- ప్రతి ఇంటికీ మోదీ సంక్షేమ పథకాలను పంపాలి.
- డిజిటల్ వేదికలను సద్వినియోగం చేసుకోవాలి.
- మీడియా వారీయులకు ఎన్. రామచంద్రరావు పిలుపు
హైదరాబాద్, మహా.
కేంద్రంలోని నరేంద్ర మోదీ ప్రభుత్వం అమలు చేస్తున్న సంక్షేమ పథకాలు , సాధించిన విజయాలను రాష్ట్రంలోని ప్రతి ఇంటికీ చేరవేయాలని భారతీయ జనతా పార్టీ రాష్ట్ర అధ్యక్షుడు ఎన్. రామచంద్రరావు పార్టీ శ్రేణులకు పిలుపునిచ్చారు. మంగళవారం భాగ్యనగరంలోని రాష్ట్ర కార్యాలయం వేదికగా జరిగిన మీడియా ప్రతినిధులు, సోషల్ మీడియా బృందం , ప్యానలిస్టుల సమావేశంలో ఆయన మాట్లాడారు. ప్రధాని మోదీ నాయకత్వంలో గడిచిన పుష్కర కాలంలో దేశం సాధించిన అద్భుత ప్రగతిని కేవలం వార్తలకే పరిమితం చేయకుండా, ప్రజల్లోకి బలంగా తీసుకెళ్లాల్సిన బాధ్యత కార్యకర్తలపై ఉందని ఆయన స్పష్టం చేశారు.
కేంద్ర ప్రభుత్వం ప్రవేశపెట్టిన కిసాన్ సమ్మాన్ నిధి, ఉజ్వల యోజన, ఆయుష్మాన్ భారత్ వంటి పథకాల లబ్ధిదారులను నేరుగా కలిసి, వారి అనుభవాలను సోషల్ మీడియా వేదికగా పంచుకోవాలని రామచంద్రరావు సూచించారు. ఈ పథకాలకు రాష్ట్ర ప్రభుత్వం తన సొంత ముద్ర వేసుకునే ప్రయత్నం చేస్తోందని, ఆ క్రెడిట్ కేంద్రానికి దక్కకుండా అడ్డుకుంటోందని ఆయన ఆరోపించారు. ఈ కుట్రలను బట్టబయలు చేస్తూ, వాస్తవాలను లబ్ధిదారులకు వివరించాలని దిశానిర్దేశం చేశారు. ముఖ్యంగా ప్రతి అసెంబ్లీ నియోజకవర్గంలో ఐటీ సెల్ను బలోపేతం చేయాలని ఆయన నిర్ణయించారు.
రాష్ట్రంలోని కాంగ్రెస్, బీఆర్ఎస్ పార్టీలు కేవలం అవాస్తవాలను ప్రచారం చేస్తూ ప్రజలను తప్పుదోవ పట్టించే ప్రయత్నం చేస్తున్నాయని రామచంద్రరావు విమర్శించారు. విపక్షాల ఆరోపణలకు రక్షణాత్మక ధోరణిలో కాకుండా, దాడి చేసే వ్యూహంతో ముందుకు వెళ్లాలని ఆయన కేడర్కు సూచించారు. ప్రతి అబద్ధాన్ని ఆధారాలతో సహా క్షేత్రస్థాయిలోనే తుత్తునియలు చేయాలని ఆదేశించారు. నేటి కాలంలో వార్త కంటే వేగంగా సోషల్ మీడియా పోస్టులు ప్రజల్లోకి వెళ్తున్నాయని, అందుకే ఎక్స్, ఫేస్బుక్, వాట్సాప్ వంటి మాధ్యమాలను పూర్తిస్థాయిలో సద్వినియోగం చేసుకోవాలని ఆయన కోరారు.
పార్టీ సిద్ధాంతాలు , కేంద్ర విజయాల సందేశం గ్రామీణ స్థాయిలోకి బలంగా వెళ్లాలంటే ప్రాంతీయ భాషలో కంటెంట్ సృష్టించడం అత్యంత కీలకమని రామచంద్రరావు అభిప్రాయపడ్డారు. టీవీ చర్చల్లో పాల్గొనే ప్రతినిధులు ప్రత్యర్థుల రెచ్చగొట్టే వ్యాఖ్యలకు లొంగకుండా, హుందాగా ఉంటూనే తర్కంతో కౌంటర్ ఇవ్వాలని సూచించారు. అబ్కారీ శాఖలో జరుగుతున్న పరిణామాలు, ప్రభుత్వ వైఫల్యాలను ఎప్పటికప్పుడు సోషల్ మీడియాలో చర్చకు తీసుకురావాలని చెప్పారు. వికసిత్ భారత్ లక్ష్య సాధనలో తెలంగాణ యువతను భాగస్వామ్యం చేసేలా మన డిజిటల్ ప్రచారం సాగాలని రామచంద్రరావు స్పష్టం చేశారు.
