వందేమాతరం పూర్తి పాఠం ఆలాపనపై సుప్రీంకోర్టులో సవాల్..

•  కేంద్ర ఉత్తర్వులను రద్దు చేయాలంటూ మాజీ ఐఏఎస్ పిటిషన్!

న్యూఢిల్లీ, మహా.

జాతీయ గేయం ‘వందేమాతరం’ పూర్తి పాఠం ఆలాపనపై దేశ అత్యున్నత న్యాయస్థానంలో కొత్త వివాదం తెరపైకి వచ్చింది. ప్రభుత్వ , విద్యా సంబంధిత కార్యక్రమాల్లో ఆరు చరణాల వందేమాతరం గేయాన్ని విధిగా ఆలపించాలంటూ కేంద్ర ప్రభుత్వం జారీ చేసిన ఉత్తర్వులను సవాల్ చేస్తూ కేరళకు చెందిన మాజీ ఐఏఎస్ అధికారి బాలకృష్ణన్ సత్యభామ మావోజీ సుప్రీంకోర్టులో పిటిషన్ దాఖలు చేశారు. దేశ లౌకిక స్ఫూర్తికి, రాజ్యాంగ మౌలిక స్వరూపానికి ఈ ఉత్తర్వులు విఘాతం కలిగిస్తున్నాయని ఆయన తన పిటిషన్‌లో తీవ్ర ఆందోళన వ్యక్తం చేశారు.

ఈ ఏడాది జనవరి 28 మరియు జులై 9 తేదీలలో కేంద్ర ప్రభుత్వం జారీ చేసిన ఉత్తర్వుల ప్రకారం ఆరు చరణాల వందేమాతరం పాటించాలని నిర్దేశించడంపై పిటిషనర్ తీవ్ర అభ్యంతరం వ్యక్తం చేశారు. ప్రస్తుతం అమల్లో ఉన్న ఆరు చరణాల గేయం బంకించంద్ర ఛటర్జీ ప్రఖ్యాత చారిత్రక నవల అయిన ‘ఆనందమఠ్’ నుంచి గ్రహించినదని, ఇది ప్రాథమికంగా ఒక మతపరమైన యుద్ధ గీతమని ఆయన పేర్కొన్నారు. ఈ పూర్తి గేయంలో హిందూ దేవతలైన దుర్గా, లక్ష్మీ, సరస్వతిని స్తుతిస్తూ, ముస్లింలపై విజయం కోసం ప్రార్థించే వైష్ణవ, శాక్తేయ ప్రస్తావనలు స్పష్టంగా ఉన్నాయని పిటిషనర్ తెలిపారు.

ఇలాంటి మతపరమైన భావాలున్న గీతాన్ని పౌరులు బలవంతంగా ఆలపించాలని ఆదేశించడం వారి మనస్సాక్షి స్వేచ్ఛను పూర్తిగా హరించడమేనని, ఇది రాజ్యాంగంలోని అధికరణలు 14, 19, 21, 25 మరియు 28లకు ప్రత్యక్ష విరుద్ధమని ఆయన వాదించారు. స్వాతంత్ర్యం వచ్చిన నాటి నుంచి జాతీయ గేయంగా విశేష గుర్తింపు పొందిన తొలి రెండు చరణాలు కేవలం మాతృభూమి సౌందర్యాన్ని, దేశ గొప్పదనాన్ని మాత్రమే వర్ణిస్తాయని, వాటికి ఎలాంటి మతపరమైన నేపథ్యం లేదని పిటిషన్‌లో స్పష్టం చేశారు. నోబెల్ గ్రహీత రవీంద్రనాథ్ ఠాగూర్ సహా 1937 నాటి కాంగ్రెస్ వర్కింగ్ కమిటీ సైతం తొలి రెండు చరణాలనే అధికారికంగా ఆమోదించిందని ఆయన గుర్తుచేశారు.

కేంద్ర ప్రభుత్వం జారీ చేసిన ఈ కొత్త ఉత్తర్వులు దేశ లౌకికవాదం, సౌభ్రాతృత్వం వంటి రాజ్యాంగ మౌలిక స్వరూపాలపై జరుగుతున్న దాడిగా అభివర్ణించారు. కాబట్టి, ఈ వివాదాస్పద ఉత్తర్వులను సుప్రీంకోర్టు తక్షణమే రద్దు చేయాలని, కేవలం తొలి రెండు చరణాలనే జాతీయ గేయంగా అధికారికంగా ప్రకటించాలని ఆయన కోర్టును అభ్యర్థించారు. అలాగే, తమ వ్యక్తిగత మత విశ్వాసాల కారణంగా ఈ గేయాన్ని ఆలపించని వారిపై ఎలాంటి బలవంతపు చర్యలు తీసుకోకుండా తగిన ఆదేశాలు జారీ చేయాలని విజ్ఞప్తి చేశారు.