అమరావతి అభివృద్ధికి కేంద్రం భారీ ఊతం..

అమరావతి అభివృద్ధికి కేంద్రం భారీ ఊతం.

* రూ.2,533 కోట్లతో పరిపాలనా, నివాస భవనాలకు గ్రీన్ సిగ్నల్.

* ఏపీ రాజధానిలో కొలువుదీరనున్న సెంట్రల్ కార్యాలయాలు.

* అత్యాధునిక హంగులతో అమరావతిలో సీజీజీపీఓఏ టవర్లు.

* వేల సంఖ్యలో ఉపాధి అవకాశాలు సృష్టించనున్న భారీ ప్రాజెక్టులు

* మోదీ సర్కార్ నిర్ణయం పట్ల బీజేపీ చీఫ్ పీవీఎన్ మాధవ్ హర్షం.

అమరావతి , మహా.

ఆంధ్రప్రదేశ్ రాజధాని అమరావతిని దేశంలోనే అత్యుత్తమ పరిపాలనా కేంద్రంగా తీర్చిదిద్దే దిశగా కేంద్ర ప్రభుత్వం మరో చారిత్రాత్మక నిర్ణయం తీసుకుంది. ప్రధానమంత్రి నరేంద్ర మోదీ అధ్యక్షతన జరిగిన కేంద్ర ఆర్థిక వ్యవహారాల మంత్రివర్గ కమిటీ (సీసీఈఏ) సమావేశంలో అమరావతిలో కేంద్ర ప్రభుత్వ కార్యాలయ సముదాయం (సీజీజీపీఓఏ), ఉద్యోగుల నివాస సముదాయాల (జీపీఆర్ఏ) నిర్మాణానికి ఏకంగా రూ.2,533.99 కోట్లను మంజూరు చేస్తూ ఆమోదముద్ర వేసింది. కేంద్రం తీసుకున్న ఈ నిర్ణయం అమరావతి అభివృద్ధిలో మరో సువర్ణ ఘట్టమని, ఈ నిధుల కేటాయింపు పట్ల ఆంధ్రప్రదేశ్ రాష్ట్ర బీజేపీ అధ్యక్షుడు పీవీఎన్ మాధవ్ తీవ్ర హర్షం వ్యక్తం చేశారు. కేంద్ర ప్రభుత్వ నిరంతర సహకారంతో అమరావతి త్వరలోనే ఒక అద్భుత, అత్యాధునిక నగరంగా ఆవిర్భవించనుందని ఆయన ఆశాభావం వ్యక్తం చేశారు.

**ఆధునిక టవర్లతో కేంద్ర కార్యాలయ సముదాయం**

రాష్ట్ర ప్రభుత్వం కేటాయించిన 5.53 ఎకరాల సువిశాల భూమిలో సుమారు 23.25 లక్షల చదరపు అడుగుల విస్తీర్ణంలో రెండు అత్యాధునిక టవర్లతో కూడిన కేంద్ర కార్యాలయ సముదాయాన్ని నిర్మించనున్నారు. ఇందుకోసం కేంద్ర ప్రభుత్వం ఏకంగా రూ.1,299.08 కోట్లు మంజూరు చేసింది. ఈ భారీ భవన సముదాయంలో దాదాపు 8,000 మంది కేంద్ర ప్రభుత్వ అధికారులు, ఉద్యోగులు ఒకే గొడుగు కింద పనిచేసేందుకు వీలుగా సకల వసతులు కల్పించనున్నారు. ప్రస్తుతం రాష్ట్రవ్యాప్తంగా వివిధ ప్రాంతాల్లో చెల్లాచెదురుగా ఉన్న కేంద్ర ప్రభుత్వ శాఖలన్నింటినీ ఒకే ప్రాంగణంలోకి తీసుకురావడం ద్వారా పరిపాలనలో సమన్వయం మెరుగుపడుతుందని బీజేపీ రాష్ట్ర అధ్యక్షుడు పీవీఎన్ మాధవ్ వివరించారు. దీనివల్ల ప్రజలకు మరింత వేగవంతమైన, పారదర్శకమైన సేవలు అందుతాయని ఆయన స్పష్టం చేశారు.

