సీఎంపై కేసు నమోదు చేయాలి.
* బసవేశ్వర–సంగమేశ్వర పాదయాత్ర చేస్తా.
* మాజీ మంత్రి, బీఆర్ఎస్ శాసనసభాపక్ష ఉపనేత హరీశ్ రావు.
హైదరాబాద్, మహా.
రాష్ట్రంలో శాంతిభద్రతలు పూర్తిగా దెబ్బతిన్నాయని ఆరోపించిన మాజీ మంత్రి, బీఆర్ఎస్ శాసనసభాపక్ష ఉపనేత హరీశ్ రావు ముఖ్యమంత్రి రేవంత్ రెడ్డిపై తీవ్ర స్థాయిలో విమర్శలు గుప్పించారు. షాబాద్లో జరిగిన సామూహిక హత్యల ఘటనను ప్రస్తావిస్తూ, ముఖ్యమంత్రి చేసిన వ్యాఖ్యలు హింసను ప్రేరేపించేలా ఉన్నాయని ఆరోపించిన ఆయన, చట్టం ముందు అందరూ సమానమేనని పేర్కొంటూ సీఎంపై డీజీపీ వెంటనే కేసు నమోదు చేయాలని డిమాండ్ చేశారు.
సోమవారం నారాయణఖేడ్లో జరిగిన బీఆర్ఎస్ కార్యకర్తల ఆత్మీయ సమ్మేళనం, సభ్యత్వ నమోదు, ఎస్ఐఆర్ అవగాహన కార్యక్రమంలో ఆయన ఈ వ్యాఖ్యలు చేశారు.
నారాయణఖేడ్లోని కింగ్స్ ప్యాలెస్ ఫంక్షన్ హాల్లో సోమవారం నిర్వహించిన కార్యక్రమంలో పాల్గొన్న హరీశ్ రావు కాంగ్రెస్ ప్రభుత్వంపై విస్తృతంగా విమర్శలు గుప్పించారు. రాష్ట్రంలో పోలీసు వ్యవస్థ రాజకీయ కక్షసాధింపులకు, భూ వివాదాల సెటిల్మెంట్లకే పరిమితమైందని, ప్రజల భద్రతను పూర్తిగా విస్మరించిందని ఆరోపించారు. బీఆర్ఎస్ కార్యకర్తలు సామాజిక మాధ్యమాల్లో పోస్టులు పెడితే వెంటనే అరెస్టులు చేసే పోలీసులు, షాబాద్ ఘటనలో నిందితుడిని మాత్రం దీర్ఘకాలం పట్టుకోలేకపోయారని ప్రశ్నించారు.
షాబాద్లో జరిగిన దారుణ ఘటనకు కాంగ్రెస్ నాయకత్వం పరోక్షంగా బాధ్యత వహించాలని హరీశ్ రావు ఆరోపించారు. పోక్సో కేసులో నిందితుడికి కాంగ్రెస్కు చెందిన ఓ నాయకుడు డబ్బులు తీసుకుని సహకరించాడని, దాని ఫలితంగానే అనంతరం ఆరుగురు ప్రాణాలు కోల్పోయే విషాదం చోటుచేసుకుందని విమర్శించారు. ఈ ఘటనపై ఇతర రాష్ట్రాల ముఖ్యమంత్రులు స్పందించినప్పటికీ తెలంగాణ ముఖ్యమంత్రి స్పందించకపోవడం బాధాకరమని అన్నారు.
కరువు పరిస్థితులపై ముఖ్యమంత్రి చేసిన వ్యాఖ్యలను ప్రస్తావించిన హరీశ్ రావు, ప్రజాప్రతినిధి హోదాలో అలాంటి భాష ఉపయోగించడం తగదని అన్నారు. హింసను ప్రేరేపించేలా వ్యాఖ్యలు చేసిన నేపథ్యంలో ముఖ్యమంత్రిపై చట్టపరమైన చర్యలు తీసుకోవాలని, డీజీపీ కేసు నమోదు చేయాలని డిమాండ్ చేశారు. చట్టం సామాన్యుడికైనా, ముఖ్యమంత్రికైనా ఒకటేనని పేర్కొన్నారు.
