యూల్ ప్రకారం.. బుధవారం మధ్యాహ్నం 12 గంటలకు శంషాబాద్‌లోని రాజీవ్ గాంధీ అంతర్జాతీయ విమానాశ్రయం నుంచి హెలికాప్టర్‌లో రంగారెడ్డి జిల్లా ఫ్యూచర్ సిటీకి బయలుదేరుతారు. మధ్యాహ్నం 12:15 గంటలకు అక్కడికి చేరుకుని 12:15 నుంచి 12:45 గంటల వరకు అమెజాన్ డేటా సెంటర్ నిర్మాణానికి భూమిపూజ కార్యక్రమంలో పాల్గొంటారు. రాష్ట్రానికి భారీ పెట్టుబడులు, సమాచార సాంకేతిక రంగంలో ఉపాధి అవకాశాలను పెంచే దిశగా ఈ ప్రాజెక్టు కీలకంగా మారనుందని ప్రభుత్వం భావిస్తోంది.
అనంతరం మధ్యాహ్నం 12:50 గంటలకు ఫ్యూచర్ సిటీ నుంచి మహబూబ్‌నగర్ జిల్లా దివిటిపల్లికి హెలికాప్టర్‌లో బయలుదేరుతారు. మధ్యాహ్నం 1:15 గంటలకు అక్కడికి చేరుకుని 1:20 నుంచి 2:20 గంటల వరకు అమరరాజా సెల్ తయారీ యూనిట్‌ను ప్రారంభించనున్నారు. ఈ సందర్భంగా తయారీ కేంద్రాన్ని పరిశీలించి, సంస్థ ప్రతినిధులతో సమావేశమవడంతో పాటు ఏర్పాటు చేసిన బహిరంగ సభలో ప్రసంగించనున్నారు. విద్యుత్ వాహనాల తయారీ రంగంలో తెలంగాణను అగ్రగామిగా నిలబెట్టే దిశగా ఈ యూనిట్ కీలక పాత్ర పోషించనుందని ప్రభుత్వం పేర్కొంటోంది.
ఆ తర్వాత మధ్యాహ్నం 2:20 గంటలకు దివిటిపల్లి నుంచి వనపర్తి జిల్లా కొత్తకోటకు బయలుదేరనున్న ముఖ్యమంత్రి 2:40 గంటలకు అక్కడికి చేరుకుంటారు. మధ్యాహ్నం 2:45 నుంచి 3:45 గంటల వరకు ప్రభుత్వ బాలికల ఉన్నత పాఠశాల నూతన భవనాన్ని ప్రారంభిస్తారు. అనంతరం విద్యార్థినులతో ముఖాముఖి నిర్వహించి వారి విద్య, భవిష్యత్ లక్ష్యాలు, ప్రభుత్వ విద్యా సదుపాయాలపై అభిప్రాయాలు తెలుసుకోనున్నారు.
పర్యటన ముగిసిన అనంతరం మధ్యాహ్నం 3:45 గంటలకు కొత్తకోట నుంచి హెలికాప్టర్‌లో హైదరాబాద్‌కు తిరుగు ప్రయాణం కానున్నారు. ముఖ్యమంత్రి పర్యటన నేపథ్యంలో ఆయా జిల్లాల్లో అధికారులు అన్ని ఏర్పాట్లు పూర్తి చేయగా, భద్రతా ఏర్పాట్లను కూడా కట్టుదిట్టం చేశారు. రాష్ట్ర పారిశ్రామిక, సాంకేతిక, విద్యా రంగాల అభివృద్ధికి ఈ పర్యటనలో జరిగే కార్యక్రమాలు కీలక మైలురాయిగా నిలుస్తాయని అధికార వర్గాలు భావిస్తున్నాయి.