- పార్టీపై పట్టు సాధించిన సీఎం రేవంత్
- అన్ని అధికారాలు ఇచ్చిన అధిష్టానం
- తిరుగుబాటుదారులపై చర్యలకు పూర్తి అధికారం
- ఏఐసీసీ భేటీలో కీలక అధికారాలు ఇచ్చిన అధినాయకత్వం
- ఆగస్టు మూడవ వారంలో మంత్రివర్గ విస్తరణ
హైదరాబాద్, మహా : రాష్ట్ర కాంగ్రెస్ లో క్రమక్రమంగా పెరుగుతున్న అంతర్గత విభేదాలు, బహిరంగ వాగ్వాదాలను తీవ్రంగా పరిగణిస్తూ తెలంగాణ ప్రదేశ్ కాంగ్రెస్ కమిటీ (టీపీసీసీ)లోని తిరుగుబాటుదారులకు అఖిల భారత కాంగ్రెస్ కమిటీ (ఏఐసీసీ) గట్టి హెచ్చరిక జారీ చేసింది. పార్టీ గీత దాటిన నాయకులపై సస్పెన్షన్తో సహా కఠినమైన క్రమశిక్షణా చర్యలు తీసుకునేందుకు ముఖ్యమంత్రి ఎ. రేవంత్ రెడ్డి, టీపీసీసీ అధ్యక్షుడు బి. మహేష్ కుమార్ గౌడ్లకు హైకమాండ్ పూర్తి అధికారాన్ని ఇచ్చింది.
న్యూఢిల్లీలో ఏఐసీసీ ప్రధాన కార్యదర్శి (సంస్థాగత) కె.సి. వేణుగోపాల్, రాష్ట్ర ఇన్చార్జ్ మీనాక్షి నటరాజన్, సీఎం రేవంత్ రెడ్డి, టీపీసీసీ చీఫ్ మహేష్ గౌడ్ల సమక్షంలో జరిగిన ఉన్నత స్థాయి రాజకీయ సంప్రదింపుల సందర్భంగా, ఇటీవలి అంతర్గత కలహాలపై హైకమాండ్ తీవ్ర అసంతృప్తిని వ్యక్తం చేసింది. పార్టీ తిరుగుబాటుదారుల నుండి వచ్చే ప్రత్యక్ష విజ్ఞప్తులను లేదా ఫిర్యాదులను కేంద్ర నాయకత్వం స్వీకరించబోదని వేణుగోపాల్ స్పష్టం చేశారు. పార్టీ క్రమశిక్షణను అమలు చేయడంలో రాష్ట్ర నాయకత్వానికి అచంచలమైన మద్దతు ఉంటుందని ఆయన హామీ ఇచ్చారు.
ఆగస్టులో మంత్రివర్గ విస్తరణ
సంస్థాగత ప్రక్షాళనతో పాటు, చాలా కాలంగా పెండింగ్లో ఉన్న మంత్రివర్గ విస్తరణ, కీలక ప్రభుత్వ పదవుల భర్తీపై చర్చలు జరిగాయి. వచ్చే నెల మొదటి లేదా రెండవ వారంలో ఈ విస్తరణ జరుగుతుందని విస్తృతంగా భావిస్తున్నారు. ముఖ్యమంత్రి రేవంత్ రెడ్డి, టీపీసీసీ చీఫ్ మహేష్ గౌడ్ సంయుక్తంగా చేసిన సిఫార్సులను, రాష్ట్ర ఇన్చార్జి మీనాక్షి నటరాజన్ ద్వారా పరిశీలించి, మంత్రి పదవులను కచ్చితంగా ఖరారు చేస్తారని హైకమాండ్ వర్గాలు ధృవీకరించాయి.
నల్గొండలో తీవ్రమవుతున్న వివాదం
పార్టీ ప్రతిష్టను దెబ్బతీస్తున్న వరుస బహిరంగ ఘర్షణల నేపథ్యంలో హైకమాండ్ ఈ కఠిన వైఖరిని తీసుకుంది. మంత్రి కోమటిరెడ్డి వెంకట్ రెడ్డి, ఆయన సోదరుడు, మునుగోడు ఎమ్మెల్యే కోమటిరెడ్డి రాజగోపాల్ రెడ్డిలపై తుంగతుర్తి దళిత ఎమ్మెల్యే మండుల శామ్యూల్ చేసిన సంచలన బహిరంగ ప్రకటన దీనికి ప్రధాన కారణం. ప్రోటోకాల్ లేకుండా తన నియోజకవర్గానికి వచ్చి, స్థానిక వ్యవహారాల్లో జోక్యం చేసుకుంటున్నారంటూ శామ్యూల్ ఆ సోదరులపై తీవ్రంగా మండిపడ్డారు. కామారెడ్డిలో ప్రభుత్వ సలహాదారు మహమ్మద్ షబ్బీర్ అలీ, జడ్చర్ల ఎమ్మెల్యే అనిరుధ్ రెడ్డి చేసిన వివాదాస్పద వ్యాఖ్యలను కూడా ఏఐసిసి గమనించింది.
క్యాబినెట్ బెర్త్ల కోసం అంతర్గత పోరాటం
కోమటిరెడ్డి రాజగోపాల్ రెడ్డిని క్యాబినెట్లోకి తీసుకోకుండా అడ్డుకోవడానికి జరుగుతున్న పెద్ద అంతర్గత పోరాటంలో భాగంగానే నల్గొండలో ఇటీవల చోటుచేసుకున్న ఘర్షణను రాజకీయ పరిశీలకులు చూస్తున్నారు. ‘ఒక కుటుంబానికి, ఒకే క్యాబినెట్ పదవి’ అనే సూత్రాన్ని లేవనెత్తుతూ, బీసీ లేదా ఎస్టీ ప్రతినిధులకు ఖాళీ బెర్త్లను కేటాయించాలని నాయకత్వాన్ని కోరాయి. త్వరలోనే కొంత మంది నేతలకు షోకాజ్ నోటీసులు జారీ చేయడానికి, దశలవారీ చర్యలు ప్రారంభించడానికి పార్టీ క్రమశిక్షణా కమిటీ వచ్చే వారంలో కీలక సమావేశాలు నిర్వహించే అవకాశం ఉంది.