వ్యవసాయ రంగంపై కూడా కాంగ్రెస్ ప్రభుత్వాన్ని హరీశ్ రావు లక్ష్యంగా చేసుకున్నారు. సాగునీటి సమస్యపై రైతులు ఆందోళన వ్యక్తం చేస్తున్నా ప్రభుత్వం స్పందించడం లేదని, కన్నెపల్లి మోటార్లు ప్రారంభించి రైతులకు నీరు అందించాలని కోరితే బెదిరింపు ధోరణిలో స్పందిస్తున్నారని ఆరోపించారు. మేడిగడ్డ లేకుండానే నీటిని ఎత్తిపోసే అవకాశం ఉందని నిపుణులు సూచించినా వారి మాటలను ప్రభుత్వం పట్టించుకోలేదన్నారు.
సింగూరు ప్రాజెక్టు మరమ్మతుల పేరుతో నీటిని ఖాళీ చేసిన ప్రభుత్వం, వర్షాకాలం వచ్చినా పనులు పూర్తి చేయలేదని విమర్శించారు. దీంతో తాగునీటి సమస్య మరింత తీవ్రంగా మారిందన్నారు. రైతులకు మద్దతు ధర, బోనస్ ఇస్తామని ఎన్నికల ముందు హామీ ఇచ్చిన కాంగ్రెస్ ప్రభుత్వం ఇప్పుడు కేంద్రం చెప్పిన మేరకే ధాన్యం కొనుగోలు చేస్తోందని, రైతులు నష్టపోతున్నారని ఆరోపించారు.
వ్యవసాయానికి ఉచిత విద్యుత్, రుణమాఫీ, రైతుబంధు, రైతుబీమా వంటి అంశాల్లో కూడా ప్రభుత్వం హామీలను అమలు చేయలేదని హరీశ్ రావు విమర్శించారు. కేసీఆర్ ప్రభుత్వ హయాంలో అమలైన సంక్షేమ పథకాలు ఒక్కొక్కటిగా నిలిపివేశారని, రైతులకు వేల కోట్ల రూపాయల రైతుబంధు బకాయిలు ఉన్నాయని ఆరోపించారు. రైతుబీమా అమలు కూడా నిలిచిపోయిందని అన్నారు.
విద్యారంగంలో పరిస్థితి మరింత ఆందోళనకరంగా మారిందని పేర్కొన్న హరీశ్ రావు, పాఠశాలలు ప్రారంభమై వారాలు గడుస్తున్నా విద్యార్థులకు పాఠ్యపుస్తకాలు, యూనిఫారాలు అందలేదని విమర్శించారు. ప్రభుత్వ, గురుకుల పాఠశాలల విద్యార్థులు తీవ్ర ఇబ్బందులు ఎదుర్కొంటున్నారని, ఫీజు రీయింబర్స్మెంట్ కూడా నిలిచిపోవడంతో లక్షలాది మంది విద్యార్థులు నష్టపోతున్నారని ఆరోపించారు.
నారాయణఖేడ్, ఆందోల్ ప్రాంతాల సాగునీటి అవసరాల కోసం ప్రతిపాదించిన సంగమేశ్వర–బసవేశ్వర ప్రాజెక్టు పనులు నిలిచిపోయాయని ఆరోపించిన హరీశ్ రావు, ఈ ప్రాజెక్టులను పూర్తి చేయాలని ప్రభుత్వాన్ని డిమాండ్ చేశారు. ఈ అంశంపై ప్రజల్లో చైతన్యం కల్పించేందుకు త్వరలో నారాయణఖేడ్లోని బసవేశ్వర విగ్రహం నుంచి సంగమేశ్వర ప్రాజెక్టు వరకు భారీ పాదయాత్ర చేపడతామని ప్రకటించారు.
రానున్న ఎన్నికల్లో కాంగ్రెస్కు ప్రజలు గట్టి గుణపాఠం చెబుతారని హరీశ్ రావు అన్నారు. రాష్ట్రవ్యాప్తంగా బీఆర్ఎస్ మళ్లీ బలోపేతం అవుతోందని, మెదక్ జిల్లాలో అన్ని అసెంబ్లీ స్థానాలను బీఆర్ఎస్ గెలుచుకుంటుందని ధీమా వ్యక్తం చేశారు. కాంగ్రెస్ ప్రభుత్వం ఇచ్చిన హామీలను నెరవేర్చడంలో పూర్తిగా విఫలమైందని ఆరోపిస్తూ, ప్రజల సమస్యలపై సమాధానం చెప్పాల్సిన బాధ్యత ముఖ్యమంత్రిపైనే ఉందని హరీశ్ రావు పేర్కొన్నారు.
