- గొంతు పట్టి నెట్టేయడం, చీరలు లాగడం, జుట్టు పట్టి ఈడ్చుకెళ్లడం దారుణం.
- మహిళా ఎమ్మెల్యేలకే రక్షణ లేకపోతే సామాన్య మహిళల పరిస్థితి ఏంటి?: కవిత తీవ్ర ఆగ్రహం.
హైదరాబాద్‌: మహా.
తెలంగాణ శాసనసభ ప్రాంగణం వద్ద మహిళా శాసన సభ్యుల పట్ల పోలీసులు వ్యవహరించిన తీరు అత్యంత అమానుషంగా, దుర్మార్గంగా ఉందని మాజీ ఎమ్మెల్సీ కల్వకుంట్ల కవిత తీవ్రస్థాయిలో మండిపడ్డారు. రాజ్యాంగబద్ధంగా ఎన్నికైన ప్రజాప్రతినిధులనే పోలీసులు గౌరవించకుండా వ్యవహరించారని ఆమె ఆరోపించారు. మహిళా ఎమ్మెల్యేల పట్ల జరిగిన వ్యవహారంపై తక్షణమే విచారణ జరిపించి బాధ్యులపై కఠిన చర్యలు తీసుకోవాలని డిమాండ్‌ చేశారు.
ఈ మేరకు కవిత సామాజిక మాధ్యమ వేదికగా స్పందిస్తూ కాంగ్రెస్ ప్రభుత్వ వైఫల్యాలను అసెంబ్లీ సాక్షిగా ప్రశ్నించేందుకు వచ్చిన మాజీ మంత్రులు, సీనియర్‌ మహిళా ఎమ్మెల్యేలు సబితా ఇంద్రారెడ్డి, సునీతా లక్ష్మారెడ్డి తదితరులను పోలీసులు అడ్డుకునే క్రమంలో హద్దులు మీరి ప్రవర్తించారని ఆరోపించారు. ప్రజాప్రతినిధులు అనే విషయాన్ని కూడా పరిగణనలోకి తీసుకోకుండా మహిళా ఎమ్మెల్యేల పట్ల దురుసుగా వ్యవహరించారని విమర్శించారు.
మహిళా ఎమ్మెల్యేల గొంతు పట్టి నెట్టేయడం, చీరలు లాగడం, జుట్టు పట్టి ఈడ్చుకెళ్లడం, బూటు కాళ్లతో తొక్కి హింసించడం వంటి చర్యలకు పోలీసులు పాల్పడ్డారని కవిత ఆరోపించారు. ప్రజాస్వామ్య వ్యవస్థలో ఎన్నికైన ప్రజాప్రతినిధులతో ఇలాంటి రీతిలో వ్యవహరించడం అత్యంత హేయమైన చర్యగా అభివర్ణించారు. మహిళా శాసన సభ్యుల పట్ల పోలీసుల వ్యవహారశైలిపై ఆమె తీవ్ర ఆవేదన వ్యక్తం చేశారు.
మహిళా ఎమ్మెల్యేలకే రక్షణ లేకపోతే.. సామాన్య మహిళల పరిస్థితి ఏంటి?
రాజ్యాంగబద్ధంగా ఎన్నికైన మహిళా శాసనసభ్యులకే రాష్ట్రంలో భద్రత, రక్షణ లేకపోతే సామాన్య మహిళల పరిస్థితి ఎలా ఉంటుందో ఆలోచించాలని కవిత ప్రశ్నించారు. ప్రజలకు రక్షణ కల్పించాల్సిన పోలీసు వ్యవస్థే మహిళా ప్రజాప్రతినిధుల పట్ల దురుసుగా వ్యవహరించడం ఆందోళనకరమని పేర్కొన్నారు.
కాంగ్రెస్ ప్రభుత్వం అధికారంలోకి వచ్చిన నాటి నుంచి రాష్ట్రంలో మహిళలపై హింస, దాడులు పెరిగిపోయాయని కవిత ఆరోపించారు. మహిళల భద్రత విషయంలో ప్రభుత్వం పూర్తిగా విఫలమైందని విమర్శించారు. శాంతిభద్రతల పరిరక్షణలో పోలీసు యంత్రాంగం నిష్పక్షపాతంగా వ్యవహరించాల్సిన అవసరం ఉందని ఆమె పేర్కొన్నారు.
పోలీసు యంత్రాంగంపై తీవ్ర విమర్శలు
ప్రస్తుత డీజీపీ బాధ్యతలు చేపట్టిన తర్వాత రాష్ట్రంలో శాంతిభద్రతల పరిస్థితి పూర్తిగా దిగజారిపోయిందని కవిత ఆరోపించారు. పోలీసు యంత్రాంగం నిష్పక్షపాతంగా వ్యవహరించాల్సింది పోయి ప్రభుత్వానికి అనుకూలంగా వ్యవహరిస్తూ దౌర్జన్యాలకు పాల్పడుతోందని ఆమె విమర్శించారు.
ప్రజాస్వామ్యంలో నిరసన తెలిపే హక్కు ప్రతి ఒక్కరికీ ఉందని పేర్కొంటూ.. ప్రజా సమస్యలను ప్రభుత్వం దృష్టికి తీసుకెళ్లేందుకు వచ్చిన ప్రజాప్రతినిధులను అడ్డుకునే విధానం సరికాదని కవిత అన్నారు. ముఖ్యంగా మహిళా ఎమ్మెల్యేల పట్ల వ్యవహరించిన తీరు మరింత తీవ్రంగా పరిగణించాల్సిన అంశమని పేర్కొన్నారు.
బాధ్యులపై కఠిన చర్యలు తీసుకోవాలి
శాసనసభ ముట్టడి సమయంలో మహిళా ఎమ్మెల్యేలపై కర్కశంగా వ్యవహరించిన పోలీసు అధికారులపై తక్షణమే విచారణ జరిపించాలని కవిత డిమాండ్‌ చేశారు. ఘటనకు బాధ్యులైన అధికారులను గుర్తించి కఠిన చర్యలు తీసుకోవాలని కోరారు. ప్రజాప్రతినిధుల హక్కులను, మహిళల గౌరవాన్ని కాపాడాల్సిన బాధ్యత ప్రభుత్వంపై ఉందని స్పష్టం చేశారు.
మహిళా లోకాన్ని అవమానించేలా సాగిన ఈ ఘటనపై రాష్ట్రవ్యాప్తంగా నిరసనలు చేపడతామని కవిత హెచ్చరించారు. ప్రజాక్షేత్రంలో ప్రభుత్వ అణచివేత చర్యలను ఎండగడతామని ప్రకటించారు. మహిళా ఎమ్మెల్యేల పట్ల పోలీసులు వ్యవహరించిన తీరుపై సమగ్ర విచారణ జరిపి నిజానిజాలను ప్రజల ముందుంచాలని ఆమె డిమాండ్‌ చేశారు.