**అత్యాధునిక సదుపాయాలతో నివాస సముదాయాలు**

కేంద్ర ప్రభుత్వ ఉద్యోగుల సౌకర్యార్థం 17 ఎకరాల విస్తీర్ణంలో జనరల్ పూల్ రెసిడెన్షియల్ అకామడేషన్ (జీపీఆర్ఏ) ప్రాజెక్టును సైతం చేపట్టనున్నారు. దీని నిర్మాణానికి రూ.1,234.91 కోట్లు వెచ్చించనున్నారు. ఈ ప్రాజెక్టులో భాగంగా మొత్తం 1,504 ఆధునిక నివాస యూనిట్లను నిర్మించనున్నారు. సువిశాలమైన పార్కింగ్ సదుపాయాలు, కమ్యూనిటీ హాళ్లు, పచ్చని వాతావరణం, ఇతర మౌలిక వసతులతో ఈ నివాస సముదాయాన్ని ఒక సుందరమైన టౌన్‌షిప్‌లా తీర్చిదిద్దనున్నారు. ఈ రెండు ప్రతిష్టాత్మక ప్రాజెక్టుల నిర్మాణ బాధ్యతలను కేంద్ర ప్రజా పనుల శాఖ (సీపీడబ్ల్యూడీ) తీసుకోనుందని, పర్యావరణ పరిరక్షణకు పెద్దపీట వేస్తూ పూర్తిగా గ్రీన్ బిల్డింగ్ ప్రమాణాలకు అనుగుణంగా ఈ భవనాలను నిర్మించనున్నట్లు మాధవ్ వెల్లడించారు.

**భారీగా ఉపాధి అవకాశాలు.. కేంద్రానికి కృతజ్ఞతలు**

ఈ భారీ ప్రాజెక్టుల నిర్మాణాల వల్ల క్షేత్రస్థాయిలో ఉపాధి అవకాశాలు కూడా విశేషంగా పెరగనున్నాయి. నిర్మాణ దశలో ప్రతి ఏటా సుమారు 7 లక్షల మాన్-డేస్ ఉపాధి లభిస్తుందని, అలాగే నిర్మాణం పూర్తయిన తర్వాత నిర్వహణ దశలో మరో 50 వేల మాన్-డేస్ ఉపాధి అవకాశాలు సృష్టించబడతాయని అంచనా వేస్తున్నారు. అమరావతిలో శాసనసభ, సచివాలయం, హైకోర్టు వంటి రాష్ట్ర ప్రభుత్వ భవనాలతో పాటు, కేంద్ర ప్రభుత్వ కార్యాలయాలు కూడా ఒకే చోట కొలువుదీరడం శుభపరిణామమని పీవీఎన్ మాధవ్ పేర్కొన్నారు. ఏపీ రాజధాని నిర్మాణం, మౌలిక సదుపాయాల అభివృద్ధి విషయంలో కేంద్ర ప్రభుత్వం చూపుతున్న అపారమైన చిత్తశుద్ధికి ఈ నిర్ణయమే నిదర్శనమని ఆయన కొనియాడారు. రాష్ట్ర ప్రజల ప్రయోజనాలను కాంక్షిస్తూ అమరావతి అభివృద్ధికి వెన్నెముకగా నిలుస్తున్న ప్రధానమంత్రి నరేంద్ర మోదీ, కేంద్ర ఆర్థిక మంత్రి నిర్మలా సీతారామన్, కేంద్ర గృహ-పట్టణ వ్యవహారాల మంత్రిత్వ శాఖకు, కేంద్ర కేబినెట్‌కు రాష్ట్ర బీజేపీ తరఫున, ప్రజల తరఫున పీవీఎన్ మాధవ్ ప్రత్యేక కృతజ్ఞతలు తెలియజేశారు.