- మెటా స్మార్ట్ గ్లాసెస్‌తో తీవ్ర యత్నం.
- కర్ణాటక సీఎం డీకే శివకుమార్ సంచలన ఆరోపణలు.
బెంగళూరు, మహా.
దేశ రాజకీయాల్లో సంచలనం సృష్టించేలా కర్ణాటక ముఖ్యమంత్రి డీకే శివకుమార్ తీవ్ర ఆరోపణలు గుప్పించారు. తనను లక్ష్యంగా చేసుకుని కొందరు భారీస్థాయిలో స్టింగ్ ఆపరేషన్‌కు కుట్ర పన్నారని ఆయన వెల్లడించారు. స్థానిక మీడియాకు ఇచ్చిన ప్రత్యేక ఇంటర్వ్యూలో ఆయన ఈ సంచలన విషయాలను బయటపెట్టారు. కేవలం తనపైనే కాకుండా కేరళ సీఎం వీడీ సతీశన్‌ను కూడా ఇదే రీతిలో టార్గెట్ చేశారని ఆయన వెల్లడించారు. కాంగ్రెస్ పార్టీ నాయకులే ప్రధాన లక్ష్యంగా ఈ కుట్రకు తెరలేపారని ఆయన ఆందోళన వ్యక్తం చేశారు.
అధికారుల ద్వారా సరైన అపాయింట్‌మెంట్ తీసుకుని ఒక పారిశ్రామికవేత్త తనను కలిసేందుకు వచ్చారని డీకే శివకుమార్ వివరించారు. తొలుత వ్యాపార వ్యవహారాల గురించి మాట్లాడిన ఆ వ్యక్తి, ఆ తర్వాత అకస్మాత్తుగా విషయాన్ని రాజకీయాలవైపు మళ్లించారని తెలిపారు. రాష్ట్రంలోని తాజా రాజకీయ పరిణామాలు, బూత్ స్థాయి వ్యూహాల గురించి ఆయన మాట్లాడటం ప్రారంభించడంతో తనకు అనుమానం కలిగిందని చెప్పారు. చర్చ మధ్యలో ఆ వ్యక్తి పెట్టుకున్న ప్రత్యేకమైన కళ్లద్దాలను గమనించిన తర్వాత, ఆ పారిశ్రామికవేత్త నేపథ్యంపై ఆరా తీయాలని అధికారులను ఆదేశించినట్లు ఆయన వెల్లడించారు. ఆ వ్యక్తి పెట్టుకున్నది సాధారణ కళ్లద్దాలు కాదని, అంతా రికార్డు చేసే ‘మెటా స్మార్ట్ గ్లాసెస్’ (Meta Smart Glasses) అని ఆ తర్వాత తేలిందని సీఎం తెలిపారు.
కేరళ సీఎం వీడీ సతీశన్‌ను కలిసిన సందర్భంగా కూడా ఆ వ్యక్తి అవే మెటా గ్లాసెస్ ధరించినట్లు తమకు సమాచారం అందిందని డీకే శివకుమార్ పేర్కొన్నారు. అయితే ఇతర రాష్ట్రాల ముఖ్యమంత్రులను కలిసేటప్పుడు మాత్రం ఆయన అలాంటి కళ్లద్దాలు పెట్టుకోలేదని తన దృష్టికి వచ్చిందని చెప్పారు. ఈ ఘటనపై తన కేబినెట్ సహచరులందరూ అత్యంత అప్రమత్తంగా ఉండాలని ముందే సూచించినట్లు తెలిపారు. ఈ స్టింగ్ ఆపరేషన్ ప్రయత్నంపై ఇప్పటివరకు ఎందుకు బహిరంగంగా చర్యలు తీసుకోలేదన్న ప్రశ్నకు స్పందిస్తూ, పోలీసులు ఈ విషయంలో అత్యంత గోప్యంగా, పకడ్బందీగా వ్యవహరిస్తున్నారని బదులిచ్చారు. తాము ఎలాంటి చర్యలు తీసుకోవడం లేదని ఎవరూ భావించవద్దని, చట్టపరమైన విషయాలను బయటకు చెప్పకుండా లోపల దర్యాప్తు జరుగుతోందని ఆయన స్పష్టం చేశారు.
ప్రస్తుతం కర్ణాటకలో మాజీ ముఖ్యమంత్రి సిద్ధరామయ్యకు సంబంధించిన స్టింగ్ ఆపరేషన్ వీడియోలు రాష్ట్ర రాజకీయాల్లో తీవ్ర కలకలం రేపుతున్న విషయం తెలిసిందే. ఈ పరిణామాలపై కాంగ్రెస్, ప్రతిపక్ష పార్టీల మధ్య తీవ్ర స్థాయిలో ఆరోపణలు, ప్రత్యారోపణలు కొనసాగుతున్నాయి. సొంత పార్టీ నేతలపైనే ఇంతటి కుట్ర జరుగుతున్నా మాజీ సీఎం సిద్ధరామయ్య ఎందుకు మౌనంగా ఉన్నారంటూ కేంద్ర మంత్రి కుమారస్వామి ఇప్పటికే తీవ్ర విమర్శలు గుప్పించారు. ఈ నేపథ్యంలో తెరవెనుక జరుగుతున్న ఈ పరిణామాలు, స్టింగ్ ఆపరేషన్ వెనుక అసలు సూత్రధారులు ఎవరనే అంశంపై రాజకీయ వర్గాల్లో తీవ్ర ఉత్కంఠ నెలకొంది.
