హృదయ విదారకం….

హృదయ విదారకం.
* ఢిల్లీలో మహా విషాదం.
* అగ్నికి ఆహుతైన 21 ప్రాణాలు.
*ఫ్లోరిష్ స్టే హోటల్‌లో ఘోర అగ్నిప్రమాదం.
* మృతుల్లో అత్యధికంగా విదేశీయులే.
*భవనం పైనుంచి దూకేసిన మహిళలు.
* పరుపులు వేసి ప్రాణాలు కాపాడిన స్థానికులు.
* వైద్యం కోసం భారత్‌కు వచ్చి మృత్యువాత పడిన వైనం.
ఢిల్లీ, మహా.
దేశ రాజధాని ఢిల్లీలో హృదయ విదారక ఘటన చోటుచేసుకుంది. దక్షిణ ఢిల్లీలోని హౌజ్ రాణి ప్రాంతంలో బుధవారం ఉదయం జరిగిన ఘోర అగ్నిప్రమాదంలో ఏకంగా 21 మంది సజీవ దహనమయ్యారు. ప్రాణాలను అరచేతిలో పెట్టుకుని మెరుగైన వైద్య చికిత్సల కోసం సుదూర ప్రాంతాల నుంచి వచ్చిన విదేశీయులను మృత్యువు అగ్నికీలల రూపంలో కబళించింది. ‘ఫ్లోరిష్ స్టే’ అనే హోటల్‌లో తెల్లవారుజామున అందరూ గాఢ నిద్రలో ఉన్న సమయంలో ఈ మహమ్మారి మంటలు ఒక్కసారిగా చెలరేగడంతో ఈ ఘోర విషాదం సంభవించింది.
ఐదంతస్తుల భవనంలో ఉన్న ఈ హోటల్ గ్రౌండ్ ఫ్లోర్‌లోని రెస్టారెంట్‌లో తొలుత మంటలు అంటుకున్నట్లు అధికారులు ప్రాథమికంగా నిర్ధారించారు. క్షణాల వ్యవధిలోనే మంటలు పై అంతస్తులకు వేగంగా వ్యాపించడంతో పాటు దట్టమైన పొగ కమ్ముకుంది. ఉదయం సమయం కావడంతో హోటల్లోని ప్రయాణికులంతా గాఢ నిద్రలో ఉండిపోయారు. పొగ, మంటల వేడికి ఉలిక్కిపడి లేచిన వారికి ఏటూ వెళ్లాలో తెలియని అయోమయ పరిస్థితి ఏర్పడింది. కిందకు దిగే మార్గాలన్నీ మంటలతో మూసుకుపోవడంతో కళ్ల ముందే మృత్యువు తాండవిస్తున్నా నిస్సహాయ స్థితిలో గదుల్లోనే చిక్కుకుని ప్రాణాలు వదిలారు.
ఈ హోటల్‌లో సుమారు 25 గదులు ఉండగా, ప్రమాదం జరిగిన సమయంలో 40 మందికి పైగా బస చేసినట్లు స్థానికులు చెబుతున్నారు. వీరిలో అత్యధికంగా వైద్య చికిత్సల కోసం భారతదేశానికి వచ్చిన విదేశీయులే ఉన్నారని ప్రముఖ వార్తా సంస్థ పీటీఐ సైతం వెల్లడించింది. ఎన్నో ఆశలతో ఆరోగ్యంతో తిరిగి తమ స్వదేశాలకు వెళ్లాలనుకున్న వారిని ఈ ప్రమాదం బలితీసుకోవడం ప్రతీ ఒక్కరినీ తీవ్రంగా కలచివేస్తోంది. మృతుల్లో ఉన్న విదేశీయుల వివరాలను, వారి స్వస్థలాలను తెలుసుకునేందుకు అధికారులు ఆయా దేశాల రాయబార కార్యాలయాలతో సంప్రదింపులు జరుపుతున్నారు.
మంటలు ఉవ్వెత్తున ఎగసిపడుతుండటంతో ప్రాణభయంతో కొందరు మహిళలు భవనం పై అంతస్తుల కిటికీల నుంచి కిందకు దూకేశారు. ఈ దృశ్యాలు చూసిన స్థానికులు తక్షణమే అప్రమత్తమై మానవత్వాన్ని చాటుకున్నారు. కింద పరుపులు పరిచి పైనుంచి దూకుతున్న వారిని పట్టుకుని ప్రాణాలతో రక్షించారు. దీనికి సంబంధించిన దృశ్యాలు ప్రస్తుతం సామాజిక మాధ్యమాల్లో వైరల్‌గా మారాయి. దట్టమైన పొగలు, మంటల నడుమ మహిళలు కిందకు దూకుతున్న వీడియోలు అందరి కంటతడి పెట్టిస్తున్నాయి. స్థానికులు చూపించిన ఈ సమయస్ఫూర్తి వల్ల ఎంతో మంది ప్రాణాలు దక్కించుకోగలిగారు.
ప్రమాద సమాచారం అందుకున్న వెంటనే అగ్నిమాపక సిబ్బంది, పోలీసులు, రెవెన్యూ అధికారులు హుటాహుటిన ఘటనా స్థలానికి చేరుకుని సహాయక చర్యలు చేపట్టారు. అయితే, హోటల్ ఉన్న ప్రాంతం అత్యంత ఇరుకైన సందుల్లో ఉండటంతో అగ్నిమాపక శకటాలు అక్కడికి చేరుకుని మంటలను అదుపు చేయడానికి తీవ్ర ఆటంకం ఏర్పడింది. సిబ్బంది శ్రమించి క్రమంగా మంటలను అదుపులోకి తెచ్చారు. ఈ దుర్ఘటనపై ఎస్‌డీఎం జితేంద్ర కుమార్ మాట్లాడుతూ.. ప్రమాదానికి గల కచ్చితమైన కారణాలు ఇంకా వెల్లడి కాలేదని, గ్రౌండ్ ఫ్లోర్ రెస్టారెంట్ నుంచే మంటలు వ్యాపించినట్లు ఆధారాలు ఉన్నాయని తెలిపారు. స్థానికులు సమయస్ఫూర్తితో పరుపులు వేయడం వల్లే పైనుంచి దూకిన వారు ప్రాణాలతో బయటపడగలిగారని ఆయన ప్రశంసించారు. ఈ ఘోర ప్రమాదంపై కేసు నమోదు చేసుకున్న పోలీసులు దర్యాప్తును ముమ్మరం చేశారు.