సాయం చేయబోయి కాటికి….

సాయం చేయబోయి కాటికి.
* జార్ఖండ్‌లో నెత్తురోడిన రహదారి!
* జనంపైకి దూసుకెళ్లిన 18 చక్రాల మృత్యుశకటం.
* ముగ్గురు మహిళలు, ముగ్గురు చిన్నారులు సహా ఏడుగురి దుర్మరణం
రాంచీ,మహా.
ఆపదలో ఉన్నవారికి సాయం చేద్దామని వెళ్లిన ఆ అమాయకులను మృత్యువు వెక్కిరించింది. కళ్లెదుటే జరిగిన ఓ చిన్న ప్రమాదంలో బాధితుడిని కాపాడేందుకు పరుగులు తీసిన వారిపైకి ఓ భారీ లారీ మృత్యుశకటంలా దూసుకొచ్చింది. రెప్పపాటులో జరిగిన ఈ ఘోర రోడ్డు ప్రమాదం ఏడుగురిని బలితీసుకోగా, మృతుల్లో ముగ్గురు మహిళలు, ముగ్గురు పసికందులు ఉండటం అందరినీ కలచివేసింది. ఈ హృదయ విదారక ఘటన జార్ఖండ్‌లోని ఖుంటి జిల్లాలో శుక్రవారం చోటుచేసుకుంది.
స్థానికులు, పోలీసుల వివరాల ప్రకారం కర్రా–తోర్పా ప్రధాన రహదారిపై ఉన్న జోనే–లుద్రూ మలుపు వద్ద ఓ స్కూటీ అదుపుతప్పి పక్కనే ఉన్న కాలువలో పడిపోయింది. చీకట్లో జరిగిన ఈ ప్రమాదాన్ని గమనించిన స్థానికులు.. వెంటనే బాధితుడిని రక్షించేందుకు రోడ్డు మీదికి పరుగులు తీశారు. కొందరు మహిళలు, చిన్నారులు సైతం అక్కడికి చేరుకుని గుంపుగా నిలబడ్డారు. సరిగ్గా అదే సమయంలో తోర్పా వైపు నుంచి ఓ 18 చక్రాల భారీ లారీ అత్యంత వేగంగా దూసుకొచ్చింది. కటిక చీకటి ఉండటం, దానికి తోడు అది మలుపు కావడంతో రోడ్డుపై ఉన్న జనసమూహాన్ని డ్రైవర్ గమనించలేకపోయాడు. కనీసం బ్రేక్ వేసేలోపే లారీ వారిని కిరాతకంగా తొక్కుకుంటూ ముందుకెళ్లింది.
ఈ ఊహించని ఘోరంతో లారీ చక్రాల కింద నలిగి ఆరుగురు అక్కడికక్కడే ప్రాణాలు వదిలారు. నెత్తురోడిన దేహాలతో ఆ రహదారి భయానకంగా మారింది. తీవ్రంగా గాయపడిన మరో వ్యక్తిని ఆసుపత్రికి తరలించగా, అక్కడ చికిత్స పొందుతూ కన్నుమూశాడు. ప్రాణాపాయ స్థితిలో ఉన్న ఓ బాలికను ఖుంటి సదర్ ఆసుపత్రికి తరలించి అత్యవసర వైద్యం అందిస్తున్నారు. ప్రమాదం జరిగిన వెంటనే డ్రైవర్, క్లీనర్ లారీని అక్కడే వదిలేసి చీకట్లో పరారయ్యారు. ఘటనా స్థలానికి చేరుకున్న ఖుంటి జిల్లా ఎస్పీ రిషబ్ గార్గ్ పరిస్థితిని సమీక్షించారు. రాత్రి పూట మలుపు వద్ద జనం ఉండటాన్ని డ్రైవర్ గమనించకపోవడం వల్లే ఈ ఘోరం జరిగి ఉంటుందని ఆయన ప్రాథమికంగా భావిస్తున్నారు. అయితే, డ్రైవర్ మద్యం మత్తులో లారీ నడిపాడని స్థానికులు ఆరోపిస్తుండటంతో పోలీసులు ఆ కోణంలోనూ దర్యాప్తు ముమ్మరం చేశారు. పరారీలో ఉన్న నిందితుల కోసం గాలింపు చేపట్టారు.
బాధితులకు సాయం చేయబోయి రెండు కుటుంబాలకు చెందిన ఏడుగురు ఒకేసారి ప్రాణాలు కోల్పోవడంతో ఆ గ్రామంలో మిన్నంటిన రోదనలతో విషాద ఛాయలు అలుముకున్నాయి. ఈ ఘోర ప్రమాదంపై రాష్ట్రపతి ద్రౌపది ముర్ము, ప్రధానమంత్రి నరేంద్ర మోదీ, జార్ఖండ్ ముఖ్యమంత్రి హేమంత్ సోరెన్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి ప్రకటించారు. బాధిత కుటుంబాలకు తగిన న్యాయం చేసి, గాయపడిన బాలికకు మెరుగైన వైద్యం అందించాలని స్థానికులు డిమాండ్ చేస్తున్నారు. రోడ్డు భద్రతా చర్యలు, మలుపుల వద్ద హెచ్చరిక బోర్డుల ఆవశ్యకతను ఈ నెత్తుటి ఘటన మరోసారి గుర్తుచేస్తోంది.