తప్పుడు ప్రచారాలు చేస్తున్న ఫుడ్ కంపెనీలకు ఎఫ్ఎస్ఎస్ఏఐ షాక్!
* ‘హెల్తీ’, ‘ఆర్గానిక్’, ‘వేగన్’ పదాలపై తీవ్ర అభ్యంతరం.
* 15 ప్రముఖ సంస్థలకు నోటీసులు.
* లేబుళ్లపై ప్రకటనలకు, లోపల ఉన్న ఉత్పత్తికి పొంతన లేదని గుర్తింపు.
* ఆహార భద్రతా చట్టాన్ని ఉల్లంఘిస్తే కఠిన చర్యలు: రెగ్యులేటర్ హెచ్చరిక.
ఢిల్లీ, మహా.
ప్యాకేజ్డ్ ఫుడ్ రంగంలో ‘ఆరోగ్యకరం’, ‘సేంద్రియం’ వంటి ఆకర్షణీయమైన పేర్లతో వినియోగదారులను నిలువునా ముంచుతున్న పలు ఆహార ఉత్పత్తుల కంపెనీలపై భారత ఆహార భద్రత, ప్రమాణాల ప్రాధికార సంస్థ (ఎఫ్ఎస్ఎస్ఏఐ) కొరడా ఝుళిపించింది. ఉత్పత్తుల లేబుళ్లు, బ్రాండ్ పేర్ల విషయంలో ఆహార భద్రత, ప్రమాణాల చట్టం-2006ను నిస్సిగ్గుగా ఉల్లంఘిస్తున్నారనే ఆరోపణలపై దేశంలోని దాదాపు 15 ప్రముఖ సంస్థలకు ఎఫ్ఎస్ఎస్ఏఐ గట్టి నోటీసులు జారీ చేసింది. ఈ మేరకు తీసుకున్న పకడ్బందీ చర్యలకు సంబంధించిన పూర్తి వివరాలను జూన్ 14న రెగ్యులేటర్ అధికారికంగా వెల్లడించింది.
మార్కెట్లో విక్రయించే ఆహార పదార్థాలపై ఎలాంటి శాస్త్రీయ ఆధారాలు, ముందస్తు అనుమతులు లేకుండానే ‘హెల్తీ’, ‘జీరో మైదా’, ‘ఆర్గానిక్’, ‘వేగన్’ వంటి పదాలను విచ్చలవిడిగా వాడుతూ కంపెనీలు కస్టమర్లను తప్పుదారి పట్టిస్తున్నాయని ఎఫ్ఎస్ఎస్ఏఐ నిఘాలో తేలింది. ఈ నేపథ్యంలో నిబంధనలు ఉల్లంఘించిన సుమారు 15 సంస్థలు, నిర్దిష్ట ఉత్పత్తులకు అధికారులు నోటీసులు పంపారు. ముఖ్యంగా ‘హెల్తీ మాస్టర్’, ‘ఇమామీ హెల్తీ అండ్ టేస్టీ’, ‘ది హెల్తీ ఫ్యాక్టరీ’ వంటి బ్రాండ్ల పేర్లలోనే ‘హెల్తీ’ అనే పదాన్ని చేర్చి, అవి ఆరోగ్యానికి ఎంతో మేలు చేస్తాయనే భ్రమ కల్పిస్తుండటంపై సంస్థ తీవ్ర అభ్యంతరం వ్యక్తం చేసింది.
అదేవిధంగా, మార్కెట్లో భారీ డిమాండ్ ఉన్న ఆర్గానిక్ ఉత్పత్తుల విభాగంలోనూ పెద్ద ఎత్తున మోసాలు జరుగుతున్నట్లు ఎఫ్ఎస్ఎస్ఏఐ గుర్తించింది. ‘టూ బ్రదర్స్ ఆర్గానిక్ ఫామ్స్’, ‘ఆర్గానిక్ విజ్డమ్’ వంటి సంస్థలు ప్రభుత్వం నుంచి ఎలాంటి ముందస్తు ధ్రువీకరణ (సర్టిఫికేషన్) లేకుండానే తమ బ్రాండ్లలో ‘ఆర్గానిక్’ అనే పదాన్ని యథేచ్ఛగా వాడుతున్నాయని ఆరోపించింది. ఇక ప్రముఖ బ్రాండ్ ‘స్టోరియా’కు చెందిన దానిమ్మ రసంలో కేవలం 4 శాతం మాత్రమే పండ్ల గుజ్జు ఉన్నప్పటికీ, అది వంద శాతం సంపూర్ణ పండ్ల రసం అనే తప్పుడు కలరింగ్ ఇస్తున్నట్లు అధికారులు పట్టుకున్నారు. మరికొన్ని బ్రాండ్లు సైతం ‘జీరో మైదా’, ‘ట్రూ విటమిన్’, ‘ప్లాంట్-బేస్డ్ వేగన్’ వంటి గుర్తింపు లేని క్లెయిమ్స్తో వినియోగదారులను నిలువునా మోసం చేస్తున్నాయని ఎఫ్ఎస్ఎస్ఏఐ ఆధారాలతో సహా వివరించింది.
ఈ పరిణామాల నేపథ్యంలో, ఆహార ఉత్పత్తుల తయారీ కంపెనీలన్నీ తక్షణమే తమ లేబులింగ్, ప్రకటనల నిబంధనలను కచ్చితంగా పాటించాలని, లేనిపక్షంలో కఠిన చర్యలు తప్పవని రెగ్యులేటర్ గట్టిగా ఆదేశించింది. మరోవైపు వినియోగదారులు కూడా ప్యాకెట్లపై ఉండే కేవలం ఆకర్షణీయమైన బ్రాండ్ పేరును చూసి మోసపోవద్దని హెచ్చరించింది. కొనుగోలు చేసే ముందే ప్యాకెట్ల వెనుక భాగంలో ఉండే పోషకాల పట్టిక (న్యూట్రిషన్ ఫ్యాక్ట్స్), సదరు ఉత్పత్తి తయారీకి వాడిన పదార్థాల (ఇంగ్రిడియంట్స్) జాబితాను నిశితంగా పరిశీలించి నిర్ణయం తీసుకోవాలని సూచించింది. ఎఫ్ఎస్ఎస్ఏఐ తీసుకున్న ఈ సంచలన చర్యతో దేశీయ ప్యాకేజ్డ్ ఫుడ్ రంగంలో మరింత పారదర్శకత, జవాబుదారీతనం పెరుగుతుందని నిపుణులు భావిస్తున్నారు.
