గ్రేటర్ సమరానికి గ్రీన్ సిగ్నల్.

గ్రేటర్ సమరానికి గ్రీన్ సిగ్నల్.
* 300 వార్డులతో జీహెచ్‌ఎంసీ తుది నోటిఫికేషన్ విడుదల.
* భాగ్యనగర పాలనలో పెను మార్పు.
* 150 నుంచి 300కు పెరిగిన డివిజన్లు.
* 12 జోన్లు, 60 సర్కిళ్లుగా గ్రేటర్ హైదరాబాద్ విస్తరణ
* జీహెచ్‌ఎంసీ వార్డుల డీలిమిటేషన్ పూర్తి.
* జనాభా ప్రాతిపదికన హైదరాబాద్ పునర్విభజన ఖరారు.
హైదరాబాద్, మహా.

హైదరాబాద్ మహానగర పాలక సంస్థ (జీహెచ్‌ఎంసీ) పునర్విభజన ప్రక్రియలో అత్యంత కీలకమైన ఘట్టం ముగిసింది. నగర విస్తరణ, జనాభా పెరుగుదలకు అనుగుణంగా ప్రభుత్వం గురువారం వార్డుల పునర్విభజనపై తుది నోటిఫికేషన్‌ను విడుదల చేసింది. ఈ గెజిట్ ప్రకారమే ఇకపై గ్రేటర్ హైదరాబాద్ పాలన సాగనుంది. ముఖ్యంగా ఔటర్ రింగ్ రోడ్డు (ఓఆర్ఆర్) లోపల ఉన్న 20 మున్సిపాలిటీలు , 7 కార్పొరేషన్లను జీహెచ్‌ఎంసీలో విలీనం చేసిన నేపథ్యంలో, పాత 150 వార్డుల స్థానంలో కొత్తగా 300 వార్డులను ఏర్పాటు చేశారు. పెరిగిన వార్డుల సంఖ్యకు అనుగుణంగా పరిపాలనా వికేంద్రీకరణ కోసం గతంలో ఉన్న 6 జోన్లను 12కు, అలాగే 30 సర్కిళ్లను 60కి పెంచుతూ మున్సిపల్ శాఖ నిర్ణయం తీసుకుంది.
ఈ డీలిమిటేషన్ ప్రక్రియలో అధికారులు శాస్త్రీయ విధానాన్ని అనుసరించారు. 2011 జనాభా లెక్కలతో పాటు ప్రస్తుత జనాభా వృద్ధిని పరిగణనలోకి తీసుకుని, ప్రతి వార్డులోనూ ఓటర్ల సంఖ్య వీలైనంత సమానంగా ఉండేలా జాగ్రత్తలు తీసుకున్నారు. వార్డు సరిహద్దులను గుర్తించడంలో గందరగోళం తలెత్తకుండా ప్రధాన రహదారులు, రైల్వే లైన్లు, నాలాలను భౌగోళిక సరిహద్దులుగా ఖరారు చేశారు. ఈ కొత్త విభజన వల్ల ఓటర్లకు తమ వార్డు పరిధిపై స్పష్టత రావడమే కాకుండా, స్థానిక ప్రజాప్రతినిధులు తమ పరిధిలోని సమస్యలను మరింత సమర్థవంతంగా పరిష్కరించే అవకాశం కలుగుతుంది. గతంలో భారీ జనాభా ఉన్న వార్డులలో అభివృద్ధి పనులు, నిధుల కేటాయింపులో ఎదురైన సవాళ్లను దృష్టిలో ఉంచుకుని ఈ సమతుల్యతను సాధించారు.
డిసెంబర్ 9న విడుదలైన ప్రాథమిక నోటిఫికేషన్‌పై ప్రజల నుంచి ,వివిధ రాజకీయ పార్టీల నుంచి సుమారు 6 వేలకు పైగా అభ్యంతరాలు రాగా, అధికారులు వాటిని క్షుణ్ణంగా పరిశీలించారు. సహేతుకమైన సూచనలను పరిగణనలోకి తీసుకున్న తర్వాతే ప్రభుత్వం ఈ తుది నోటిఫికేషన్‌ను ఖరారు చేసింది. ఈ ప్రక్రియ ముగియడంతో ఇప్పుడు నగరంలో రాజకీయ వాతావరణం వేడెక్కింది. సరిహద్దుల మార్పు వల్ల పాత రాజకీయ సమీకరణాలు తారుమారయ్యే అవకాశం ఉన్నందున కాంగ్రెస్, బీఆర్ఎస్, బీజేపీ, ఎంఐఎం వంటి ప్రధాన పార్టీలు ఇప్పటికే తమ వ్యూహాలకు పదును పెడుతున్నాయి. ఈ తుది గెజిట్ ఆధారంగానే తదుపరి దశలో ఓటర్ల జాబితా తయారీ, ఎస్సీ, ఎస్టీ, బీసీ మరియు మహిళా రిజర్వేషన్ల ఖరారు ప్రక్రియ ప్రారంభం కానుంది. డిజిటల్ మ్యాపింగ్ ద్వారా రూపొందించిన కొత్త వార్డుల వివరాలను జీహెచ్‌ఎంసీ అధికారిక వెబ్‌సైట్‌లో ప్రజలకు అందుబాటులో ఉంచారు.