ఢిల్లీ జింఖానా క్లబ్కు కేంద్రం షాక్.
* ఖాళీ చేయాలంటూ షోకాజ్ నోటీసు జారీ.
ఢిల్లీ, మహా.
దేశ రాజధానిలోని అత్యంత కీలకమైన ల్యూటెన్స్ జోన్లో ఉన్న ప్రతిష్టాత్మక ఢిల్లీ జింఖానా క్లబ్ను ఖాళీ చేయించే దిశగా కేంద్ర ప్రభుత్వం తన చర్యలను వేగవంతం చేసింది. సఫ్దర్జంగ్ రోడ్డులో సుమారు 27.3 ఎకరాల విస్తీర్ణంలో ఉన్న ఈ ప్రాంగణాన్ని స్వాధీనం చేసుకునేందుకు ‘పబ్లిక్ ప్రెమిసెస్ (ఎవిక్షన్) యాక్ట్, 1971’ చట్టం కింద క్లబ్ యాజమాన్యానికి కేంద్రం తాజాగా షోకాజ్ నోటీసులు జారీ చేసింది.
ఈ వ్యవహారంలో ఎస్టేట్ అధికారి స్పందిస్తూ, క్లబ్ను ఎందుకు ఖాళీ చేయించకూడదో వివరణ ఇవ్వాలని యాజమాన్యాన్ని ఆదేశించారు. ఇందుకోసం జూలై 7వ తేదీ మధ్యాహ్నం 2:30 గంటలకు విచారణకు విధిగా హాజరుకావాలని ఆ నోటీసులో పేర్కొన్నారు. క్లబ్ ప్రతినిధులు తమ వాదనలకు మద్దతుగా తగిన ఆధారాలను సమర్పించాల్సి ఉంటుందని, లేనిపక్షంలో చట్టప్రకారం ఏకపక్షంగా నిర్ణయం తీసుకోవాల్సి ఉంటుందని ఆయన హెచ్చరించారు.
లీజు ఒప్పందాన్ని రద్దు చేసిన తర్వాత కూడా క్లబ్ ఈ ప్రాంగణంలో కొనసాగడం పూర్తిగా చట్టవిరుద్ధమని, అనధికారికమని కేంద్ర ప్రభుత్వం వాదిస్తోంది. ప్రధానమంత్రి నివాసంతో సహా అనేక వ్యూహాత్మక ప్రాంతాలకు అత్యంత సమీపంలో ఉన్న ఈ భూమిని రక్షణ రంగ మౌలిక సదుపాయాలు, ప్రజా భద్రత, పరిపాలనా అవసరాలతో పాటు ఇతర ప్రజా ప్రయోజన ప్రాజెక్టుల కోసం వినియోగించాల్సిన అవసరం ఉందని ప్రభుత్వం స్పష్టం చేస్తోంది.
వాస్తవానికి 1928 నాటి లీజు ఒప్పందం ప్రకారం ఈ క్లబ్ ఇక్కడ కార్యకలాపాలు సాగిస్తోంది. అయితే, ఆ ఒప్పందంలోని క్లాజ్ 4 ప్రకారం, ప్రజా ప్రయోజనాల దృష్ట్యా అవసరమైతే ఆ భూమిని తిరిగి స్వాధీనం చేసుకునే పూర్తి హక్కు ప్రభుత్వానికి ఉంటుంది. ఈ నిబంధనను పురస్కరించుకునే కేంద్రం ప్రస్తుతం చర్యలు చేపట్టింది. కాగా, క్లబ్ నిర్వహణలో పెద్దఎత్తున అవకతవకలు జరిగాయని, సుమారు రూ. 47 కోట్ల నుంచి రూ. 48 కోట్ల వరకు అద్దె బకాయిలు ఉన్నాయన్న ఆరోపణలు కూడా ఉన్నాయి. ఈ క్రమంలోనే గత మే నెలలో ప్రభుత్వం జారీ చేసిన ఆదేశాలను సవాలు చేస్తూ క్లబ్ యాజమాన్యం ఢిల్లీ హైకోర్టును ఆశ్రయించగా, ఆ కేసు ప్రస్తుతం విచారణ దశలో ఉంది.
