చల్లారిన యుద్ధ భయం.. భారీగా దిగొచ్చిన చమురు!

చల్లారిన యుద్ధ భయం.. భారీగా దిగొచ్చిన చమురు!
* అమెరికా అధ్యక్షుడు డొనాల్డ్ ట్రంప్ చేసిన సంచలన ప్రకటనతో అంతర్జాతీయ మార్కెట్లకు భారీ ఊరట.
* ఏకంగా 13 శాతం పతనమైన బ్రెంట్ క్రూడ్.
* సెంచరీ దిగువకు చేరి 96 డాలర్ల వద్ద నమోదు.
* ఒక్క ప్రకటనతో 17 డాలర్ల మేర కిందికి దిగొచ్చిన ధరలు.

హైదరాబాద్, మహా.

పశ్చిమాసియాలో నెలకొన్న యుద్ధ మేఘాలు కాస్త విడిపోవడంతో ప్రపంచవ్యాప్తంగా చమురు మార్కెట్లు ఒక్కసారిగా కుదుటపడ్డాయి. ఇరాన్‌పై సైనిక దాడులను తాత్కాలికంగా నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ చేసిన ఒకే ఒక్క ప్రకటన అంతర్జాతీయ మార్కెట్లలో తీవ్ర సంచలనం సృష్టించింది. రోజుల వ్యవధిలోనే ఆకాశాన్ని తాకిన ముడి చమురు ధరలు ఈ సానుకూల పరిణామంతో అమాంతం దిగివచ్చాయి. ఇరాన్-అమెరికా ఘర్షణలతో చమురు సరఫరా పూర్తిగా నిలిచిపోతుందన్న భయంతో భగ్గుమన్న ధరలకు.. తాజా ప్రకటనతో ఒక్కసారిగా బ్రేక్ పడింది. దీని ప్రభావంతో అంతర్జాతీయ మార్కెట్‌లో బ్రెంట్ క్రూడ్ బ్యారెల్ ధర ఏకంగా 13 శాతం మేర భారీగా పతనమైంది. వంద డాలర్లు దాటేసి భయాందోళనలు రేకెత్తించిన బ్రెంట్ క్రూడ్, తాజా పరిణామాలతో ఒకేసారి 17 డాలర్ల మేర క్షీణించి 96 డాలర్ల స్థాయికి పడిపోయి సెంచరీ మార్కు దిగువకు చేరింది.
బ్రెంట్ క్రూడ్‌తో పాటే వెస్ట్ టెక్సాస్ ఇంటర్మీడియట్ (డబ్ల్యూటీఐ) ముడి చమురు ధరలు సైతం ఊహించని రీతిలో పతనమయ్యాయి. మార్కెట్ వర్గాల అంచనాలను తలకిందులు చేస్తూ డబ్ల్యూటీఐ బ్యారెల్ ధర ఒక్కసారిగా 13 డాలర్లు క్షీణించి 85 డాలర్ల స్థాయికి చేరుకుంది. గత కొద్ది రోజులుగా ఇరాన్ చమురు నిల్వలు, ప్రాసెసింగ్ కేంద్రాలపై అమెరికా దాడులు చేస్తుందన్న వార్తలతో గ్లోబల్ ఆయిల్ మార్కెట్లు తీవ్ర ఒత్తిడిని ఎదుర్కొన్నాయి. ప్రపంచ ఇంధన సరఫరాలో అంతరాయం ఏర్పడితే అంతర్జాతీయ ఆర్థిక వ్యవస్థ మాంద్యంలోకి జారుకుంటుందన్న ఆందోళనలు సర్వత్రా వ్యక్తమయ్యాయి. అయితే, ట్రంప్ తాజా నిర్ణయంతో దౌత్యపరమైన చర్చలకు మార్గం సుగమం కావడంతో పాటు ముడి చమురు ఉత్పత్తి, సరఫరాకు ఎలాంటి ఢోకా ఉండదన్న భరోసా పెట్టుబడిదారుల్లో నెలకొంది. దీంతో రికార్డు స్థాయికి చేరిన చమురు ధరలు చల్లబడి, ఇంధన దిగుమతులపై ఆధారపడిన భారత్ లాంటి దేశాలతో పాటు సామాన్య ప్రజలకు కూడా ఇది పెద్ద ఊరటనిచ్చింది.