నిప్పుల కొలిమిగా తెలంగాణ:.

* నేటి నుంచే ‘హీట్‌వేవ్‌ 2.0’ ప్రకంపనలు.
* వడగండ్ల వానలు వర్సెస్ మండుతున్న ఎండలు.
* 45 డిగ్రీల దిశగా ఉష్ణోగ్రతలు.
* అప్రమత్తంగా ఉండండి.. అగ్నిగుండం కానున్న ఉత్తర తెలంగాణ జిల్లాలు..
హైదరాబాద్‌, మహా.
తెలంగాణ రాష్ట్రం మరోమారు ప్రకృతి వైపరీత్యాల మధ్య కొట్టుమిట్టాడుతోంది. ఒకవైపు అకాల వర్షాలు, వడగండ్ల వానలతో వాతావరణం అస్థిరంగా మారుతుంటే, మరోవైపు ప్రాణాంతకమైన ఎండలు రాష్ట్ర ప్రజలను భయపెడుతున్నాయి. శుక్రవారం (ఏప్రిల్‌ 24) నుంచి రాష్ట్రవ్యాప్తంగా ‘సీవియర్ హీట్‌వేవ్ 2.0’ ప్రారంభం కానుందని వాతావరణ నిపుణులు హెచ్చరిస్తున్నారు. ఏప్రిల్ 24 నుంచి 29 వరకు సుమారు ఐదు రోజుల పాటు రాష్ట్రం నిప్పుల కొలిమిని తలపించనుందని, ముఖ్యంగా ఉత్తర తెలంగాణ జిల్లాల్లో ఉష్ణోగ్రతలు ఏకంగా 45 డిగ్రీల సెల్సియస్‌ను తాకే అవకాశం ఉందని ‘రెడ్ అలర్ట్’ జారీ చేశారు. ఈ తీవ్రమైన ఎండల ప్రభావం వల్ల ప్రజలు అప్రమత్తంగా ఉండాలని, మధ్యాహ్నం వేళ బయటకు రావడం ప్రాణాంతకమని హెచ్చరికలు వెలువడ్డాయి.
అగ్నిగుండం కానున్న జిల్లాలు.. పెరగనున్న ఆర్ద్రత
రాష్ట్రంలోని వాతావరణ పరిస్థితులను పరిశీలిస్తే, రెడ్ మార్క్ చేసిన జిల్లాల్లో ఎండల తీవ్రత భీభత్సంగా ఉండనుంది. ఆరెంజ్ అలర్ట్ జారీ చేసిన జిల్లాల్లో కూడా ఉష్ణోగ్రతలు 43 నుంచి 44 డిగ్రీల వరకు నమోదయ్యే అవకాశం ఉంది. భాగ్యనగరం కూడా ఈ సెగ నుంచి తప్పించుకోలేదని, ఏప్రిల్ 24-29 మధ్య హైదరాబాద్‌లోని పలు ప్రాంతాల్లో 43 డిగ్రీల ఉష్ణోగ్రతలు నమోదయ్యే అవకాశం ఉందని నిపుణులు అంచనా వేస్తున్నారు. ఈ వేడి కారణంగా ఏర్పడే స్థానిక మేఘావృత పరిస్థితుల వల్ల అక్కడక్కడ ఉరుములతో కూడిన జల్లులు పడే అవకాశం ఉన్నప్పటికీ, అవి ఎండల నుంచి ఎటువంటి ఉపశమనాన్ని ఇవ్వకపోగా, గాలిలో తేమ శాతాన్ని (హ్యుమిడిటీ) పెంచి ఉక్కపోతను మరింత తీవ్రం చేస్తాయని స్పష్టం చేశారు.
నేడు వడగండ్ల బీభత్సం.. అప్రమత్తమైన అధికార యంత్రాంగం
ప్రస్తుత వాతావరణం విషయానికి వస్తే, గురువారం సాయంత్రం హైదరాబాద్‌లోని నేరెడ్‌మెట్, మల్కాజిగిరి, కాప్రా, అల్వాల్, యాప్రాల్, ఉప్పల్ వంటి పలు ప్రాంతాల్లో ఉరుములు, మెరుపులతో కూడిన భారీ వర్షం కురిసే అవకాశం ఉంది. కొన్ని చోట్ల వడగండ్ల వాన కూడా పడే సూచనలు ఉన్నాయి. జిల్లాల వారీగా పరిశీలిస్తే మేడ్చల్-మల్కాజిగిరి, వికారాబాద్, రంగారెడ్డి, సిరిసిల్ల, కరీంనగర్, మంచిర్యాల, కుమురం భీమ్ ఆసిఫాబాద్ జిల్లాల్లో రాబోయే కొద్ది గంటల్లో తీవ్రమైన ఉరుములతో కూడిన వర్షాలు కురిసే అవకాశం ఉంది. తదనంతరం కామారెడ్డి, సంగారెడ్డి, నాగర్‌కర్నూల్, యాదాద్రి భువనగిరి జిల్లాల్లో కూడా వర్ష ప్రభావం ఉండనుంది. అయితే ఈ వానలు రేపటి నుంచి రాబోయే ‘మహా తాపం’ ముందు వచ్చే ఒక చిన్నపాటి ఉపశమనం మాత్రమేనని, రేపటి నుంచి ప్రజలు ఎండ దెబ్బ తగలకుండా తగిన జాగ్రత్తలు తీసుకోవాలని అధికారులు సూచిస్తున్నారు.