నక్సలిజం ‘అంతం’.. దేశానికి విముక్తి!.

*ఐదు దశాబ్దాల ఉగ్రఛాయలకు శాశ్వతంగా తెర.
*తొమ్మిది రాష్ట్రాలకు కేంద్రం అధికారిక లేఖ.
ఢిల్లీ, మహా.

భారత దేశాన్ని ఐదు దశాబ్దాలకు పైగా పీడించిన నక్సలిజం దాదాపుగా అంతమైందని కేంద్ర ప్రభుత్వం అధికారికంగా ప్రకటించింది. దేశంలో ఇప్పుడు ‘నక్సల్స్ ప్రభావిత’ జిల్లా అంటూ ఏదీ లేదని స్పష్టం చేస్తూ కేంద్ర హోం మంత్రిత్వ శాఖ తాజాగా తొమ్మిది రాష్ట్రాలకు అధికారిక సమాచారం పంపింది. మార్చి 31, 2026 నాటికి దేశం నక్సల్ రక్కసి నుంచి పూర్తి విముక్తి పొందిందని కేంద్రం ఈ లేఖల్లో పేర్కొంది. ఒకప్పుడు నక్సలిజానికి చిరునామాగా ఉండి, అత్యంత హింసాత్మక ప్రాంతాలుగా పేరుగాంచిన ఛత్తీస్‌గఢ్‌లోని బీజాపుర్, ఝార్ఖండ్‌లోని పశ్చిమ సింగ్‌భూమ్ జిల్లాల్లో కూడా ఇప్పుడు హింస పూర్తిగా నియంత్రణలోకి వచ్చిందని కేంద్రం వెల్లడించింది. ఇది భారత భద్రతా దళాల అలుపెరుగని పోరాటానికి, ప్రభుత్వ అభివృద్ధి ప్రణాళికలకు దక్కిన భారీ విజయమని అభివర్ణించింది.
**తిరిగి పుట్టకుండా ‘లెగసీ’ నిఘా**
నక్సలిజం ప్రస్తుతం అంతమైనప్పటికీ, ఆ భావజాలం మళ్ళీ పుట్టకుండా ఉండేందుకు కేంద్ర ప్రభుత్వం వ్యూహాత్మకంగా జిల్లాలను రెండు కేటగిరీలుగా వర్గీకరించింది. ఇందులో భాగంగా ఆంధ్రప్రదేశ్‌లోని అల్లూరి సీతారామరాజు జిల్లాను, తెలంగాణలోని భద్రాద్రి కొత్తగూడెం, ములుగు జిల్లాలను ‘లెగసీ అండ్ థ్రస్ట్’ కేటగిరీలో చేర్చింది. దేశవ్యాప్తంగా మొత్తం 37 జిల్లాలు ఈ జాబితాలో ఉన్నాయి. ఈ ప్రాంతాల్లో నక్సల్స్ ప్రభావం ప్రస్తుతం లేనప్పటికీ, భవిష్యత్తులో తిరిగి తలెత్తకుండా భద్రతను పటిష్ఠం చేయడంతో పాటు, మౌలిక వసతుల కల్పన మరియు అభివృద్ధి పనులను మరింత వేగవంతంగా పర్యవేక్షించనున్నారు. ఇందుకోసం ప్రత్యేక నిధులు, నిరంతర నిఘా కొనసాగుతుందని కేంద్రం స్పష్టం చేసింది.
**పశ్చిమ సింగ్‌భూమ్‌పై ప్రత్యేక దృష్టి**
మరోవైపు, ఝార్ఖండ్‌లోని పశ్చిమ సింగ్‌భూమ్ జిల్లాను మాత్రం ‘డిస్ట్రిక్ట్ ఆఫ్ కన్సర్న్’ కేటగిరీలో ఉంచారు. దేశంలో ఈ జాబితాలో ఉన్న ఏకైక జిల్లా ఇదే కావడం గమనార్హం. ఇక్కడ నక్సల్స్ నెట్‌వర్క్ ఇప్పటికే చిన్నాభిన్నమైనా, భౌగోళిక పరిస్థితుల దృష్ట్యా భవిష్యత్తులో అక్కడ ఎటువంటి అవాంఛనీయ ఘటనలు జరగకుండా నిరంతర భద్రతా దళాల పహారా అవసరమని కేంద్రం భావిస్తోంది. ఈ ఒక్క జిల్లా మినహా మిగిలిన అన్ని ప్రాంతాల్లో సాధారణ పరిస్థితులు నెలకొన్నాయని, అభివృద్ధి పథకాలు ప్రజల దరి చేరుతున్నాయని హోం శాఖ సంతృప్తి వ్యక్తం చేసింది.
**అభివృద్ధి పథంలో బాధితు ప్రాంతాలు**
నక్సలిజం అంతమైన ఈ చారిత్రక తరుణంలో, ఆయా ప్రాంతాల్లో సామాజిక విప్లవానికి కేంద్రం నాంది పలికింది. రోడ్ల నిర్మాణం, మొబైల్ టవర్ల ఏర్పాటు, విద్య, వైద్యం వంటి మౌలిక సదుపాయాలను గతంలో కంటే వేగంగా ప్రజలకు అందుబాటులోకి తెచ్చేందుకు యుద్ధ ప్రాతిపదికన చర్యలు చేపడుతోంది. “రక్తపాతం లేని భారత్” లక్ష్యంగా సాగిన ఈ పోరాటంలో భద్రతా దళాల త్యాగాలు వృధా కాలేదని, ఇకపై ఈ ప్రాంతాల్లో తుపాకీ చప్పుడు కాకుండా ప్రగతి శబ్దం వినిపిస్తుందని కేంద్ర ప్రభుత్వం ఈ సందర్భంగా ఆశాభావం వ్యక్తం చేసింది. పది రాష్ట్రాల్లో వ్యాపించిన ‘రెడ్ కారిడార్’ ఇప్పుడు కేవలం చరిత్ర పుటలకే పరిమితం కావడం విశేషం.