ఇందిరమ్మ ఇళ్ల రెండో విడతలో గుడిసె వాసులకే తొలి ప్రాధాన్యం.
* రాష్ట్రవ్యాప్తంగా 75 వేల దరఖాస్తులపై క్షేత్రస్థాయి పరిశీలన.
* రెండో విడతలో 2.50 లక్షల ఇళ్ల నిర్మాణం.
* నియోజకవర్గానికి 2 వేల చొప్పున కేటాయింపు.
* పైకప్పుల మార్పునకు రూ.2 లక్షల వరకు ప్రభుత్వ సాయం.
హైదరాబాద్, మహా.
రాష్ట్రంలో అత్యంత ప్రతిష్టాత్మకంగా చేపడుతున్న ఇందిరమ్మ ఇళ్ల నిర్మాణ పథకం రెండో విడతలో గుడిసె వాసులకే మొదటి ప్రాధాన్యత ఇస్తామని తెలంగాణ గృహనిర్మాణ శాఖ మంత్రి పొంగులేటి శ్రీనివాసరెడ్డి స్పష్టం చేశారు. బుధవారం హైదరాబాద్లో గృహ నిర్మాణ శాఖ ఉన్నతాధికారులతో నిర్వహించిన ఉన్నత స్థాయి సమీక్షా సమావేశంలో ఆయన ఇందిరమ్మ ఇళ్ల ప్రగతిపై సుదీర్ఘంగా చర్చించారు. ఈ సందర్భంగా మంత్రి మాట్లాడుతూ, రాష్ట్రవ్యాప్తంగా ఉన్న గుడిసెలను ఖచ్చితంగా గుర్తించేందుకు వీలుగా తక్షణమే ప్రత్యేక సర్వే నిర్వహించాలని అధికారులను ఆదేశించారు. ప్రస్తుతం అందుబాటులో ఉన్న 75 వేల గుడిసెల దరఖాస్తులపై క్షేత్రస్థాయిలో పూర్తిస్థాయి పరిశీలన జరపాలని, లబ్ధిదారుల ఎంపిక ప్రక్రియను అత్యంత పారదర్శకంగా, ఎలాంటి అవకతవకలకు తావులేకుండా చేపట్టాలని స్పష్టం చేశారు. ఇందిరమ్మ ఇళ్ల కోసం గతంలో దరఖాస్తు చేసుకోలేకపోయిన గుడిసె వాసులకు ప్రభుత్వం తరఫున మరొక సువర్ణ అవకాశం కల్పిస్తున్నట్లు ఈ సందర్భంగా మంత్రి ప్రకటించారు.
**నియోజకవర్గానికి 2 వేల ఇళ్లు.. రూఫ్ రీప్లేస్మెంట్కు ప్రాధాన్యత**
రాష్ట్రవ్యాప్తంగా రెండో విడత కింద మొత్తం 2.50 లక్షల ఇందిరమ్మ ఇళ్ల నిర్మాణాన్ని భారీ ఎత్తున చేపట్టబోతున్నామని మంత్రి పొంగులేటి వివరించారు. ఇందులో భాగంగా ప్రతి అసెంబ్లీ నియోజకవర్గానికి 2 వేల ఇళ్లను నిర్మించనున్నట్లు వెల్లడించారు. ఇందిరమ్మ ఇళ్లతో పాటు నిరుపేదల కోసం ఉద్దేశించిన ‘రూఫ్ రీప్లేస్మెంట్’ (ఇంటి పైకప్పుల మార్పు) పథకానికి కూడా తమ ప్రభుత్వం ప్రత్యేక ప్రాధాన్యత ఇస్తుందని పేర్కొన్నారు. ఈ పథకం కింద ప్రతి నియోజకవర్గానికి 500 ఇళ్ల చొప్పున రాష్ట్రవ్యాప్తంగా దాదాపు 50 వేల నిరుపేద కుటుంబాలకు లబ్ధి చేకూర్చడమే లక్ష్యంగా పెట్టుకున్నట్లు తెలిపారు. ప్రమాదకరంగా మారిన ఇంటి పైకప్పుల మార్పునకు, పాత వాటి స్థానంలో కొత్తవి నిర్మించుకోవడానికి ప్రభుత్వం తరఫున రూ. 2 లక్షల వరకు ఆర్థిక సాయం అందజేస్తామని మంత్రి భరోసా ఇచ్చారు. గతంలో వివిధ కారణాల వల్ల అసంపూర్తిగా నిలిచిపోయిన ఇళ్లను కూడా ఈ ప్రత్యేక పథకం పరిధిలోకి తెచ్చి పూర్తి చేయిస్తామని స్పష్టం చేశారు.
**లబ్ధిదారుడే నిర్మాణదారుడు.. పట్టణాల్లో జీ+1 కి అనుమతి**
ఇందిరమ్మ ఇళ్ల నిర్మాణంలో లబ్ధిదారుడే స్వయంగా నిర్మాణదారుడిగా వ్యవహరిస్తారని, బీఎల్సీ (బెనిఫిషియరీ లెడ్ కన్స్ట్రక్షన్) విధానంలోనే ఈ ఇళ్ల నిర్మాణ ప్రక్రియ మొత్తం కొనసాగుతుందని మంత్రి వివరించారు. పట్టణ ప్రాంతాలలో నివసించే నిరుపేదల స్థల లభ్యతను బట్టి, అవసరమైతే జీ+1 (గ్రౌండ్ ప్లస్ వన్) అంతస్తుల నిర్మాణాలకు కూడా అనుమతులు మంజూరు చేస్తామని మంత్రి పొంగులేటి శ్రీనివాసరెడ్డి ఈ సందర్భంగా స్పష్టం చేశారు. అర్హులైన ప్రతి ఒక్కరికీ సొంతింటి కల నెరవేర్చడమే ప్రభుత్వ ధ్యేయమని ఆయన పునరుద్ఘాటించారు.
