సీపీ, ఏసీపీ, డీజీపీల పాత్రపైనా దర్యాప్తు జరపాలి!

సీపీ, ఏసీపీ, డీజీపీల పాత్రపైనా దర్యాప్తు జరపాలి!
* సాయికృష్ణ లాకప్ డెత్ ఘటనపై సీబీఐ విచారణకు వైఎస్ జగన్ డిమాండ్.
* విజయవాడలో బాధితుడి కుటుంబాన్ని పరామర్శించిన మాజీ ముఖ్యమంత్రి.
* చట్టాన్ని చేతుల్లోకి తీసుకునే అధికారం పోలీసులకు ఎవరిచ్చారు?
విజయవాడ, మహా.
విజయవాడ నగరంలో రౌడీషీటర్ సాయికృష్ణ అత్యంత పాశవికంగా లాకప్ డెత్‌కు గురైన ఘటనపై పూర్తిస్థాయిలో సీబీఐ విచారణ జరిపించాలని మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి డిమాండ్ చేశారు. విజయవాడలోని కృష్ణలంక ప్రాంతంలో నివసిస్తున్న సాయికృష్ణ కుటుంబ సభ్యులను గురువారం ఆయన స్వయంగా పరామర్శించారు. అనంతరం ఏర్పాటు చేసిన మీడియా సమావేశంలో జగన్ మాట్లాడుతూ.. రాష్ట్రవ్యాప్తంగా తీవ్ర కలకలం రేపిన ఈ ఘటనపై సమగ్రమైన, స్వతంత్రమైన దర్యాప్తు జరగాల్సిన అవసరం ఉందని స్పష్టం చేశారు.

విజయవాడ నగర నడిబొడ్డున ఇంతటి దారుణమైన ఘటన జరగడం పోలీసు వ్యవస్థ తీరుకు అద్దం పడుతోందని వైఎస్ జగన్ విమర్శించారు. ఈ వ్యవహారంలో కేవలం క్షేత్రస్థాయిలో ఉన్న సర్కిల్ ఇన్‌స్పెక్టర్ (సీఐ) మాత్రమే కాకుండా.. ఉన్నత స్థాయి పోలీసు అధికారుల పాత్రపైనా సమగ్ర విచారణ జరగాలని ఆయన డిమాండ్ చేశారు. విజయవాడ నగర పోలీస్ కమిషనర్ (సీపీ), ఏసీపీలతో పాటు రాష్ట్ర డైరెక్టర్ జనరల్ ఆఫ్ పోలీస్ (డీజీపీ) వరకు ఈ ఘటనలో ఎవరెవరి పాత్ర ఉందో దర్యాప్తు చేసి వారి బాధ్యతను నిర్ధారించాల్సిన అవసరం ఉందన్నారు.

గత మే 9వ తేదీన పోలీసులు సాయికృష్ణను బలవంతంగా తీసుకెళ్లిన నాటి నుంచి.. తన కుమారుడి ఆచూకీ ఎక్కడో చెప్పాలంటూ ఆయన తల్లి ఎన్నోమార్లు పోలీస్ స్టేషన్ల చుట్టూ తిరిగి కన్నీరుమున్నీరైందని జగన్ గుర్తుచేశారు. కనీసం తన కొడుకును ఒక్కసారి చూపించాలని కోరినా అక్కడి అధికారులు సరైన సమాధానం ఇవ్వలేదని, కుటుంబ సభ్యులు ఇచ్చిన ఫిర్యాదులను సైతం పూర్తిగా బుట్టదాఖలు చేశారని ఆరోపించారు. పోలీసుల నుంచి ఎలాంటి స్పందన లేకపోవడంతోనే బాధిత కుటుంబం కోర్టులో హెబియస్ కార్పస్ పిటిషన్ కూడా దాఖలు చేయాల్సి వచ్చిందని పేర్కొన్నారు.

ఇంతటి ఘోర కలికానికి కారణమైన సంబంధిత అధికారులపై అత్యంత కఠినమైన చర్యలు తీసుకోవాల్సిన సమయంలో.. ప్రభుత్వం కేవలం సీఐ నాగరాజును సస్పెండ్ చేసి చేతులు దులుపుకుందని వైఎస్ జగన్ తీవ్రంగా విమర్శించారు. ఒక్కరు కాదు.. ఏకంగా ఇద్దరి మరణాలకు సదరు సీఐ కారణమయ్యాడనే బలమైన ఆరోపణలు వస్తున్నప్పటికీ, ఇప్పటివరకు పూర్తి స్థాయి దర్యాప్తు జరపకపోవడం వెనుక అర్థమేంటని ప్రశ్నించారు. ఒకవేళ సాయికృష్ణ ఏదైనా తప్పు చేసి ఉంటే.. చట్టప్రకారం న్యాయస్థానాలు ఆయనకు శిక్ష విధించేవని, కానీ పోలీసులు చట్టాన్ని తమ చేతుల్లోకి తీసుకుని ప్రాణాలు తీసే హక్కు ఎవరిచ్చారని నిలదీశారు. ఈ కేసులో దాగి ఉన్న అసలు నిజాలు, శక్తులు బయటకు రావాలంటే సీబీఐ విచారణే శరణ్యమని డిమాండ్ చేశారు. బాధితుడి కుటుంబానికి వైఎస్సార్‌సీపీ అన్ని విధాలా అండగా ఉంటుందని, వారికి పూర్తి న్యాయం జరిగే వరకు తాము పోరాటం కొనసాగిస్తామని వైఎస్ జగన్మోహన్ రెడ్డి స్పష్టం చేశారు.