- లక్షకు పైగా కొత్త ఉద్యోగాలకు మార్గం సుగమం.
- పారిశ్రామిక ప్రగతిలో ఆంధ్రప్రదేశ్ సరికొత్త అడుగు.
- సోలార్ హబ్గా రాయలసీమ.. అమరావతి క్వాంటం.
- వ్యాలీలో మూడు ప్రతిష్ఠాత్మక సంస్థల ఏర్పాటు.
- నిర్దేశిత గడువులోగా గ్రౌండింగ్ కావాల్సిందే.
- ఏపీ సీఎం సీఎం చంద్రబాబు.
అమరావతి, మహా.
ఆంధ్రప్రదేశ్ను పారిశ్రామికంగా అగ్రగామిగా నిలపాలనే సంకల్పంతో ముఖ్యమంత్రి నారా చంద్రబాబు నాయుడు నేతృత్వంలోని ప్రభుత్వం మరో భారీ ముందడుగు వేసింది. రాష్ట్రవ్యాప్తంగా వివిధ రంగాల్లో భారీ పెట్టుబడులకు పచ్చజెండా ఊపుతూ, రూ.39,436.84 కోట్ల విలువైన 31 కీలక ప్రాజెక్టులకు రాష్ట్రస్థాయి పెట్టుబడుల ప్రోత్సాహక బోర్డు (ఎస్ఐపీబీ) మంగళవారం ఆమోదముద్ర వేసింది. సచివాలయంలో జరిగిన ఈ 16వ ఎస్ఐపీబీ సమావేశంలో తీసుకున్న నిర్ణయాల వల్ల రాష్ట్రంలో ప్రత్యక్షంగా 1,11,278 మంది నిరుద్యోగ యువతకు ఉద్యోగ అవకాశాలు లభించనున్నాయి. పారదర్శకతకు పెద్దపీట వేస్తూ, రాష్ట్రానికి వస్తున్న పెట్టుబడులు మరియు లభిస్తున్న ఉద్యోగాల వివరాలను ఎప్పటికప్పుడు వెబ్సైట్లో అందుబాటులో ఉంచాలని అధికారులను ముఖ్యమంత్రి ఆదేశించారు.
రాష్ట్ర పురోగతిలో కీలకమైన పరిశ్రమలు, విద్యుత్, ఐటీ, పర్యాటకం మరియు ఫుడ్ ప్రాసెసింగ్ రంగాల్లో ఈ పెట్టుబడులు ప్రవహించనున్నాయి. ముఖ్యంగా రాజధాని అమరావతిలోని క్వాంటం వ్యాలీలో మూడు ప్రతిష్ఠాత్మక సంస్థల ఏర్పాటుకు ఆమోదం లభించడంతో ఆ ప్రాంతం ఐటీ మరియు హైటెక్ పరిశ్రమలకు కేంద్రంగా మారబోతోంది. రాయలసీమ జిల్లాలను దేశంలోనే అతిపెద్ద ‘సోలార్ హబ్’గా తీర్చిదిద్దాలని ముఖ్యమంత్రి దిశానిర్దేశం చేశారు. రాష్ట్రంలో ఉన్న 325 గిగావాట్ల సౌర విద్యుత్ ఉత్పత్తి సామర్థ్యాన్ని పూర్తిస్థాయిలో వినియోగించుకోవాలని, ఉత్పత్తి అయిన విద్యుత్తును జాతీయ గ్రిడ్కు అనుసంధానించేలా శక్తిమంతమైన ట్రాన్స్మిషన్ లైన్లను సిద్ధం చేయాలని అధికారులకు స్పష్టం చేశారు. ఎలక్ట్రానిక్స్ తయారీ రంగంలోనూ శ్రీసిటీ, కొప్పర్తి, అనంతపురం ప్రాంతాలను కీలక కేంద్రాలుగా మార్చడంతో పాటు, ఏపీని గ్లోబల్ కేపబిలిటీ సెంటర్లకు (జీసీసీ) చిరునామాగా మార్చాలని ప్రభుత్వం లక్ష్యంగా పెట్టుకుంది.
వ్యవసాయ అనుబంధ రంగాలైన ఆక్వా , ఉద్యాన రంగాల్లో వెలువడే వ్యర్థాలను సంపదగా మార్చే ప్రాజెక్టులపై సీఎం ప్రత్యేక దృష్టి సారించారు. కాలుష్య రహితంగా ఇథనాల్ వంటి ఉప ఉత్పత్తులను తయారు చేసే యూనిట్ల ఏర్పాటుకు ప్రాధాన్యత ఇవ్వాలని, దీనిపై కేంద్ర ప్రభుత్వ సహకారం కూడా తీసుకోవాలని సూచించారు. పారిశ్రామిక భద్రత విషయంలో ఎట్టి పరిస్థితుల్లోనూ రాజీ పడకూడదని, ముఖ్యంగా ఫార్మా మరియు గ్రీన్ ఎనర్జీ రంగాల్లో అత్యున్నత ప్రమాణాలతో కూడిన ప్రత్యేక కార్యాచరణ ప్రణాళిక సిద్ధం చేయాలని అధికారులను ఆదేశించారు. భవిష్యత్తులో ఎలాంటి ప్రమాదాలు జరగకుండా ముందస్తు విపత్తు నిర్వహణ ఏర్పాట్లు ఉండాలని స్పష్టం చేశారు.
గత 22 నెలల కాలంలో ఎస్ఐపీబీ ద్వారా రూ.9.36 లక్షల కోట్ల విలువైన 264 ప్రాజెక్టులకు ప్రభుత్వం ఆమోదం తెలపగా, వీటి ద్వారా సుమారు 9.60 లక్షల ఉద్యోగాల సృష్టి జరగనుంది. విశాఖ భాగస్వామ్య సదస్సు ఒప్పందాలతో కలిపి రాష్ట్రానికి మొత్తం రూ.20.74 లక్షల కోట్ల పెట్టుబడులు, తద్వారా 23.55 లక్షల ఉద్యోగాలు తీసుకురావడమే తమ ప్రభుత్వ అంతిమ లక్ష్యమని సమావేశంలో వెల్లడించారు. ఆమోదం పొందిన ప్రాజెక్టులు కేవలం కాగితాలకే పరిమితం కాకుండా, నిర్దేశిత గడువులోగా కార్యరూపం దాల్చేలా ప్రతి సమావేశంలోనూ వాటి పురోగతిని సమీక్షిస్తామని సీఎం చంద్రబాబు హెచ్చరించారు. ఈ నిర్ణయాలతో ఆంధ్రప్రదేశ్ పారిశ్రామిక పటంలో సరికొత్త చరిత్రను లిఖించబోతోందని విశ్లేషకులు భావిస్తున్నారు.
