పోలీసు శాఖలో పదోన్నతుల పండుగ….

* 35 మంది సీఐలకు డీఎస్పీలుగా ప్రమోషన్!
* ఉత్తర్వులు జారీ చేసిన ఉన్నతాధికారులు.

హైదరాబాద్, మహా.

రాష్ట్ర పోలీసు శాఖలో భారీ స్థాయిలో పదోన్నతుల పర్వం కొనసాగుతోంది. సుదీర్ఘకాలంగా పదోన్నతుల కోసం నిరీక్షిస్తున్న పలువురు అధికారులకు ఉన్నతాధికారులు తీపికబురు అందించారు. పరిపాలనా వ్యవహారాలను మరింత పకడ్బందీగా అమలు చేయడంతో పాటు శాంతిభద్రతల పర్యవేక్షణను పటిష్టం చేసే ఉద్దేశంతో రాష్ట్రవ్యాప్తంగా వివిధ విభాగాల్లో విధులు నిర్వర్తిస్తున్న ముప్పై ఐదు మంది ఇన్‌స్పెక్టర్లకు డీఎస్పీలుగా (ఉప పోలీసు సూపరింటెండెంట్లుగా) పదోన్నతి కల్పిస్తూ ప్రభుత్వం ఆదేశాలు జారీ చేసింది. ఈ మేరకు ఏప్రిల్ ఇరవై తొమ్మిదో తేదీన పోలీస్ ప్రధాన కార్యాలయం నుంచి అధికారిక ఉత్తర్వులు వెలువడ్డాయి.
తాజాగా పదోన్నతులు పొందిన జాబితాలో ఉమ్మడి ఖమ్మం, వరంగల్ జిల్లాలకు చెందిన పలువురు అధికారులు చోటు దక్కించుకున్నారు. ఖమ్మం సీఎస్‌బీ ఇన్‌స్పెక్టర్‌గా విధులు నిర్వర్తిస్తున్న సీహెచ్. రాజిరెడ్డి, ఖమ్మం సీసీఆర్‌బీ ఇన్‌స్పెక్టర్ టి. స్వామి డీఎస్పీలుగా పదోన్నతి పొందారు. వరంగల్ హనుమకొండ ట్రాఫిక్ ఇన్‌స్పెక్టర్ జి. సీతారెడ్డి, వరంగల్ టాస్క్‌ఫోర్స్ ఇన్‌స్పెక్టర్ సర్ల రాజు, వరంగల్ వీఆర్ నుంచి విధుల్లో ఉన్న బి. శ్రీనివాసరావులకు డీఎస్పీ హోదా దక్కింది. జయశంకర్ భూపాలపల్లి పీసీఆర్ ఇన్‌స్పెక్టర్ ఏ. పెద్దన్న కుమార్, మహబూబాబాద్ టౌన్ సీఐ జి. మహేందర్ రెడ్డిలకు సైతం తాజా ఉత్తర్వుల్లో ప్రమోషన్ లభించింది.
ముఖ్యమైన దర్యాప్తు విభాగాలైన సీఐడీ, ఏసీబీ, ఇంటెలిజెన్స్ నుంచి సైతం పలువురు సీఐలు ఉన్నత హోదాను దక్కించుకున్నారు. సీఐడీ విభాగం నుంచి డీఎస్పీలుగా ప్రమోషన్ పొందిన వారిలో ఎస్. వెంకటేష్, సి. విజయ రాజు, ఎం. వెంకటనర్సయ్య, పి. వెంకటేశ్వర్లు ఉన్నారు. ఇంటెలిజెన్స్ విభాగం నుంచి బి. ప్రవీణ్, ఎం. వెంకట్ రెడ్డి, ఏ. రాజయ్య ప్రమోషన్ సాధించారు. అవినీతి నిరోధక శాఖ (ఏసీబీ)లో అద్భుత సేవలు అందిస్తున్న బి. బాలాజీ, జి. గోవర్ధన గిరి, ఎం. రాజేష్‌లకు డీఎస్పీలుగా స్థానచలనం కల్పిస్తూ ఆదేశాలు ఇచ్చారు.
హైదరాబాద్ నగరంతో పాటు సైబరాబాద్, రాచకొండ కమిషనరేట్ల పరిధిలో బాధ్యతలు నిర్వర్తిస్తున్న పలువురు అధికారులు తాజా ఉత్తర్వులతో డీఎస్పీలుగా బాధ్యతలు చేపట్టనున్నారు. ఇందులో మలక్‌పేట ట్రాఫిక్ సీఐ కె. రామకృష్ణ, సీసీఎస్ ఇన్‌స్పెక్టర్ ఎం. వెంకట రామయ్య, ఎస్బీ ఇన్‌స్పెక్టర్ పి. కరుణాకర్, ఈగల్ ఫోర్స్ ఇన్‌స్పెక్టర్ పి. రాజు, ట్రాన్స్‌కో ఇన్‌స్పెక్టర్ ఎస్. వెంకటేష్ ఉన్నారు. మల్కాజిగిరి ఈవోడబ్ల్యూ ఇన్‌స్పెక్టర్ కె. భాస్కర్, ఎల్‌బీనగర్ సీసీఎస్ ఇన్‌స్పెక్టర్ ఎన్. వెంకటేశ్వర్లు, మల్కాజిగిరి ఎస్‌ఓటీ ఇన్‌స్పెక్టర్ బి. గురునాయుడు, వనస్థలిపురం ఇన్‌స్పెక్టర్ భూపతి గట్టుమల్లుకు ఉన్నతాధికారులు పదోన్నతి కల్పించారు.
ఇతర జిల్లాల వ్యవహారాలను పరిశీలిస్తే రామగుండం నుంచి పీసీఆర్ ఇన్‌స్పెక్టర్ కె. రవీందర్, సర్కిల్ ఇన్‌స్పెక్టర్ టి. ప్రవీణ్ కుమార్, సీఎస్‌బీ ఇన్‌స్పెక్టర్ కె. పురుషోత్తం డీఎస్పీలుగా అవకాశం దక్కించుకున్నారు. రాజన్న సిరిసిల్ల జిల్లా చందుర్తి సీఐ జి. వెంకటేశ్వర్లు, జగిత్యాల డీసీఆర్‌బీ ఇన్‌స్పెక్టర్ బి. శ్రీనివాస్, సూర్యాపేట జిల్లా తుంగతుర్తి సీఐ అడపా నరసింహారావు, కుమ్రంభీం ఆసిఫాబాద్ సీసీఎస్ ఇన్‌స్పెక్టర్ బి. హరినాథ్ బాబు, కరీంనగర్ జిల్లా తిమ్మాపూర్ సీఐ గడ్డం సదయ్య అలియాస్ సదన్ కుమార్, మల్టీ జోన్-1 లో వెయిటింగ్‌లో ఉన్న ఆర్. నరేందర్‌లకు డీఎస్పీలుగా బాధ్యతలు అప్పగిస్తూ పోలీస్ బాస్ జారీ చేసిన ఉత్తర్వుల్లో స్పష్టంగా పేర్కొన్నారు. పదోన్నతులు పొందిన అధికారులంతా తక్షణమే కొత్త స్థానాల్లో రిపోర్ట్ చేయాలని ఉన్నతాధికారులు ఆదేశించారు.