ప్రముఖ సినీ నటుడు అల్లు అర్జున్ పోలీసులు అదుపులోకి తీసుకున్నారు. డిసెంబర్ 4వ తేదీ సంధ్య థియేటర్ వద్ద పుష్ప 2 చిత్రం ప్రీమియర్ షో సందర్భగా చోటుచేసుకున్న తొక్కిసలాట ఘటనకు సంబంధించి చిక్కడపల్లి పోలీసు స్టేషన్‌లో కేసు నమోదు చేశారు. ఈ కేసులో అల్లు అర్జున్‌ను కూడా పోలీసులు నిందితుల్లో ఒకరిగా పేర్కొన్నారు. అయితే తాజాగా శుక్రవారం అల్లు అర్జున్ నివాసానికి వెళ్లిన పోలీసులు.. ఆయనను అదుపులోకి తీసుకున్నారు. కుటుంబ సభ్యుల సమక్షంలోనే అల్లు అర్జున్‌ను పోలీసులు అదుపులోకి తీసుకున్నారు. అయితే తనను అదుపులోకి తీసుకునే సమయంలో పోలీసులు వ్యవహరించిన తీరుపై అల్లు అర్జున్ ఆగ్రహం వ్యక్తం చేశారు. మరోవైపు అల్లు అర్జున్‌ను పోలీసులు అరెస్ట్ చేసే సమయంలో కుటుంబ సభ్యులు తీవ్ర భావోద్వేగానికి గురయ్యారు.. అయితే ఆ సమయంలో రిలాక్స్‌గా కనిపించిన అల్లు అర్జున్.. తన భార్య స్నేహా రెడ్డిని ప్రేమగా సముదాయించారు. అనంతరం పోలీసు వాహనంలోనే అల్లు అర్జున్‌ను చిక్కడపల్లి పోలీసు స్టేషన్‌‌కు తరలించారు.
