- బాల మేధావుల సాహసానికి జాతీయ వందనం.
- రాష్ట్రపతి చేతుల మీదుగా పీఎం రాష్ట్రీయ బాల్ పురస్కారాల ప్రదానం.
ఢిల్లీ,మహా.
తమ వయసును మించిన ధైర్యసాహసాలు ప్రదర్శించిన చిన్నారులను, వివిధ రంగాల్లో అసాధారణ ప్రతిభ కనబరిచిన బాలలను భారత ప్రభుత్వం అత్యున్నత పురస్కారాలతో గౌరవించింది. ‘వీర్ బాల్ దివస్’ సందర్భంగా న్యూఢిల్లీలోని రాష్ట్రపతి భవన్లో శుక్రవారం నిర్వహించిన ఘనమైన వేడుకలో రాష్ట్రపతి ద్రౌపదీ ముర్ము మొత్తం 20 మంది చిన్నారులకు ‘ప్రధానమంత్రి రాష్ట్రీయ బాల పురస్కార్-2025’ అందజేశారు. సిక్కు గురువు గురుగోవింద్ సింగ్ కుమారులైన సాహెబ్జాదేల త్యాగాలను స్మరించుకుంటూ జరుపుకునే ఈ వేడుకలో, నేటి తరం బాల వీరుల గాథలు అందరినీ కంటతడి పెట్టించడమే కాకుండా గర్వపడేలా చేశాయి.
ఈ ఏడాది పురస్కార గ్రహీతల్లో తమిళనాడులోని కోయంబత్తూరుకు చెందిన ఎనిమిదేళ్ల వ్యోమప్రియ సాహసం ప్రత్యేకంగా నిలిచింది. తన అపార్ట్మెంట్లోని పార్కులో ఆడుకుంటున్న సమయంలో విద్యుత్ ఘాతానికి గురైన స్నేహితుడిని ప్రాణాలకు తెగించి కాపాడిన వ్యోమప్రియ, అదే క్రమంలో తాను విగతజీవిగా మారింది. మరణానంతరం ఆమెకు ప్రకటించిన ఈ సాహస పురస్కారాన్ని రాష్ట్రపతి చేతుల మీదుగా ఆమె తల్లిదండ్రులు స్వీకరించినప్పుడు రాష్ట్రపతి భవన్లో భావోద్వేగ వాతావరణం నెలకొంది. మరోవైపు పంజాబ్ సరిహద్దు గ్రామానికి చెందిన పదేళ్ల శ్రావణ్ సింగ్ ప్రదర్శించిన దేశభక్తి ప్రశంసలందుకుంది. సరిహద్దుల్లో ఉద్రిక్తతలు ఉన్నప్పటికీ ప్రాణాలకు తెగించి ప్రతిరోజూ ఫార్వర్డ్ పోస్ట్ల వద్దకు వెళ్లి సైనికులకు పాలు, ఆహారం అందిస్తూ తన వంతు సామాజిక సేవ చేసినందుకు అతడికి ఈ గౌరవం దక్కింది.
క్రీడారంగంలో బీహార్కు చెందిన 14 ఏళ్ల క్రికెట్ సంచలనం వైభవ్ సూర్యవంశీ ఈ అత్యున్నత పురస్కారాన్ని అందుకున్నారు. కేవలం 13 ఏళ్లకే రంజీ క్రికెట్లో అడుగుపెట్టడమే కాకుండా, ఐపీఎల్ వేలంలో అత్యంత పిన్న వయసులో రికార్డు ధర దక్కించుకుని, ప్రపంచ క్రికెట్ దృష్టిని ఆకర్షించినందుకు అతడి ప్రతిభను ప్రభుత్వం గుర్తించింది. వైభవ్తో పాటుగా తెలంగాణ నుంచి అంతర్జాతీయ స్కేటింగ్లో 43కు పైగా పతకాలు సాధించిన జెమ్మీ రాజ్ మాత్రపు, ఆంధ్రప్రదేశ్ నుంచి పారా అథ్లెటిక్స్లో రాణిస్తున్న శివాని హోసూరు ఉప్పర కూడా రాష్ట్రపతి చేతుల మీదుగా పురస్కారాలు అందుకుని తెలుగు రాష్ట్రాల కీర్తిని చాటారు.
ఈ పురస్కారాలను సాహసం, కళా సాంస్కృతిక, ఆవిష్కరణలు, విద్యా ప్రతిభ, సామాజిక సేవ మరియు క్రీడలు అనే ఆరు విభాగాల్లో పంపిణీ చేశారు. విజేతలుగా నిలిచిన 11 మంది బాలురు, 9 మంది బాలికలకు పతకం, సర్టిఫికేట్తో పాటు లక్ష రూపాయల నగదు బహుమతిని అందజేశారు. కార్యక్రమం ముగింపులో రాష్ట్రపతి మాట్లాడుతూ, నేటి చిన్నారులే రేపటి భారత నిర్మాణంలో కీలక పాత్ర పోషిస్తారని, ఈ బాల మేధావుల విజయాలు దేశంలోని కోట్లాది మంది విద్యార్థులకు కొత్త ఉత్సాహాన్ని మరియు స్ఫూర్తిని అందిస్తాయని కొనియాడారు. ఈ వేడుకలో కేంద్ర మంత్రులు, పలువురు ప్రముఖులతో పాటు విజేతల కుటుంబ సభ్యులు పాల్గొన్నారు.
