హైదరాబాద్, మహా.
పెండింగ్ చలానాల పేరుతో వాహనాలను జప్తు చేస్తున్న వ్యవహారంపై రాష్ట్ర అత్యున్నత న్యాయస్థానం తీవ్రంగా స్పందించింది. తమ ఆదేశాలను బేఖాతరు చేస్తూ వాహనాలను సీజ్ చేసిన ఘటనలో దాఖలైన కోర్టు ధిక్కరణ పిటిషన్పై విచారణ చేపట్టిన హైకోర్టు.. రాష్ట్ర పోలీసు, రవాణా శాఖలకు చెందిన పలువురు ఉన్నతాధికారులకు నోటీసులు జారీ చేసింది. సీవీ ఆనంద్, శివధర్ రెడ్డి, జోయల్ డేవిస్, లింబాద్రి తదితరులకు ఈ మేరకు కోర్టు ధిక్కరణ కింద నోటీసులు జారీ చేస్తూ, దీనిపై కౌంటర్ దాఖలు చేయాలని ఆదేశించింది.
పెండింగ్ చలానాలు ఉన్నాయన్న ఏకైక కారణంతో ద్విచక్ర వాహనాలు, ఇతర మోటారు వాహనాలను సీజ్ చేయడానికి వీల్లేదని గతంలోనే హైకోర్టు స్పష్టమైన ఉత్తర్వులు వెలువరించింది. అయితే, క్షేత్రస్థాయిలో ట్రాఫిక్ పోలీసులు ఆ ఆదేశాలను ఏమాత్రం పట్టించుకోవడం లేదని, యథేచ్ఛగా వాహనాల జప్తు ప్రక్రియ కొనసాగుతోందని ఆరోపిస్తూ మల్లికార్జున్ అనే వాహనదారుడు హైకోర్టును ఆశ్రయించారు. పాత చలానాలు ఉన్నాయనే నెపంతో పోలీసులు తన ద్విచక్ర వాహనాన్ని అక్రమంగా సీజ్ చేశారని, ఇది ముమ్మాటికీ ఉన్నత న్యాయస్థానం ఇచ్చిన తీర్పును ఉల్లంఘించడమేనని ఆయన తన పిటిషన్లో పేర్కొన్నారు. న్యాయస్థానం ఆదేశాలను అమలు చేయాల్సిన బాధ్యత ఉన్న అధికారులే వాటిని తుంగలో తొక్కుతున్నారని పిటిషనర్ న్యాయస్థానం దృష్టికి తీసుకెళ్లారు.
ఈ పిటిషన్పై విచారణ చేపట్టిన న్యాయమూర్తి.. పిటిషనర్ లేవనెత్తిన అంశాలను పరిగణనలోకి తీసుకున్నారు. ఈ నేపథ్యంలోనే కోర్టు ధిక్కరణ కింద రాష్ట్ర హోంశాఖ సెక్రటరీ, డైరెక్టర్ జనరల్ ఆఫ్ పోలీస్ (డీజీపీ), ట్రాఫిక్ అదనపు సీపీలను ప్రతివాదులుగా చేరుస్తూ న్యాయస్థానం కీలక నిర్ణయం తీసుకుంది. అదే విధంగా రవాణా శాఖ కమిషనర్ను కూడా ఈ పిటిషన్లో ప్రతివాదిగా చేర్చింది. న్యాయస్థానం జారీ చేసిన ఆదేశాలను ఎందుకు అమలు చేయలేదో, కోర్టు ధిక్కరణ చర్యలకు పాల్పడినందుకు ఎందుకు తగిన చర్యలు తీసుకోకూడదో పూర్తి వివరాలతో కౌంటర్ దాఖలు చేయాలని ఆయా ఉన్నతాధికారులను హైకోర్టు ఆదేశించింది. అనంతరం ఈ కేసుకు సంబంధించిన తదుపరి విచారణను వచ్చే నెల 19వ తేదీకి వాయిదా వేస్తున్నట్లు ఉన్నత న్యాయస్థానం వెల్లడించింది. హైకోర్టు తాజా నోటీసుల నేపథ్యంలో ట్రాఫిక్ చలానాలపై పోలీసు, రవాణా శాఖలు ఎలాంటి నిర్ణయం తీసుకుంటాయన్నది ప్రస్తుతం తీవ్ర చర్చనీయాంశంగా మారింది.
పసిడి ప్రియులకు మహాదానందం…
Editor
