- అన్నదాతల ఆశీర్వాద సభకు కనీవినీ ఎరుగని ఏర్పాట్లు!
ఖమ్మం,మహా.
తెలంగాణ రైతాంగం మురిసిపోయేలా, వ్యవసాయ రంగంలో నవ శకానికి నాంది పలుకుతూ రాష్ట్ర ముఖ్యమంత్రి రేవంత్ రెడ్డి ఖమ్మం గడ్డపై అడుగుపెట్టనున్నారు. జిల్లాలోని చింతకాని మండలం జగన్నాథపురం వేదికగా జూలై 10వ తేదీన మధ్యాహ్నం 2 గంటలకు జరగనున్న అత్యంత ప్రతిష్టాత్మక ‘రైతు ఆశీర్వాద సభ’ కోసం అధికార యంత్రాంగం కనీవినీ ఎరుగని రీతిలో భారీ ఏర్పాట్లు చేస్తోంది. స్వయంగా రాష్ట్ర వ్యవసాయ శాఖ మంత్రి తుమ్మల నాగేశ్వరరావు అహర్నిశలు శ్రమిస్తూ ఈ మహాసభ ఏర్పాట్లను పర్యవేక్షిస్తున్నారు. గత నెల జూన్ 30న జరగాల్సిన ఈ సభ భారీ వర్షాల కారణంగా వాయిదా పడటంతో, ఈసారి మరింత ప్రతిష్టాత్మకంగా, లక్షలాది మంది రైతుల సమక్షంలో ఒక చారిత్రక ఘట్టంగా మలిచేందుకు రేవంత్ ప్రభుత్వం సర్వసన్నద్ధమైంది. మాట తప్పని, మడమ తిప్పని ప్రజాపాలనలో రైతుల పక్షపాతిగా నిలుస్తున్న ముఖ్యమంత్రికి నీరాజనాలు పలికేందుకు ఖమ్మం జిల్లా రైతాంగం ఉవ్విళ్లూరుతోంది.
గత ప్రభుత్వం సృష్టించిన భయంకరమైన ఆర్థిక విధ్వంసాన్ని సైతం ఏమాత్రం లెక్కచేయకుండా, అన్నదాతలకు కొండంత అండగా నిలుస్తోంది రేవంత్ రెడ్డి సర్కార్. జూన్ 30న హైదరాబాద్లోని శిల్పకళా వేదికలో రైతు భరోసా నిధులను విడుదల చేసిన ముఖ్యమంత్రి, చెప్పిన మాట ప్రకారం జూలై 9 నాటికే అక్షరాలా రూ.9 వేల కోట్ల భారీ నిధులను రైతుల ఖాతాల్లో జమ చేసి సంచలనం సృష్టించారు. ఈ ఆర్థిక ప్రక్రియను విజయవంతంగా పూర్తి చేసిన వెంటనే, గర్వంగా రైతుల మధ్యకు వచ్చి వారి ఆశీర్వాదం తీసుకునేందుకు ముఖ్యమంత్రి రేవంత్ రెడ్డి సమాయత్తం కావడం రాజకీయ, వ్యవసాయ వర్గాల్లో తీవ్ర ఆసక్తిని రేకెత్తిస్తోంది.
సాగునీటి రంగంలో ఖమ్మం జిల్లా దశ, దిశను శాశ్వతంగా మార్చేలా ప్రభుత్వం సంచలన అడుగులు వేస్తోంది. సీతారామ ప్రాజెక్టు నుంచి గోదావరి జలాలను రాజీవ్ లింక్ కాలువ ద్వారా వైరా రిజర్వాయర్కు తరలిస్తూ.. సాగర్ ఎడమ కాలువ ఆయకట్టుకు సైతం భరోసా కల్పిస్తున్న అద్భుత ఘట్టం ఆవిష్కృతం కాబోతోంది. ఒకవేళ నాగార్జున సాగర్ జలాలు అందుబాటులోకి రాకపోయినా, రైతులు ఏమాత్రం నష్టపోకుండా ఆరుతడి పంటలకు సైతం గోదావరి నీటిని అందించేలా సాగునీటి శాఖను పూర్తిస్థాయిలో యుద్ధప్రాతిపదికన సన్నద్ధం చేశారు. అలాగే ఎల్నినో లాంటి ప్రకృతి విపత్తులను దీటుగా ఎదుర్కొనేందుకు ప్రత్యామ్నాయ, ఆరుతడి, మెట్ట పంటల వైపు రైతులను ప్రోత్సహిస్తున్నారు. ముఖ్యంగా దీర్ఘకాలిక లాభాలు తెచ్చిపెట్టే పామాయిల్ సాగులో ఉమ్మడి ఖమ్మం జిల్లా దేశానికే ఆదర్శంగా నిలవడం తెలంగాణ వ్యవసాయ చరిత్రలో సువర్ణాక్షరాలతో లిఖించదగ్గ విషయం.
మరోవైపు ఎరువుల పంపిణీలోనూ తెలంగాణ రాష్ట్రం దేశానికే దిక్సూచిగా మారడం విశేషం. రాష్ట్ర ప్రభుత్వం అత్యంత ప్రతిష్టాత్మకంగా రూపొందించిన “తెలంగాణ ఎరువులు” యాప్ను ఏకంగా కేంద్ర ప్రభుత్వమే దేశవ్యాప్తంగా అమలు చేయదగిన ఆదర్శ నమూనాగా గుర్తించడం రేవంత్ సర్కార్ సాధించిన ఘనవిజయం. రైతులకు ఏ కాలంలోనైనా ఎరువుల కొరత రానివ్వకుండా ప్రభుత్వం ఉక్కుపాదం మోపుతోందని మంత్రి తుమ్మల స్పష్టం చేశారు. ఇంతటి అద్భుతమైన సంక్షేమ, అభివృద్ధి కార్యక్రమాలతో దూసుకుపోతున్న ముఖ్యమంత్రి రేవంత్ రెడ్డి ప్రభుత్వాన్ని నిండు మనసుతో ఆశీర్వదించేందుకు జూలై 10న రైతులంతా కదం తొక్కుతూ తండోపతండాలుగా తరలిరావాలని మంత్రి తుమ్మల నాగేశ్వరరావు పిలుపునిచ్చారు. ఈ మహాసభ తెలంగాణ వ్యవసాయ చరిత్రలో ఒక సువర్ణ అధ్యాయంగా నిలిచిపోవడం ఖాయంగా కనిపిస్తోంది.
