- ఐబొమ్మ రవిది తెలివే తెలివి
- పన్ను ఎగ్గొట్టేందుకు సోదరికి రూ. లక్షల్లో డబ్బు పంపిన రవి
- పోర్జరీ ద్వారా రవి ఆర్జించింది. రూ. 13.40 కోట్లు
- పోలీసులు రికవరీ చేసింది రూ. 3 కోట్లు
- పోలీసు కస్టడీ రిపోర్టులో ఆసక్తికర అంశాలు
హైదరాబాద్, మహా : ఐబొమ్మ రవి పైరసీ కేసులో సంచలన విషయాలు వెలుగులోకి వచ్చాయి. పైరసీ సినిమాల ద్వారా రవి రూ. 13.40 కోట్లు ఆర్జించినట్లు తెలిసింది. ట్యాక్స్ ఎగ్గొట్టేందుకు అందులో రూ. 90 లక్షలు తన సోదరికి పంపినట్లు పోలీసులు గుర్తించారు. కాగా, కస్టడీలో విచారణకు ఐబొమ్మ రవి పూర్తిగా సహకరించలేదని తెలుస్తోంది. కొన్ని సందర్భాల్లో విచారణ అధికారులపైకే గుడ్లు ఉరిమి చూసినట్లు సమాచారం. ఇదిలా ఉండగా.. తనపై ఉన్న కేసులన్నీ తప్పుడివేనని రవి వాదించాడు. తెలుగు రాష్ట్రాల్లో ఐబొమ్మ రవి కేసు సంచలనం సృష్టించిన విషయం తెలిసిందే. ఐబొమ్మ, బప్పం వంటి పైరసీ వెబ్సైట్లు సృష్టించిన కేసులో ప్రధాన నిందితుడు ఇమంది రవి కస్టడీ డిసెంబర్ 29తో ముగిసింది. అనంతరం అతడిని నాంపల్లి కోర్టులో హాజరు పరిచారు. ఈ సందర్భంగా రవి కస్టడీ రిపోర్టును పోలీసులు కోర్టుకు సమర్పించారు. అయితే ఆ నివేదికలో సంచలన విషయాలు బయటపడ్డాయి. 12 రోజుల కస్టడీలో రవి కేసులో కీలక అంశాలు బయటపెట్టారు పోలీసులు. సినిమాలను రెండు రకాలుగా కొనుగోలు చేసినట్లు ఐబొమ్మ రవి కస్టడీ రిపోర్టులో పోలీసులు పేర్కొన్నారు. రెండింటికీ వేరు వేరుగా ధర చెల్లించినట్లు సమాచారం. క్యామ్ కార్డర్ ప్రింట్కు ఒక ధర.. హెచ్డీ ప్రింట్కు మరో ధర చెల్లించినట్లు తెలిపారు. ఒక్కో క్యామ్ కార్డర్ ప్రింట్ సినిమాకు 100 డాలర్లు, హెచ్డీ ప్రింట్కు 200 డాలర్లు చెల్లించినట్లు తెలిపారు. కాగా, పైరసీ సినిమాల ద్వారా రవి బ్యాంకు ఖాతాలకు రూ. 13.40 కోట్లు వచ్చినట్లు పోలీసులు గుర్తించారు. అయితే ఇందులో దాదాపు రూ. 3 కోట్లు మాత్రమే పోలీసులు ఫ్రీజ్ చేయగలిగారు.
సోదరికి డబ్బులు పంపిణీ
కాగా, రూ. 13.40 కోట్లలో బెట్టింగ్ యాప్స్ ప్రమోషన్ ద్వారా రవికి రూ. 1.58 కోట్లు వచ్చినట్లు పోలీసులు తెలిపారు. ఈ డబ్బులో దాదాపు రూ. 90 లక్షలు తన సోదరి చంద్రికకు పంపించాడని చెప్పారు. అయితే నగదు లావాదేవీలన్నీ డాలర్ల రూపంలోనే జరిగినట్లు తెలుస్తోంది. అయితే సినిమాల పైరసీ ప్రారంభించిన మొదట్లో కొంతకాలం రవి కూకట్పల్లిలోనే ఉన్నాడని.. ఆ తర్వాత డబ్బులు ఎక్కువగా రావడంతో జల్సాల కోసం ఇతర దేశాలకు వెళ్లినట్లు పోలీసులు నిర్ధరించారు. కాగా, ఒక్కో కేసులో నాలుగు రోజుల చొప్పున.. మూడు కేసుల్లో 12 రోజులపాటు పోలీసులు ఐబొమ్మ రవిని కస్టడీలోకి తీసుకున్న విషయం తెలిసిందే.
ప్రశ్నలు అడిగితే ఉరిమి చూశాడు
కస్టడీలో విచారణకు రవి పూర్తిగా సహకరించలేదని తెలుస్తోంది. పోలీసుల ప్రశ్నలకు ఐబొమ్మ రవి నిర్భయంగా సమాధానం చెప్పినట్లు సమాచారం. అయితే.. అడిగిన ప్రశ్న మళ్లీ అడిగితే ఉరిమి చూసినట్లు సమాచారం. అయితే విచారణ తర్వాత రవి మీడియాతో మాట్లాడాడు. తన మీద పెట్టిన కేసులన్నీ తప్పుడువే అన్నాడు. ఏదైనా కోర్టులోనే తేల్చుకుంటానని చెప్పాడు. పైరసీ మాత్రమే కాకుండా రవిపై ఫోర్జింగ్ ఆరోపణలు కూడా వచ్చాయి. ఇటీవల ప్రహ్లాద్ పేరుపై రవి పాన్ కార్డ్, డ్రైవింగ్ లైసెన్స్ తీసుకున్నాడు. అడిగితే అవి తన స్నేహితుడివి అని చెప్పాడు. దీంతో బెంగళూరుకు చెందిన ప్రహ్లాద్ను పిలిపించి.. అతడి ఎదుటే రవిని పోలీసులు ప్రశ్నలు అడిగారు. రవి తీసుకున్న పాన్ కార్డ్, డ్రైవింగ్ లైసెన్సు విషయం తనకేమీ తెలియదని, తన అనుమతి కూడా తీసుకోలేదని ప్రసాద్ పోలీసులకు చెప్పాడు.
