- రాష్ట్రంలో పెట్రోల్ డీజిల్ కొరత
- బంకుల వద్ద భారీగా బారులు తీరిన వాహనదారులు
- ఇంధన నిల్వల కొరతతో తీవ్ర ఆందోళన
హైదరాబాద్, మహా.
తెలంగాణ రాష్ట్రవ్యాప్తంగా చమురు సెగలు సామాన్యుడిని బెంబేలెత్తిస్తున్నాయి. గత కొన్ని రోజులుగా హైదరాబాద్ నగరం సహా ఉమ్మడి ఖమ్మం, వరంగల్ జిల్లాల్లో పెట్రోల్, డీజిల్ కొరత తీవ్రరూపం దాల్చింది. రాజధానిలో సుమారు 600 నుండి 700 వరకు పెట్రోల్ బంకులు ఉండగా, రాష్ట్రవ్యాప్తంగా ప్రధాన చమురు సంస్థలైన హెచ్పీసీఎల్, ఐఓసీఎల్, బీపీసీఎల్ ఆధ్వర్యంలో దాదాపు 3,500 వరకు రిటైల్ అవుట్లెట్లు పనిచేస్తున్నాయి. సాధారణ రోజుల్లో రాష్ట్రవ్యాప్తంగా నిత్యం సగటున 6,330 కిలోలీటర్ల పెట్రోల్, 9,048 కిలోలీటర్ల డీజిల్ విక్రయాలు జరుగుతుంటాయి. అయితే, ఇటీవల ఇంధన కొరత ఏర్పడుతుందనే వదంతులు వ్యాపించడంతో వాహనదారులు ఒక్కసారిగా బంకుల వద్దకు క్యూ కట్టారు. దీంతో పెట్రోల్ విక్రయాలు రోజువారీ సగటు కంటే 50 శాతం పెరిగి 9,574 కిలోలీటర్లకు చేరుకోగా, డీజిల్ విక్రయాలు ఏకంగా 14,457 కిలోలీటర్లకు పెరగడం గమనార్హం.
ఈ అసాధారణ గిరాకీ కారణంగానే మెజారిటీ బంకుల వద్ద ‘నో స్టాక్’ బోర్డులు దర్శనమిస్తున్నాయి. ముఖ్యంగా వ్యవసాయ సీజన్ కావడంతో ట్రాక్టర్లు, ఇతర యంత్రాలకు డీజిల్ దొరకక రైతులు తీవ్ర ఇబ్బందులు పడుతున్నారు. ఉమ్మడి ఖమ్మం జిల్లాలో అయితే ఆంధ్రప్రదేశ్ సరిహద్దుల నుండి కూడా వాహనదారులు ఇక్కడికి వస్తుండటంతో డిమాండ్ ఒక్కసారిగా పెరిగి సరఫరా వ్యవస్థపై తీవ్ర ఒత్తిడి పడింది. చమురు కంపెనీలు ట్యాంకర్ల సరఫరాలో జాప్యం చేయడం, డీలర్లకు ఇస్తున్న క్రెడిట్ పరిమితిని తగ్గించడం కూడా ఈ కృత్రిమ కొరతకు కారణంగా కనిపిస్తోంది. ప్రస్తుతం పెట్రోల్ ధర లీటరుకు సుమారు ₹107.50, డీజిల్ ₹95.70 వద్ద స్థిరంగా ఉన్నప్పటికీ, అంతర్జాతీయ మార్కెట్లో ముడి చమురు ధరలు పెరగడం మరియు భవిష్యత్తులో ధరలు మరింత పెరుగుతాయన్న భయం వినియోగదారులను ‘ప్యానిక్ బయింగ్’ వైపు పురికొల్పుతోంది.
ప్రభుత్వం మరియు పౌర సరఫరాల శాఖ స్పందిస్తూ రాష్ట్రంలో నిల్వలు నిండుకోలేదని, కేవలం రవాణా జాప్యం వల్ల మాత్రమే కొన్ని చోట్ల ఇబ్బందులు తలెత్తాయని భరోసా ఇస్తున్నాయి. రోజుకు 24,000 కిలోలీటర్ల ఇంధనాన్ని సరఫరా చేసే సామర్థ్యం రాష్ట్రానికి ఉందని, ఎవరూ ఆందోళన చెందాల్సిన అవసరం లేదని స్పష్టం చేస్తున్నాయి. మరోవైపు, ఇంధనంతో పాటు ఎల్పీజీ సరఫరా కూడా నిరాటంకంగా సాగుతోందని, ప్రతిరోజూ సుమారు 2.22 లక్షల గ్యాస్ సిలిండర్లను వినియోగదారులకు అందజేస్తున్నట్లు అధికారులు వెల్లడిస్తున్నారు. ఈ నేపథ్యంలో, బంకుల వద్ద అనవసరంగా బారులు తీరవద్దని, త్వరలోనే సరఫరా పూర్తిస్థాయిలో సాధారణ స్థితికి చేరుతుందని ప్రభుత్వం హామీ ఇస్తోంది.
