మొక్కజొన్న కొనుగోళ్లలో సరికొత్త రికార్డు….

మొక్కజొన్న కొనుగోళ్లలో సరికొత్త రికార్డు.
* రైతులకు రూ.1,173 కోట్లు విడుదల.
* మూడు రోజుల్లో లక్ష మంది రైతుల ఖాతాల్లో జమ.
* పక్క రాష్ట్రాల గోదాముల్లోనూ నిల్వలు.
* మంత్రి తుమ్మల నాగేశ్వరరావు వెల్లడి.

హైదరాబాద్, మహా.
రాష్ట్రంలోని మొక్కజొన్న రైతులకు ప్రభుత్వం తీపికబురు అందించింది. రైతుల సంక్షేమమే ధ్యేయంగా అడుగులు వేస్తున్న రాష్ట్ర ప్రభుత్వం.. తాజాగా మొక్కజొన్న బకాయిల చెల్లింపునకు గ్రీన్ సిగ్నల్ ఇచ్చింది. రైతులు పండించిన పంటకు మద్దతు ధర కల్పించడంతో పాటు, సేకరించిన ధాన్యానికి సంబంధించిన నిధులను విడుదల చేసినట్లు రాష్ట్ర వ్యవసాయ శాఖ మంత్రి తుమ్మల నాగేశ్వరరావు బుధవారం ఒక ప్రకటనలో వెల్లడించారు. సుమారు లక్ష మంది రైతుల ఖాతాల్లో రూ.1,173 కోట్లను రానున్న రెండు, మూడు రోజుల్లో నేరుగా (డీబీటీ పద్ధతిన) జమ చేయనున్నట్లు ఆయన స్పష్టం చేశారు. ఈ నిధుల విడుదలతో పెట్టుబడి కోసం ఎదురుచూస్తున్న రైతులకు భారీ ఊరట లభించనుంది.
చరిత్రలో కనీవినీ ఎరుగని రీతిలో కొనుగోళ్లు
ఈ ఏడాది రాష్ట్రంలో మొక్కజొన్న దిగుబడి అనూహ్యంగా పెరగడంతో పాటు, ప్రభుత్వ కొనుగోలు కేంద్రాల ద్వారా రికార్డు స్థాయిలో సేకరణ జరిగినట్లు మంత్రి తుమ్మల తెలిపారు. రైతులు దళారుల చేతిలో మోసపోకుండా, వారికి గిట్టుబాటు ధర దక్కాలనే ఉద్దేశంతో ప్రభుత్వమే నేరుగా రంగంలోకి దిగి కొనుగోళ్లు చేపట్టిందన్నారు. ఇప్పటివరకు రాష్ట్రవ్యాప్తంగా రికార్డు స్థాయిలో 14 లక్షల మెట్రిక్ టన్నుల మొక్కజొన్నను సేకరించినట్లు ఆయన వివరించారు. రాష్ట్ర చరిత్రలో ఇంత భారీ స్థాయిలో మొక్కజొన్న కొనుగోళ్లు జరగడం ఇదే ప్రథమమని, ఇది రైతుల పట్ల ఈ ప్రభుత్వానికి ఉన్న చిత్తశుద్ధికి నిదర్శనమని మంత్రి పేర్కొన్నారు. కొనుగోలు ప్రక్రియను పారదర్శకంగా, వేగవంతంగా పూర్తి చేసేందుకు అధికారులు అహర్నిశలు శ్రమించారని ఆయన ప్రశంసించారు.
పొరుగు రాష్ట్రాల గోదాములకు తరలింపు
రికార్డు స్థాయిలో సేకరించిన 14 లక్షల మెట్రిక్ టన్నుల మొక్కజొన్నను సురక్షితంగా భద్రపరిచేందుకు ప్రభుత్వం పకడ్బందీ చర్యలు చేపట్టింది. రాష్ట్రంలోని మార్క్‌ఫెడ్, వ్యవసాయ శాఖల పరిధిలోని గోదాములన్నీ దాదాపు నిండిపోవడంతో ప్రభుత్వం ప్రత్యామ్నాయ మార్గాలపై దృష్టి సారించింది. గతంలో ఎన్నడూ లేని విధంగా, కనీవినీ ఎరుగని రీతిలో సరికొత్త నిర్ణయం తీసుకుంది. రైతుల కష్టార్జితం వానల పాలు కాకుండా ఉండేందుకు, సేకరించిన మొక్కజొన్నను రాష్ట్రంలోని ఖాళీ గోదాములతో పాటు పొరుగు రాష్ట్రాల్లోని గోదాములకు సైతం అత్యంత సురక్షితంగా తరలిస్తున్నట్లు మంత్రి తుమ్మల నాగేశ్వరరావు వెల్లడించారు. ఎగుమతులు, నిల్వల విషయంలో ఎలాంటి ఇబ్బందులు తలెత్తకుండా ముందస్తు ప్రణాళికతో వ్యవహరిస్తున్నామని.. రైతులు ఆందోళన చెందాల్సిన అవసరం లేదని, ప్రతి గింజనూ కొనుగోలు చేసి సకాలంలో డబ్బులు చెల్లించేందుకు ప్రభుత్వం సిద్ధంగా ఉందని ఆయన రైతులకు భరోసా ఇచ్చారు.