పత్తి రైతులకు కొత్త భారం….!

పత్తి రైతులకు మరోసారి కేంద్ర ప్రభుత్వం చేదు అనుభవాన్ని అందించింది. ఇప్పటికే మార్కెట్‌లో తగిన ధరలు దక్కక తీవ్రంగా నష్టపోతున్న రైతులకు, బీటీ-2 పత్తి విత్తన ధర పెంపు మరింత గుదిబండిగా మారింది. రూ. 864 నుండి రూ. 901కి పెంచిన విత్తన ధర వల్ల ఒక్కో ప్యాకెట్‌పై రూ. 37 అదనపు భారం పడనుంది. ఖమ్మం జిల్లాలోనే 5 లక్షల ఎకరాల్లో పత్తి సాగుతో ఉన్న రైతులకు రూ. 5 కోట్లకు పైగా అదనపు ఖర్చు అవుతుంది. రాష్ట్రవ్యాప్తంగా కోటి ప్యాకెట్లకు రూ. 74 కోట్ల భారం మోసే పరిస్థితి. గత ఐదేండ్లలో వరుసగా కేంద్రం ధరలను పెంచుతూ ఒక్కో ప్యాకెట్‌పై రూ. 171 మేర అదనపు భారాన్ని మోపింది. విత్తన ఖర్చు, ఎరువుల ధరల పెరుగుదల, తక్కువ మద్దతు ధరలతో రైతుల పరిస్థితి మరింత దిగజారిపోతోంది.

– పత్తి రైతులకు కేంద్రం మరొక దెబ్బ

దేశవ్యాప్తంగా పత్తి రైతులు ఆర్థికంగా కుదేలవుతున్నారు. విత్తన ధరల పెంపుతోపాటు ఎరువులు, పురుగుమందుల ధరల పెరుగుదల రైతులపై భారాన్ని మోపుతోంది. ఇప్పటికే మార్కెట్‌లో సరైన మద్దతు ధర దక్కని పరిస్థితిలో, విత్తన ధరలు పెరగడం రైతుల పరిస్థితిని మరింత దిగజారుస్తోంది.

– ఖమ్మం జిల్లాకు భారీ భారం

ఖమ్మం జిల్లాలో సుమారు 5 లక్షల ఎకరాల్లో పత్తి సాగవుతోంది. ప్రతి ఎకరానికి రెండు ప్యాకెట్ల చొప్పున 11 లక్షల విత్తన ప్యాకెట్ల అవసరం ఉంటుంది. తాజా పెంపుతో ఈ జిల్లాలోని రైతులపై రూ. 5 కోట్ల అదనపు ఖర్చు పడనుంది. పెట్టుబడులు పెరిగిపోతుండటంతో, పత్తి సాగును కొనసాగించాలా, వద్దా అనే దశలోకి రైతులు వెళ్తున్నారు.

– రాష్ట్రవ్యాప్తంగా పెరుగుతున్న భారం

తెలంగాణలో ఖరీఫ్ సీజన్‌లో సుమారు 50 లక్షల ఎకరాల్లో పత్తి సాగనుంది. ప్రతి ఎకరానికి రెండు ప్యాకెట్ల చొప్పున లెక్కిస్తే, మొత్తం కోటి విత్తన ప్యాకెట్లు అవసరమవుతాయి. తాజా ధర పెంపుతో 2 కోట్ల ప్యాకెట్ల కొనుగోలుకు రైతులకు రూ. 74 కోట్ల అదనపు భారం పడనుంది.

– ఐదేండ్లలో పెరిగిన విత్తన ధర.

గత ఐదేండ్లుగా కేంద్ర ప్రభుత్వం బీటీ-2 పత్తి విత్తన ధరలను క్రమంగా పెంచుతూ వస్తోంది. ఈసారి పెంపుతో కలిపి ఒక్కో ప్యాకెట్‌పై రూ. 171 అదనపు భారం పడింది. రైతులకు ప్రత్యామ్నాయ మార్గాలు లేకుండా ధరలను పెంచడం వ్యవసాయాన్ని మరింత భారంగా మారుస్తోంది.

రైతులు కేంద్ర ప్రభుత్వాన్ని వెంటనే ఈ నిర్ణయాన్ని సమీక్షించాల్సిందిగా కోరుతున్నారు. రైతుల నష్టాలను తగ్గించేందుకు ప్రభుత్వం సబ్సిడీ విధానం ప్రవేశపెట్టాలని డిమాండ్ చేస్తున్నారు. ప్రభుత్వం వెంటనే స్పందించకపోతే, రైతుల ఆత్మహత్యలు పెరిగే ప్రమాదం ఉందని వ్యవసాయ నిపుణులు హెచ్చరిస్తున్నారు. రైతుల కష్టాలను ప్రభుత్వం గమనించి తగిన చర్యలు తీసుకోవాల్సిన అవసరం ఉంది