ఏషియన్ గేమ్స్ బరిలో యువసంచలనం వైభవ్.
* ఆసియా క్రీడల కోసం 30 మందితో ప్రాథమిక జాబితా సిద్ధం.
* విండీస్ సిరీస్ నేపథ్యంలో రెండు వేర్వేరు జట్ల ఎంపికకు బీసీసీఐ కసరత్తు.
* భవిష్యత్తు ప్రణాళికల్లో టీ20 కెప్టెన్ సూర్యకుమార్ యాదవ్కు నిరాశ.
* కెప్టెన్సీ రేసులో శ్రేయస్ అయ్యర్, సంజూ శాంసన్, తిలక్ వర్మ.
ఢిల్లీ, మహా.
ఆసియా క్రీడల్లో పసిడి పతకమే లక్ష్యంగా భారత క్రికెట్ నియంత్రణ మండలి (బీసీసీఐ) పక్కా వ్యూహంతో అడుగులు వేస్తోంది. జపాన్లోని ఐచీ-నగోయా వేదికగా జరగనున్న ఈ ప్రతిష్టాత్మక క్రీడల కోసం 30 మంది ఆటగాళ్లతో కూడిన ప్రాథమిక జాబితాను ఇండియన్ ఒలింపిక్ అసోసియేషన్ (ఐఓఏ)కు సమర్పించింది. అయితే ఈ జాబితాలో అనూహ్య మార్పులు చోటుచేసుకున్నాయి. దేశవాళీ క్రికెట్లో అదరగొడుతున్న కుర్రాడు వైభవ్ సూర్యవంశీకి అవకాశం దక్కగా.. టీ20 రెగ్యులర్ కెప్టెన్ సూర్యకుమార్ యాదవ్, స్టార్ ఓపెనర్ శుభ్మన్ గిల్లకు చోటు దక్కకపోవడం క్రీడా వర్గాల్లో తీవ్ర చర్చనీయాంశంగా మారింది.
**ఒకే సమయంలో రెండు సిరీస్లు.. రెండు జట్లు**
షెడ్యూల్ ప్రకారం సెప్టెంబర్ 19 నుంచి అక్టోబర్ 4 వరకు జపాన్లో ఆసియా క్రీడలు జరగనున్నాయి. సరిగ్గా అదే సమయంలో (సెప్టెంబర్ 27 నుంచి) వెస్టిండీస్ జట్టుతో భారత్ స్వదేశంలో వన్డే, టీ20 సిరీస్ ఆడాల్సి ఉంది. ఒకే సమయంలో రెండు కీలక టోర్నీలు ఉండటంతో బీసీసీఐ రెండు వేర్వేరు జట్లను బరిలోకి దించాలని నిర్ణయించింది. విండీస్తో జరిగే సిరీస్లో వన్డే జట్టుకు శుభ్మన్ గిల్ కెప్టెన్గా వ్యవహరించే అవకాశం ఉన్నందునే, అతడిని ఏషియన్ గేమ్స్ జాబితాలో చేర్చలేదని సమాచారం.
**సూర్యకుమార్కు దక్కని అవకాశం.. రేసులో ఎవరంటే!**
ఈ ప్రాథమిక జాబితాలో భారత టీ20 కెప్టెన్ సూర్యకుమార్ యాదవ్ పేరు లేకపోవడం అందరినీ ఆశ్చర్యానికి గురిచేసింది. 2028 ఒలింపిక్స్, అలాగే రాబోయే టీ20 ప్రపంచకప్లను దృష్టిలో ఉంచుకుని సెలక్టర్లు పూర్తిగా యువ ఆటగాళ్లకే పెద్దపీట వేస్తున్నట్లు స్పష్టమవుతోంది. భవిష్యత్తు ప్రణాళికల దృష్ట్యా సూర్యకుమార్ను పక్కనపెట్టినట్లు తెలుస్తోంది. ఇక ఆసియా క్రీడలకు వెళ్లే భారత జట్టుకు శ్రేయస్ అయ్యర్, సంజూ శాంసన్ లేదా యువ కెరటం తిలక్ వర్మలలో ఒకరు కెప్టెన్గా వ్యవహరించే అవకాశం ఉంది. గత ఆసియా క్రీడల్లో జట్టుకు పసిడి అందించిన రుతురాజ్ గైక్వాడ్కు సైతం ఈ జాబితాలో చోటు దక్కింది.
**బౌలింగ్ విభాగం ఎంపిక ఇలా..**
ఈ 30 మంది జాబితాలో స్టార్ పేసర్ జస్ప్రీత్ బుమ్రా పేరు ఉన్నప్పటికీ, అతడు స్వదేశంలో విండీస్తో జరిగే సిరీస్కే ప్రాధాన్యం ఇవ్వనున్నట్లు తెలుస్తోంది. గాయం నుంచి కోలుకుంటున్న హర్షిత్ రాణాతో పాటు పేసర్లు ప్రసిద్ధ్ కృష్ణ, అర్ష్దీప్ సింగ్లకు చోటు దక్కింది. స్పిన్ విభాగంలో కుల్దీప్ యాదవ్, అక్షర్ పటేల్, వాషింగ్టన్ సుందర్, హర్ష్ దూబేలను ఎంపిక చేశారు. అయితే వీరిలో ఇద్దరు ఏషియన్ గేమ్స్కు వెళ్లనుండగా, మిగిలిన ఇద్దరు విండీస్ సిరీస్లో ఆడనున్నారు.
**ప్రాథమిక జాబితాలో ఎంపికైన 30 మంది ఆటగాళ్లు వీరే:**
యశస్వి జైస్వాల్, అభిషేక్ శర్మ, వైభవ్ సూర్యవంశీ, ఇషాన్ కిషన్, సంజూ శాంసన్, శ్రేయస్ అయ్యర్, రిషబ్ పంత్, హార్దిక్ పాండ్యా, రింకూ సింగ్, తిలక్ వర్మ, జస్ప్రీత్ బుమ్రా, అక్షర్ పటేల్, అర్ష్దీప్ సింగ్, కుల్దీప్ యాదవ్, నితీశ్ కుమార్ రెడ్డి, ప్రసిద్ధ్ కృష్ణ, వరుణ్ చక్రవర్తి, అనుకుల్ రాయ్, ఆయుష్ బదోని, హర్ష్ దూబే, ధ్రువ్ జురెల్, ఖలీల్ అహ్మద్, రుతురాజ్ గైక్వాడ్, రవి బిష్ణోయ్, షాబాజ్ అహ్మద్, శివం దూబే, విప్రజ్ నిగమ్, హర్షిత్ రాణా, యశ్ ఠాకూర్, వాషింగ్టన్ సుందర్.
