ఆర్టీసీ కార్మికులకు అవమానం…

ఆర్టీసీ కార్మికులకు అవమానం.
* డీఎం తీరుపై మంత్రి పొన్నం ఫైర్!
* సిద్దిపేట డిపోలో కార్మికులను నేలపై కూర్చోబెట్టిన ఘటనపై సమగ్ర విచారణకు ఆదేశం.
హైదరాబాద్, మహా.
సిద్దిపేట ఆర్టీసీ డిపోలో కార్మికులను అవమానించేలా డిపో మేనేజర్ (డీఎం) వ్యవహరించిన తీరుపై రాష్ట్ర రవాణా శాఖ మంత్రి పొన్నం ప్రభాకర్ తీవ్ర స్థాయిలో అగ్గిమీద గుగ్గిలమయ్యారు. అధికారులు కుర్చీల్లో దర్జాగా కూర్చుని, రాత్రింబవళ్లు సంస్థ కోసం కష్టపడే కార్మికులను కింద నేలపై కూర్చోబెట్టి సమావేశం నిర్వహించడం పట్ల ఆయన తీవ్ర ఆగ్రహం వ్యక్తం చేశారు. ఈ ఘటనకు సంబంధించిన దృశ్యాలు సామాజిక మాధ్యమాల్లో చక్కర్లు కొట్టి తన దృష్టికి రావడంతో మంత్రి తక్షణమే స్పందించారు. కార్మికుల ఆత్మగౌరవాన్ని దెబ్బతీసేలా వ్యవహరించిన అధికారుల తీరును తీవ్రంగా తప్పుబట్టిన ఆయన.. ఈ వ్యవహారంపై తక్షణమే సమగ్ర విచారణ జరిపించాలని ఆర్టీసీ ఎండీని ఆదేశించారు.
ప్రజా పాలన అందిస్తున్న తమ ప్రభుత్వంలో కార్మికుల సంక్షేమానికి, వారి ఆత్మగౌరవానికి అత్యంత ప్రాధాన్యత ఉంటుందని మంత్రి పొన్నం ప్రభాకర్ స్పష్టం చేశారు. సంస్థ అభివృద్ధిలో కీలక పాత్ర పోషిస్తూ, నిరంతరం శ్రమిస్తున్న కార్మికులను ప్రతి అధికారి ఎంతో గౌరవంగా చూసుకోవాల్సిన కనీస బాధ్యత ఉందని ఆయన గుర్తుచేశారు. కార్మికుల పట్ల ఇలా నిర్లక్ష్యంగా, అగౌరవంగా వ్యవహరించే అధికారులను ఎట్టి పరిస్థితుల్లోనూ ఉపేక్షించేది లేదని, విచారణలో బాధ్యులుగా నిర్ధారణ అయిన వారిపై కఠిన చర్యలు తీసుకోవాలని ఆర్టీసీ యాజమాన్యానికి ఆయన తేల్చిచెప్పారు.
మంత్రి తాజా ఆదేశాల నేపథ్యంలో ఆర్టీసీ ఉన్నతాధికారులు సిద్దిపేట డిపో ఘటనపై లోతైన విచారణను ప్రారంభించారు. అసలు ఆ సమావేశంలో కార్మికులు నేలపై ఎందుకు కూర్చోవాల్సి వచ్చింది, వారికి కుర్చీలు ఎందుకు ఏర్పాటు చేయలేదు, ఉద్దేశపూర్వకంగానే అధికారులు అలా వ్యవహరించారా అన్న కోణాల్లో ఈ విచారణ నివేదిక పూర్తి స్పష్టత ఇవ్వనుంది. సంస్థ కోసం అహర్నిశలు శ్రమిస్తున్న తమను చిన్నచూపు చూసిన అధికారుల వ్యవహారశైలిపై రగిలిపోతున్న కార్మిక వర్గాలు.. విచారణ అనంతరం బాధ్యులపై యాజమాన్యం ఎలాంటి కొరడా ఝుళిపిస్తుందోనని ఆసక్తిగా ఎదురుచూస్తున్నాయి.