డబ్ల్యూటీఓలో చైనాకు భారత్ చెక్: ఐఎఫ్డీ ఒప్పందంపై పీయూశ్ గోయల్ ధీటైన గళం!

చైనా ప్రతిపాదనకు భారత్ ‘నో’.
* డబ్ల్యూటీఓలో ఐఎఫ్డీ ఒప్పందంపై ధీటైన వైఖరి.
* సత్యం కోసం ఒంటరి పోరాటానికైనా సిద్ధం.
* డబ్ల్యూటీఓ వేదికగా పీయూశ్ గోయల్ స్పష్టీకరణ.
జెనీవా, మార్చి 29: ప్రపంచ వాణిజ్య సంస్థ (డబ్ల్యూటీఓ) వేదికగా భారత్‌ మరోసారి తన ధీటైన వైఖరిని చాటిచెప్పింది. చైనా నేతృత్వంలో ప్రతిపాదించిన ‘ఇన్వెస్ట్‌మెంట్ ఫెసిలిటేషన్ ఫర్ డెవలప్మెంట్’ (ఐఎఫ్డీ) ఒప్పందాన్ని డబ్ల్యూటీఓ ఫ్రేమ్‌వర్క్‌లో చేర్చాలన్న ప్రయత్నాలను భారత్ తీవ్రంగా వ్యతిరేకించింది. 14వ మంత్రివర్గ సమావేశంలో కేంద్ర వాణిజ్య, పరిశ్రమల మంత్రి పీయూశ్ గోయల్ మాట్లాడుతూ, ఈ ఒప్పందం డబ్ల్యూటీఓ యొక్క ప్రాథమిక బహుళపక్ష సూత్రాలను దెబ్బతీసే ప్రమాదం ఉందని హెచ్చరించారు. పారదర్శకత అనే ముసుగులో వాణిజ్య ప్రతీకార చర్యలను సమర్థించుకోవడం తగదని ఆయన స్పష్టం చేశారు.
మహాత్మా గాంధీ సత్య సిద్ధాంతం నుంచి స్ఫూర్తి పొంది, సత్యం కోసం అవసరమైతే భారత్ ఒంటరిగానైనా నిలబడటానికి సిద్ధంగా ఉందని గోయల్ ఉద్ఘాటించారు. ఐడీఎఫ్ ఒప్పందాన్ని అనెక్స్-4 కింద చేర్చడాన్ని తాము ఎంతమాత్రం అంగీకరించబోమని తేల్చి చెప్పారు. అనెక్స్-4లో ఉండే ఒప్పందాలు కేవలం అంగీకరించిన దేశాలకే వర్తిస్తాయని, అలాంటి వాటిని ప్రధాన డబ్ల్యూటీఓ చట్రంలోకి తీసుకురావడం వల్ల సంస్థలో విభజనలు వస్తాయని ఆందోళన వ్యక్తం చేశారు. భవిష్యత్తులో ఇలాంటి ఒప్పందాలపై చర్చలు జరపాలంటే ముందుగా చట్టపరమైన భద్రతా చర్యలు, స్పష్టమైన నియమావళి రూపొందించాలని ఆయన డిమాండ్ చేశారు. అయితే డబ్ల్యూటీఓ సంస్కరణల విషయంలో నిర్మాణాత్మక చర్చలకు భారత్ ఎల్లప్పుడూ సిద్ధంగా ఉంటుందని పునరుద్ఘాటించారు.
గతంలో అబుదాబి వేదికగా జరిగిన సమావేశంలో కూడా భారత్ ఇదే తరహా అభ్యంతరాలను వ్యక్తం చేసింది. 2017లో చైనా మరియు దానిపై ఆర్థికంగా ఆధారపడే కొన్ని దేశాలు ఈ ఐఎఫ్డీ ప్రతిపాదనను ముందుకు తెచ్చాయి. పారదర్శకత విషయంలో అమెరికా వంటి దేశాలు కఠిన నియమాల కోసం ఒత్తిడి తెస్తున్న తరుణంలో, అభివృద్ధి చెందుతున్న దేశాల సమస్యలను భారత్ బలంగా వినిపించింది. చాలా దేశాలకు అవసరమైన సాంకేతిక సామర్థ్యం లేకపోవడం వల్ల వాణిజ్య విధానాలపై సమాచారాన్ని సకాలంలో అందించలేకపోతున్నాయని, దీన్ని సాకుగా చూపి శిక్షలు విధించడం లేదా వాణిజ్య ప్రతీకారానికి ఆయుధంగా వాడుకోవడం అన్యాయమని పేర్కొంది. పారదర్శకత అమలుకు ముందు దేశాల సామర్థ్య పెంపుపై దృష్టి సారించాలని సూచించింది.
మార్చి 27న జరిగిన ‘లెవల్ ప్లేయింగ్ ఫీల్డ్’ సమావేశంలో కూడా పీయూశ్ గోయల్ ఈ అంశాన్ని ప్రస్తావించారు. ప్రపంచ వాణిజ్యంలో అన్ని దేశాలకు సమాన అవకాశాలు ఉండాలని, ముఖ్యంగా అభివృద్ధి చెందుతున్న దేశాలు ఉత్పాదక రంగంలో రాణించేలా మద్దతు లభించాలని కోరారు. ఈ సదస్సు మధ్యలో ఆయన కెనడా వాణిజ్య మంత్రితో భేటీ అయి, స్వేచ్ఛా వాణిజ్య ఒప్పందం (ఎఫ్‌టీఏ)పై జరుగుతున్న చర్చల పురోగతిని సమీక్షించారు. అలాగే ఒమన్ ప్రతినిధులతో కూడా సమావేశమై ద్వైపాక్షిక సంబంధాల బలోపేతంపై చర్చలు జరిపారు. అంతర్జాతీయ వాణిజ్య వేదికలపై భారత్ తన సార్వభౌమాధికారాన్ని, అభివృద్ధి చెందుతున్న దేశాల ప్రయోజనాలను కాపాడటంలో రాజీ పడబోదని ఈ పరిణామాలు స్పష్టం చేస్తున్నాయి.