చైనా కుతంత్రం..భారత్ ఆగ్రహం..

• పేర్లు మార్చినంత మాత్రాన వాస్తవం మారదు.
•  భారత్‌లో అరుణాచల్ అంతర్భాగమే.
• సరిహద్దుల్లో చైనా కవ్వింపులు.
•  డ్రాగన్ దేశానికి భారత్ గట్టి హెచ్చరిక.

ఢిల్లీ, మహా.

అరుణాచల్ ప్రదేశ్‌పై తనదైన హక్కు ఉందని చాటుకునేందుకు చైనా చేస్తున్న విఫల ప్రయత్నాలను భారత్ నిర్ద్వంద్వంగా తిరస్కరించింది. భారత భూభాగంలోని ప్రాంతాలకు చైనా కల్పిత పేర్లు పెట్టడం ద్వారా సృష్టిస్తున్న కథనాలు ఏమాత్రం చెల్లవని విదేశాంగ శాఖ అధికార ప్రతినిధి రణధీర్ జైశ్వాల్ ఒక ప్రకటనలో పునరుద్ఘాటించారు. అరుణాచల్ ప్రదేశ్ గతంలోనూ, ప్రస్తుతంనూ మరియు భవిష్యత్తులోనూ భారత్‌లో అంతర్భాగంగానే ఉంటుందని ఆయన స్పష్టం చేశారు. కేవలం పేర్లు మార్చినంత మాత్రాన క్షేత్రస్థాయిలో ఉన్న వాస్తవాలను మార్చలేరని, ఇటువంటి చర్యలు ఇరు దేశాల మధ్య సంబంధాలను సాధారణ స్థితికి తెచ్చేందుకు జరుగుతున్న ప్రయత్నాలకు పెద్ద అడ్డంకిగా మారుతున్నాయని ఆయన అభిప్రాయపడ్డారు. పరస్పర అవగాహనను దెబ్బతీసే ఇటువంటి పనులకు చైనా స్వస్తి పలకాలని భారత్ ఈ సందర్భంగా హితవు పలికింది.

అరుణాచల్ ప్రదేశ్‌ను చైనా ‘జాంగ్నాన్’ అని పిలుస్తూ అది దక్షిణ టిబెట్‌లో భాగమని వాదిస్తోంది. అయితే ఈ వాదనలను భారత్ ఎప్పటికప్పుడు తిరస్కరిస్తూనే ఉంది. కేవలం అరుణాచల్ ప్రదేశ్ విషయంలోనే కాకుండా, లద్దాఖ్ సరిహద్దుల్లో కూడా చైనా తన ప్రాబల్యాన్ని పెంచుకునేందుకు కుయుక్తులు పన్నుతోంది. అంతకుముందు లద్దాఖ్ ప్రాంతానికి సమీపంగా ఉన్న షిన్జియాంగ్ ప్రాంతంలో ‘సెన్లింగ్’ అనే కొత్త కౌంటీని ఏర్పాటు చేయడం భారత్‌లో కొత్త ఆందోళనలకు దారితీసింది. ఈ కొత్త కౌంటీని మార్చి 26న చైనా అధికారికంగా ఆమోదించింది. ఇది కారాకోరం పర్వత శ్రేణులకు సమీపంలో, అఫ్గానిస్థాన్ మరియు పాక్ ఆక్రమిత కాశ్మీర్ సరిహద్దులకు అత్యంత దగ్గరగా ఉండటం వ్యూహాత్మకంగా ఎంతో కీలకం. గత ఏడాది కాలంలోనే చైనా షిన్జియాంగ్‌లో మూడు కొత్త కౌంటీలను ఏర్పాటు చేయడం గమనార్హం. గతంలో ఏర్పాటు చేసిన హీన్, హెకాంగ్ అనే కౌంటీలపై కూడా భారత్ ఇప్పటికే తన అభ్యంతరాలను వ్యక్తం చేసింది.

చైనా వ్యూహాత్మకంగా అభివృద్ధి చేస్తున్న ఈ ప్రాంతం కేవలం భౌగోళికంగానే కాకుండా వాణిజ్యపరంగా కూడా ఎంతో ప్రాధాన్యత కలిగి ఉంది. కాష్గర్ ప్రాంతం చారిత్రకంగా సిల్క్ రోడ్‌కు కీలక కేంద్రంగా ఉండటమే కాకుండా, ప్రస్తుతం చైనా-పాకిస్థాన్ ఆర్థిక కారిడార్ (CPEC) ప్రాజెక్ట్ కూడా ఇక్కడి నుంచే ప్రారంభమవుతోంది. ఈ ప్రాజెక్ట్ పాక్ ఆక్రమిత కాశ్మీర్ గుండా వెళ్తుండటంపై భారత్ మొదటి నుంచీ అభ్యంతరం వ్యక్తం చేస్తూనే ఉంది. 2020లో తూర్పు లద్దాఖ్ సరిహద్దుల్లో తలెత్తిన ఉద్రిక్తతల తర్వాత ఇరు దేశాల మధ్య సంబంధాలు దారుణంగా దెబ్బతిన్నాయి. సంబంధాలను పునరుద్ధరించేందుకు ఇరు పక్షాలు చర్చలు జరుపుతున్నప్పటికీ, చైనా చేస్తున్న ఇటువంటి పరిణామాలు మళ్లీ ఉద్రిక్తతలను పెంచే అవకాశం ఉందని విశ్లేషకులు భావిస్తున్నారు.

ఆశ్చర్యకరమైన విషయం ఏమిటంటే, ఒకవైపు ఇటువంటి కవ్వింపు చర్యలకు పాల్పడుతూనే, మరోవైపు భారత్ , చైనాలు ప్రత్యర్థుల్లా కాకుండా భాగస్వాములుగా ఉండాలని చైనా విదేశాంగ మంత్రి వాంగ్ యీ గతనెలలో వ్యాఖ్యానించారు. ఇరు దేశాలు ఒకరికొకరు ముప్పు అని భావించకుండా, అభివృద్ధికి తోడ్పడే అవకాశంగా చూడాలని ఆయన వార్షిక మీడియా సమావేశంలో పేర్కొన్నారు. అంతర్గత విషయాల్లో జోక్యం చేసుకోకుండా సంబంధాలను మెరుగుపర్చుకోవాలని ఆయన సూచించినప్పటికీ, క్షేత్రస్థాయిలో చైనా చర్యలు మాత్రం అందుకు పూర్తి విరుద్ధంగా ఉండటం గమనార్హం. భారత్ మాత్రం చైనా మాటలకు మరియు చేతలకు మధ్య ఉన్న పొంతనను గమనిస్తూ, తన సార్వభౌమత్వాన్ని కాపాడుకునే విషయంలో ఏమాత్రం వెనక్కి తగ్గబోమని స్పష్టం చేస్తోంది.